Jala mipalig-on sa iyang mga lideres sa ikaduhang distrito

by boholbalita | Mar 9, 2010 | Election 2010, Local News / Bohol Balita

SI vice gubernatorial candidate, Dr. Elpidio Jala sa Liberal Party mipalig-on na sa iyang mga lideres didto sa ikaduhang distrito sa Bohol alang sa iyang preparasyon sa nagsingabot nga piniliay karong Mayo 10, 2010.

Ang kanhi Dep Ed Superintendent nga si Jala nibutyag nga iyang giuna sa pagpahimutang og mga lider sa nagkalain-laing mga barangay sa kalungsuran sa maong distrito gumikan sa gilay-on niini.

Matud ni Jala nga duna nay mga magtutudlo, mga kooperatiba, mga mag-uuma, mangingisda ug grupo sa mga sa non-governmental organization, religious organzations ang iyang giduol diin nagpakita og interes sa pagpaluyo sa iyang kandidatura.

Samtang gilauman usab niya nga ang mga lider sa iyang igsuon nga si kanhi Kongresista Eladio “Boy” Jala sa ikatulong distrito mopaluyo sa iyang tinguha.

Gibutyag usab ni Jala nga adunay 14 ka mga kandidato sa pagkamayor ubos sa partidong Liberal.

Samtang sa dakbayan sa Tagbilaran, gilauman usab si Jala nga paluyohan siya sa mga lider ni Mayor Dan Lim gumikan sa iyang pagserbisyo sa siyudad isip Dep Ed Supt.

Dugang ni Jala nga masaligon siya nga dalhon siya mga tawo ni Mayor Lim.

Si Jala kinsa maoy nag-una sa gihimong survey sa Bohol Balita, nag-una usab sa gihimong survey sa University of Bohol Research Center sa dakbayan diin nagsunod kaniya si kanhi provincial administrator, Atty. Tomas Abapo ug ikatulo lamang si ABC pres. Conching Lim. (Andy Nalzaro)

Montano wala motumaw sa rally nila ni Erap ug Binay bisan og iendorso sa PMP

by boholbalita | Mar 6, 2010 | Election 2010, Local News / Bohol Balita

SI gubernatorial candidate Cesar “Buboy Montano sa partido Liberal wala motumaw sa gihimong rally sa ticket ni kanhi Presidente Joseph ‘Erap” Estrada kagabii.

Ang premyadong aktor ug direktor namahayag sa pakighinabi sa dyRD kagahapon nga dili gayud siya mopatim-aw sa maong kalihukan bisan og ituboy siya ni Estrada isip guest candidate sa Puwersa ng Masa ng Pilipino kun PMP.

Matud ni Montano nga dako gayud ang iyang pagpasalamat ug dungog nga iendorso ni Estrada isip guest candidate apan dili gayud siya motambong niini gumikan kay nagbaton siya og delikadeza isip siya maoy chairman sa partido nila ni presidential candidate, Senador Noynoy Aquino III ug vice presdidential candidate, Sen. Mar Roxas.

Gipanghimakak usab ni Montano ang ningguwa nga taho nga moambak siya sa PMP gumikan kay nagpabiling lig-on ang LP sa lalawigan sa Bohol. (Andy Nalzaro)

Gikalipay sa partido ang paglutaw na gyud sa mga traydor sa Lakas

by boholbalita | Mar 6, 2010 | Election 2010, Local News / Bohol Balita

NAGPASALAMAT ang kadagkuan sa Lakas-Kampi-CMD sa Bohol kay nilutaw na kon kinsay mga traydor sa partido.

Ang mga lider sa nagbudhi nga grupo nasakpan sa kaugalingon nilang manifesto nga pinirmahan. Ilang gustong ipintal nga huyang ang Lakas dinhi karon gumikan sa kasina nga ang bag-ong liderato niini mas girespetohan ug gisaligan sa nasudnong kadagkuan sa partido.

Hinuon wa nipirma ang gitoohang mao mismoy utok ug nagsuwat sa manifesto nga klarong nagpabor kaniya apan nihisgot lang og ubang isyu aron kunohay di hilas, sumala sa mga ulo sa Lakas sa kalungsoran.

Matud ni Kong. Edgar Chatto, provincial chairman sa partido, niabot na ang higayon nga kadto mismong nagpatoong Lakas og kasingkasing maoy niabli sa kaugalingong dughan nga nagpitik para sa kontra nga partido.

Ang manifesto nga gibayran aron mapatik sa usa ka pamantalaan gipirmahan sa pipila ka mga sakop sa Lakas nga dugay nang napanid-an—ug karon namatud-an—nga nagduwa-duwa para sa kandidato sa pagkapresidente sa NP.

Aron lehitimo kunohay ang ilang mga lakang, ilang giakusar ang mga matinud-anong lider ug sakop sa Lakas imbes sila mismo maoy nidunggab sa atubang sa partido.

Usa sa gigamit sa utok sa grupo si Roberto Salinas, lima pa lang ka tuig nga mayor sa Catigbian, kinsa gisulsolan nga molansar sa pagkakongresista sa Unang Distrito apan wa duphi sa mga nagdudho kaniya aron mahimong opisyal nga kandidato sa Lakas.

Gibasul si Chatto ug kaubanan sa kapakyas ni Salinas pagkuha og Certificate of Official Nomination and Acceptance (CONA) sa Lakas inay ang nagtukmod kaniya maoy dakdakan sa kapungot ug kahiubos.

Sa sinugdanan, buot ni Salinas nga magpabiling mayor hangtud nga kalit lang siyang gipalutaw nga intreseddo sa pagkakongresista.

Si Chatto wa mismo konsultaha sa gihimo sa ubang taga-Lakas para kang Salinas bisag siya maoy party chairman sa partido sa Unang Distrito niadtong higayona.

Nikumpisal mismo si Salinas kang Chatto nga giduol siya sa usa ka representante sa NP, usa ka mayor sa Lakas nga daw tigpamaba sa NP, ug usa na gyud mismo ka taas nga opisyal sa probinsiya, kinsa niingon kang Salinas nga palansaron sa pagkakongresista.

Matinud-anong gitambagan ni Chatto si Salinas niadtong tungora nga magbinantayon ug di magdali-dali kay sa samang panahon giduso ang negosasyon tali kang Chatto ug Bise Gob. Julius Caesar Herrera, kinsa mao untay giduso nga magkongresista samtang si Chatto ang maggobernador.

Nahitabo ang sabot-sabot sa national Lakas ug LDP alang sa posibleng case-to-case nga koalisyon ug usa sa mga gihisgotan ang pagbutang og komon nga kandidato sa pagkakongresista sa Unang Distrito, kinsa mao karon si kanhi Gob. Rene Relampagos nunot sa kauyonang nahimo.

Si Salinas gidudho-an nga magsigeg suroy sa kalungsoran para sa pagkakongresista bisan pa sa tambag kaniya ni Chatto.

Sumala sa ilang manifesto, usa ka bakak ang pangangkon nga ang kandidatura ni Relampagos nunot sa koalisyon wa niagi og konsultasyon. Apan may panghitabo nga momatuod nga si Salinas maoy wa pangusgi sa iya mismong mga kakunsabo.

Sa tigum sa partido sa La Roca Hotel sa syudad sa Tagbilaran sa niaging Nobiyembre, lanog nga giindorso mismo ni Aumentado si Relampagos isip maoy kandidato sa pagkakongresista nunot sa koalisyon.

Apan gikatingad-an nganong di si Aumentado ug mga kakunsabo ang giatake ni Salinas nga Hudas ug tigpakaaron-ingnon.

Giplano nang daan nila ni Aumentado nga si Herrera maoy iplastar sa NP para ni Villar samtang si Aumentado magpabilin kunohay sa Lakas ug sabotahe-on ang kaugalingong partido para sa kontra ni administration presidential candidate Gibo Teodoro, sumala sa mga tinubdan sa partido.

Ang mga nipirma sa manifesto nga nagsabotahe sa liderato sa Lakas sa Bohol karon ubos kang Chatto dugay rang mga pro-Villar ug pro-Herrera gumikan ni Aumentado.

Ang manifesto mas klarong nag-isplikar aron di si Aumentado mabulgar nga apil o utok mismo sa pagtraydor ginamit lang ang nahitabo ni Salinas ug ubang mayor sa Segundo Distrito kinsa gipanggamit gihapon ni Aumentado ug Herrera para lang kanila ug ni Villar, matud sa kadagkuan sa Lakas.

Girebukar sa nasudnong partido ang CONA ni Aumentado gumikan mismo sa mga intelligence report ug monitoring sa partido nga nagbutyag sa grabeng pagduwa-duwa para sa kandidato sa NP ug di ni Gibo Teodoro sa Lakas.

Matud sa taga-Lakas, dili ingon ka hanggaw ang nasudnong partido nga morebukar sa CONA ni Aumentado sa way bug-at nga hinungdan kay ang gobernador mao guy numero unong sakop sa Lakas sa Bohol ug party chairman pa gyud sa rehiyon.

Nakaingon pud kini sa pag-isyo sa nasudnong partido og CONA ni Trinidad Mayor Judith Cajes sa pagkakongresista sa Segundo Distrito.

Sa mga survey sa radyo sa Tagbilaran kabahin ning maong isyu, si Aumentado wa kakuha sa kumpiyansa sa mga Bol-anon. Daghan ang niingon nga napa-ig siya sa kaugalingong duwa sa kayo.

Ang laing lipat-lipat sa grupo mao ang pasangil nga nagbudhi sa partido si Kong. Roberto Cajes kay iyang gipakontrahan ang pipila ka mga Lakas nga mayor sa Segundo Distrito.

Apan nahibawo na ang kadaghanan nga ang maong mga mayor kauban ni Aumentado para ni Villar. Gani ang grupo nihural kang Villar kaniadto.

Giplastar daan ang mga kandidato sa Lakas sa kalungsoran, ilabi na sa Segundo Distrito ni Aumentado, para ni Villar sa wa pa niya itunol kang Chatto ang pagka-provincial chairman sa partido. Kini gihimo ni Aumentado tulo na lang ka adlaw sa wa pa ang deadline sa pag-file sa mga sertipiko de kandidatura.

Nahimong way tingog si Chatto sa pagpili sa mga kandidato sa Lakas gawas sa Unang Distrito gumikan sa gibuhat ni Aumentado bisag si Chatto maoy ilhon nga provincial party chairman isip maoy kandidato sa pagkagobernador. (Ven rebo Arigo)

Noynoy ug Mar gihangop sa iyang mga dumadapig – mobalik sa dakong rally inigsugod sa kampanya sa lokal karong Marso 26

by boholbalita | Mar 6, 2010 | Election 2010, Local News / Bohol Balita

Madasigon nga gisugat sa katawhang Bol-anon kagahapon sila si presidentiable Senador Simeon Benigno “Noynoy” Aquino III ug vice-presidentiable Senador Mar Roxas II atol sa ilang hamubong pagduaw sa duha ka mga lokal nga mga istasyon sa radyo sa dakbayan sa Tagbilaran kagahapon.

Kuyog nila Aquino ug Roxas sa partidong Liberal mao sila si gubernatorial candidate, Cesar “Buboy” Montano, kanhi Dep Ed Supt., Dr. Elpidio Jala kinsa nilansad sa pagka-bise gobernador ug Konsehal Edgar Kapirig nga modagan sa pagka-kongresista sa unang distrito sa Bohol.

Si Aquino ug Roxas dihang nahinabi sa mga tigbalita nibutyag nga ilang gikalipay og dako nga daghan sila og mga dumadapig kinsa naghulat kanila sa gawas sa sibyaanan sa dyTR diin nakahimo kini og dyutay nga trapik sa dalang J. Borja.

Pagkahuman sa ilang pagbisita sa duha ka estasyon, nideretso sa provincial headquarter sa LP didto sa dalan C.P.G. North Avenue atbang sa governor’s mansion.

Gibutyag ni Aquino nga mobalik sila ni Roxas inigsugod na sa kampanya sa lokal karong Marso 26 diin dunay dakong pagahimuon rally sa siyudad ug gieskedyol pa ang maong dakong kalihukan.

Si Aquino ug Roxas niabot sa siyudad mga alas 2 sa hapon sakay sa usa ka pribadong abyon ug nigikan mga alas 4 sa hapon paingon sa dakbayan sa Dumaguete alang sa dakong rally sa gabii. (Andy Nalzaro with reports from Edward Guyano)