by admin | Aug 19, 2016 | Headlines, Local News / Bohol Balita, Major Events
TAGBILARAN CITY, August 19 (PIA)–Gipagawas na sa Malakanyang ang mga regular ug special non-working day alang sa tuig 2017.
Base sa Proclamation Number 50 nga gilagdaan ni Presidente Rodrigo Duterte, regular holiday ang New Year’s Day o Enero 1 nga natunong sa adlaw nga Domingo; Araw ng Kagitingan – Abril 9, natunong usab sa adlaw nga Domingo; Huwebes ug Biyernes Santo – Abril 13 ug Abril 14; Labor Day sa Mayo 1 nga natunong sa adlaw nga Lunes.
Nalakip usab sa regular holiday sa sunod tuig ang Hunyo 12 o Independence Day (Lunes); Agosto 28, National Heroes Day (Lunes); Nobyembre 30-Bonifacio Day (Huwebes); Disyembre 25 o Christmas Day (Lunes); ug Disyembre 30-Rizal Day (Sabado).
Samtang ang mga special holiday sa 2017 mao ang: Chinese New Year sa Enero 28 (Sabado); EDSA People Power Revolution Anniversary sa Pebrero 25 (Sabado); Black Saturday-Abril 15; Ninoy Aquino Day-Agosto 21 (Lunes); All Saints Day-Nobyembre 1 (Miyerkules) mao nga gi-deklarar na usab sa Malakanyang ang Oktubre 31 (Martes) isip dugang special holiday samtang ang Disyembre 31, katapusang adlaw sa tuig (Domingo).
Nakalatid usab sa Proclamation Number 50 nga ang pagdeklarar sa Eidul Fitr ug Eidul Adha mag-agad sa eksaktong petsa base sa Islamic calendar. (ecb/PIA7-Bohol)
by admin | Aug 19, 2016 | Headlines, Major Events, National News
MANILA, August 19 (PIA)–Nilambo pa ang ekonomiya sa Pilipinas og 7 porsiyento sa ikaduhang kwarter sa tuig 2016.
Kini na ang pinakapaspas nga paglambo nga natala sulod sa kapin duha ka tuig matud pa sa Philippine Statistics Authority (PSA).
Matud pa ni National Economic and Development Authority(NEDA) Director General Ernesto Pernia, ang 7% growth rate sa gross domestic product (GDP) sa nasod alang sa ikaduhang kwarter maayong pagsugod alang sa administrasyon ni Presidente Rodrigo Duterte.
Giingong nahisulod usab kini sa target nga 6 ngadto sa 7 percent growth rate sa gobyerno karong tuig.
Matud pa ni Pernia, daku ang natampo sa lig-on nga ekonomiya nga gibilin sa niaging administrasyon.
Apan taliwala niini, giangkon ni Pernia nga magsilbing hagit pa gihapon sa administrasyon ang taas nga poverty rate.
Target sa economic managers ni Presidente Duterte nga gikan sa kasamtangang 25%, mapaubos ngadto sa 16% na lamang ang poverty incidence sa tuig 2022. (ecb/PIA7-Bohol)
by admin | Aug 19, 2016 | Headlines, National News
MANILA, August 19 (PIA)–Naa na sa kapin 600,000 ka mga drug pushers ug users ang nitahan sa mga otoridad pila ka buwan human milingkod sa pwesto si Presidente Rodrigo Duterte.
Human sa paghingan sa mga giingong drug lord ug illegal drug protectors sa gobyerno, may pipila ka gidudahang drug lords ug opisyal sa mga lokal nga kagamhanan ang nitahan na usab.
Nalakip na niini ang giingong No. 2 drug lord sa Central Visayas nga si Franz Sabalones.
Ning bag-o lamang, miingon si Philippine National Police (PNP) Chief Ronald dela Rosa nga nikunhod na og 49 porsiyento ang crime rate sa nasod nga pagmatuod lamang nga drug-related ang kadaghanan sa mga krimen nga nahitabo sa nasod.
Matud pa ni Presidential Communications Office (PCO) Kalihim Martin Andanar, pagmatuod lamang kini nga malampuson ang kampanya sa administrasyon batok sa ilegal nga droga.
Samtang sa isyu sa pagsaway sa pipila ka sektor tungod sa daghang napatay ug giingong nadakpan nga walay due process, gitataw ni Andanar nga gisunod sa gobyerno ang proseso sa pag-aresto ug paggukod sa mga gitohuang nalambigit sa ilegal nga droga. (ecb/PIA7-Bohol)
by admin | Aug 18, 2016 | Headlines, Local News / Bohol Balita
TAGBILARAN CITY, August 18 (PIA)–Exempted na ang mga balikbayang overseas Filipino workers (OFWs) sa pagkuha og oversees employment certificate (OEC) requirement.
Kini human nadesisyonan sa Governing Board sa Philippine Overseas Employment Administration (POEA) nga i-exempt ang mga OFWs sa pagkuha sa maong sertipikasyon.
Ubos sa GB Resolution No. 12, series of 2016, ang mga OFWs nga mobalik sa kanhing employer niini ug jobsite, exempted na sa overseas employment certificate (OEC) requirement.
Giingong sa panahon sa peak seasons sama sa Christmas holidays ug school graduations, mokabat hangtud 7,000 matag adlaw ang hangyo sa mga OFWs alang sa OEC.
Gawas niini, exempted na usab sa pagbayad og travel tax ug terminal fees ang mga OFWs nga nagparehistro sa Balik-Manggagawa Online pinaagi sa pagpakita lamang sa ilang work visa, work permit, valid contract, o kapareho nga dokumento sama sa Tourism Infrastructure and Enterprise Zone Authority (TIEZA) ug ang Manila International Airport Authority (MIAA). (ecb/PIA7-Bohol)
by admin | Aug 18, 2016 | Headlines, Major Events, National News
TAGBILARAN CITY, August 18 (PIA)–Mahimong libre na ang tambal nga ihatag sa mga nabiktima og stroke o ‘brain attack’.
Dungan sa pagsaulog sa Brain Attack Week, gi-anunsiyo sa Department of Health (DOH) nga dili na pasagdan ang mga pasyenteng na stroke tungod kay ang tambal nga Alteplase o tissue plasminogen activator libre nang ipanghatag sa 26 ka pampublikong tambalanan sa tibuok nasod.
Matud pa ni Dr. Eric Tayag, tigpamaba sa DOH nga ang stroke ang ikaduha sa pinaka ‘common’ nga ‘cause of death’ sa nasod.
Giingong pinaagi niining tambal, mas mosaka ang tsansa nga maluwas sa kamatayon o di kaha ang pagkabaldado sa usa ka biktima sa stroke kun mahatagan kini sulod sa 3 ka oras.
Apil sa mga ospital nga may libreng Alteplase mao ang East Avenue Medical Center, Philippine Heart Center, Jose R. Reyes Memorial Medical Center, National Kidney and Transplant Institute, Quirino Memorial Medical Center, Las Piñas General Hospital and Satellite Trauma Center, Philippine General Hospital, Ilocos Training and Regional Medical Center, Mariano Marcos Memorial Medical Center, Cagayan Valley Medical Center.
Southern Isabela General Hospital, Jose B. Lingad Memorial Regional Hospital, Paulino, J. Garcia Memorial Research and Medical Center, Batangas Medical Center, Bicol Regional Training and Teaching Hospital, Bicol, Medical Center, Gov. Celestino Gallares Memorial Hospital, Corazon Locsin Montelibano Memorial Regional Hospital.
Western Visayas Medical Center, Eastern Visayas Regional Medical Center, Zamboanga City Medical Center, Cotabato Regional and Medical Center, Northern Mindanao Medical Center, Mayor Hilarion A. Ramiro Sr. Regional and Teaching Hospital at Southern Philippines Medical Center.
Kining mga tambalanan adunay mga acute stroke units nga mahimong motubag sa mga nabiktima og stroke.
Nakig-alayon na usab ang DOH sa mga pribadong ospital aron mahimong libre na usab sa maong mga tambalanan ang maong tambal sa stroke. (ecb/PIA7-Bohol)
by admin | Aug 18, 2016 | Headlines, National News
MANILA, August 18 (PIA)–Sugod niadtong Agosto 15, nagpagawas na ang Department of Foreign Affairs (DFA) og bag-ong high-security passport.
Matud pa ni Presidential Communications Office (PCO) Kalihim Martin Andanar nga mao usab ang nagdala sa Apo Printing Office nga nag-imprinta sa mga passport, nahisulod sa maong bag-ong pasaporte ang disenyo sa nagkalain-laing rehiyon sa nasod.
Nakabutang usab sa bag-ong passport ang intaglio printing nga gigamit sa paghimo og salapi ug coat of arms diin makita ang nagkalain-laing kolor sa nagkalain-laing anggulo.
May nakabutang usab nga dugang feature sa passport sama sa microchip nga adunay personal data sa applicant, invisible UV fluorescent ink ug thread.
Mas gipaspasan na usab ang proseso sa pag-imprenta sa maong mga pasaporte og hangtud sa 35 porsiyento.
Kini nagpasabot nga gikan sa kanhi 7 hangtud 14 ka adlaw, mahimo nang i-deliver ang passports gikan sa printing press paingon sa DFA sulod sa lima ka adlaw na lamang.
“The new APO printing system increases the production speed of the new passports to 35%. This means the new passport printing system results to delivery of passports from press to the Department of Foreign Affairs (DFA) to an average of 5 days compared to 7-14 days previously,” matud pa ni Andanar. (ecb/PIA7-Bohol)
