TAGBILARAN CITY, Bohol, May 28 (PIA)–Misaka ang Overall Business Confidence Index sa Pilipinas matud pa sa Bangko Sentral ng Pilipinas (BSP).
Gikan sa 40.5-percent niadtong tuig 2011, misaka sa 44.5-percent ang confidence index sa nasud karong second quarter sa 2012.
Matud pa sa BSP nga mikita sa milabay nga mga buwan ang construction industry ug service-oriented establishment.
Ang pagsaka sa business confidence index ang giingong magpadali sa economic expansion sa nasud. Padayon usab ang pagdaghan og order ug pag-abli og bag-ong kontrata nga mo-resulta sa pagdaghan sa produksyon sa Pilipinas ug trabaho alang sa mga Pilipino.
Dugang pa sa BSP, nakatabang sa pagsaka sa business confidence index ang ubos nga interest rate ug pagdaghan sa remittances gikan sa mga overseas Filipino worker (OFW).
Apan nipasidaan usab ang ahensya nga mahimong mo-ubos ang confidence index sa third quarter ning tuig tungod sa maulan nga panahon nga makaapekto sa retail ug wholesale business. (PIA-Bohol/ecb)
Brady, bag-ong envoy sa China
TAGBILARAN CITY, Bohol, May 28 (PIA)–Gibalik ni Presidente Benigno “Noynoy” Aquino III isip ambassador sa Pilipinas sa China si Sonia Brady hulip ni Domingo Lee nga wala nakalusot sa Commission on Appointments (CA).
Kanhi nang nangatungdanan isip ambassador to China si Brady niadtong panahon ni kanhi Presidente Gloria Macapagal Arroyo.
Matud pa ni Presidential Spokesperson Abigail nga si Brady nangatungdanan isip ambassador to China sukad 2006 hangtud 2010.
Gawas sa China, gihatagan usab og concurrent jurisdiction sa Malacañang si Brady sa People’s Republic of Korea ug Mongolia.
Usa ka beteranong career diplomat si Brady ug dili na bag-o kaniya kining maong trabaho.
Nangatungdanan usab kini isip tinugyanan sa Pilipinas sa Thailand niadtong 2002-2003; Myanmar niadtong 1995-1999 ug deputy of chief of mission to Indonesia niadtong 1994-1995 ug uban pang foreign designations. (PIA-Bohol/ecb)
