TAGBILARAN CITY, June 29 (PIA)–Subling nipahinumdom ang Bangko Sentral ng Pilipinas (BSP) sa publiko nga taman katapusan na lamang ning tuig magamit sa transaction ang mga daang bank notes o salapi.
Matud pa ni BSP-7 Acting Regional Director, Atty. Leonides Sumbi, ang mga old banknote nga gihimo niadto pang tuig 1985 mahimo na lamang magamit taman Disyembre 31, 2015.
Atol sa Kapihan sa PIA ning bag-o lang, nipasidaan si Sumbi nga bawal nang gamiton ang mga daang salaping papel sa Enero 2016 apan gi klaro niini nga mahimo pa kining pailisan sa mga bangko o sa BSP.
Matud pa nga kining maong mga salapi kapin na sa tulo ka dekada nga naa sa sirkulasyon.
Pagkahuman niini, kun naa pay natagong mga daang salapi, mahimo pa kining paalisdan sugod Enero 1, 2016 hangtud Disyembre 31, 2016.
Alang sa mga overseas Filipino workers (OFW) nga dili maka-apas sa deadline nga gitakda sa BSP, giingong mahimo silang magpa-register online sugod sa Oktubre 1, 2016 hangtud Disyembre 31, 2016 aron maalisdan ang ilang mga daang salapi.
Samtang gitumbok usab ni Hazel Arante, Bank Officer sa BSP ang kalahian sa new design series (NDS) sa new generation currency (NGC), nga mas lapad ang security thread sa bag-ong salaping papel o ang NGC ug nagkadaku ang serial number niini kun itandi sa daang salapi nga pareho ug mao pa gihapon ang mga bayani apan mas gipabata ang mga hitsura nila kun itandi sa daan. (ecb/PIA7-Bohol)
