by aimee | May 10, 2013 | Headlines, Health and Medicine
TAGBILARAN CITY, Bohol, May 10 (PIA)–Gimando karon ni Health Secretary Enrique T. Ona sa Department of Health (DOH) nga ibutang ang tanang regional health offices ug mga ospital sa tibuok nasud sa Code White alert sugod Domingo, Mayo 12 aron ma-monitor ang mga mahitabo sa ilang mga lugar kalabot sa nagsingabot nga piniliay sa Lunes, Mayo 13.
“In anticipation of any eventualities that may occur during the 2013 National Elections the Code White Alert is raised in all DOH regional offices and hospitals effective May 12, Sunday,” matud pa ni Ona sa usa ka pahayag.
Tungod niini, gi-aghat ang tanang regional directors niining mga health facilities nga magbinantayon ug magpadala dayon og flash reports sa mga insidente nga kinahanglang itaho sa DOH-Health Emergency Management Staff’s Operations Center (OpCen) sa mga numerong 711-1001 ug 711-1002.
Gidugang pa sa kalihim nga mohimo og aktibong monitoring ang DOH-HEMS OpCen sa tanang health emergencies sa tibuok nasud ug makig-alayon sa mga hingtungdang ahensya sa gobyerno nga moresponde sa sitwasyon. Giingong andam usab silang mohatag og material ug logistical support sa mga regional health offices ug mga tambalanan nga manginahanglan nila.
Ang Code White Alert ginabutang sa mga nasudnong kalihokan sama sa 2013 National Elections aron malikayan ang panghitabo nga daghang kinabuhi ang makalas sa piniliay. Nagpasabot usab kini nga ang mga emergency medicines fully stocked na ug nakabutang sa mga emergency room.
Ubos sa Code White Alert, ang mga tambal ug supplies sa mga operating rooms gipa-ubos na sa review ug dugangan kun gikinahanglan. Kinahanglang andam na kini uban sa uban pang gikinahanlan sama sa X-ray plates, laboratory requirements ug uban pa nga dili na kinahanglan pang papaliton ang mga biktima.
Gipa-andam usab ang mga regional offices sa posibleng pagtabang kun may kinahanglang evacuation nga mahitabo sa ilang lugar. (PIA-Bohol/ecb/i-gg)
by aimee | May 9, 2013 | Headlines
TAGBILARAN CITY, Bohol, May 08 (PIA)–Mismong si Presidente Benigno “Noynoy” Aquino III ang miingon nga walay angay ikabalaka sa supply sa kuryente ilabi na sa mismong adlaw sa piniliay sa Mayo 13.
Kini human sa nasinating halapad nga brownout sa Luzon kagahapon nga niresulta sa kabalaka sa katawhan.
May mga nagpagawas usab nga tabi-tabi nga giingong anggulong ‘dry run’ ang brownout sa no-election sa Lunes.
Apan giseguro ni Presidente Aquino nga igo ang supply sa kuryente ug dili na mahitabo pa og balik ang nahitabong perwisyo kagahapon.
Matud pa sa Presidente, nipahigayon na og imbentaryo ang Department of Energy (DoE) sa mga planta ug transmission lines aron matino ang kapasidad sa koryente sa mosunod nga mga adlaw.
Giseguro sa Presidente nga hanap ug dili mahitabo ang gikahadlokang no-el scenario tungod siya mismo walay interes nga i-oktaba ang piniliay.
Gitumbok pa niya nga all-set na sila sa eleksyon ug andam na ang preparasyon sa mga ahensya sa gobyerno ilabi na sa seguridad sa piniliay. (PIA-Bohol/ecb/i-gg)
Source code sa PCOS, selyado ug gi-deposito na sa BSP
TAGBILARAN CITY, Bohol, May 08 (PIA)–Gi-prisintar na sa Commission on Elections (Comelec) ang source code sa mga PCOS machines nga gamiton karong 2013 automated midterm elections.
Atubangan sa mga opisyal sa Comelec, Smartmatic, media ug uban pang interesadong partido, gihatag ni Michael Santos sa Systest Labs Inc. (SLI) Global Solutions ang disc diin nahisulod ang source code nga gikan sa Dominion Voting Systems.
Ang SLI ang independent party nga unom ka buwang nisusi sa source code agig pagsunod sa balaod.
Kahinomdoman nga nadamay ang source code nga gamiton sa piniliay sa Pilipinas sa away sa Smartmatic ug Dominion kalabot sa kontrata nga naule pa sa pagpasaka og kaso sa Estados Unidos.
Human magkauyon ang Smartmatic ug Dominion, nadawat na gyud sa Comelec ang source code nga maoy instruction nga mabasa kun unsaon pag-operate ang PCOS machines partikular na sa pag-ihap, canvassing ug pag-transmit sa mga boto.
Gikopya kini dayon sa computer sa Comelec aron daling ma-access ug masusi sa mga political parties.
Gikan sa Comelec, gidala ang source code sa Bangko Sentral ng Pilipinas (BSP). (PIA-Bohol/ecb/i-gg)
by aimee | May 8, 2013 | Headlines, National News
TAGBILARAN CITY, Bohol, May 08 (PIA)–Nipagawas karon og temporary restraining order (TRO) ang Supreme Court (SC) batok sa pagpatuman sa gi-uswag nga liquor ban nga magsugod unta ugmang adlawa.
Sa press briefing ganina, gi-anunsyo ni Atty. Theodore Te, pangulo sa Public Information Office sa SC nga gi-paboran sa mga mahistrado ang petisyon sa Food and Beverage Inc. ug International Wines and Spirits Association nga pugngan ang Commision on Elections (Comelec) sa pagpatuman sa gi-uswag nga liquor ban.
“The courts resolves to issue a TRO effective immediately enjoining respondent Comelec from implementing liquor ban,” matud pa ni Te.
Magsugod unta ugma, Mayo 9 ang extended liquor ban ug molanat hangtud sa Lunes, Mayo 13, adlaw sa piniliay.
Apan tungod sa TRO, ipatuman ang liquor ban sulod lamang sa duha ka adlaw — sa Mayo 12 ug 13.
Gimanduan usab sa Korte Suprema ang Comelec nga mo-sumiter og komento sa petisyon sa dili pa mag alas 5:00 sa hapon ugmang adlawa. (PIA-Bohol/ecb/i-gg)
Comelec, nipasidaan nga arestohon ang BEI’s nga dili motunga sa piniliay
TAGBILARAN CITY, Bohol, May 09 (PIA)–Nipasidaan ang Commission on Elections (Comelec) nga arestuhon ang mga board of election inspector (BEI) nga dili motunga sa adlaw sa piniliay.
Matud pa ni Comelec Chairman Sixto Brillantes nga kun maaresto sila, dili na sila tugotan nga molingkod isip BEI ug hulipan sa mga police trainee nga una nang gibansay aron mosilbi isip BEI.
Kini human nakadungog og mga pasidaan ang Comelec chairman sa pipila ka municipal election officer nga dili motunga sa Mayo 13 tungod sa pagpanghulip og election officers.
Giingong partikular na sa Lanao del Sur diin 250 ka police trainees ang gibansay sa Comelec.
Gikatakdang mobisita sa Autonomous Region in Muslim Mindanao (ARMM) si Brillantes sa dili pa ang piniliay aron pulongon niya ang mga provincial election officer didto.
Gikonsiderar sa Comelec nga dakung lakang ang gihimong paghulip sa election officers sa Lanao del Sur ug Maguindanao diin didto kasagaran mahitabo ang failure of election ug postponement sa eleksyon. (PIA-Bohol/ecb/i-gg)
by aimee | May 7, 2013 | Headlines, National News
TAGBILARAN CITY, Bohol, May 07 (PIA)–Sa ikatulong higayon ning 2013, nakadawat og investment grade ang Pilipinas.
Gisaka sa Japan Credit Rating Agency Ltd. ang credit rating sa Pilipinas gikan BBB- ngadto sa BB+ “with a stable outlook.”
Sa pahayag nga gipagawas sa JCR karong adlawa, giingong gipaabot niining magpadayon ang 6% nga paglambo sa ekonomiya sa Pilipinas sa mga mosunod nga tuig.
Matud pa sa JCR, magpabiling suportado sa remittances gikan sa mga overseas Filipino workers (OFWs) apil na usab sa malambuong industriya sa business process outsourcing (BPO) ang ekonomiya sa Pilipinas.
Apan matud pa usab sa JCR, kinahanglang tutokan sa Pilipinas ang pagpalambo sa imprastraktura ug apil na usab ang investment ug business environment niini.
“The country needs to upgrade infrastructure and improve the investment and business environment to ensure rapid and sustainable economic growth, for which JCR expects to see commitment and initiative of the government.”
Usa ka semana pa lang ang nilabay, gisaka usab sa Standard & Poor ang credit rating sa nasud human usab sa unang investment grade nga gihatag sa Fitch Ratings niadtong Marso. (PIA-Bohol/ecb/i-ed)
Money ban, ipatuman sa Comelec sugod Mayo 8
TAGBILARAN CITY, Bohol, May 07 (PIA)–Sa labing unang higayon, ipatuman sa Commisison on Elections (Comelec) ang “money ban” aron mapugngan ang “vote buying” o pagpamalit og boto karong panahon sa piniliay.
Base sa Comelec Resolution 9688, gidili ang pag-withdraw og P100, 000.00 pataas sugod Mayo 8 hangtud Mayo 13, 2013 matag adlaw.
Apan wala nalakip niini ang tanang non-cash transactions.
Nahisulod usab sa maong resolusyon nga gidili ang pagdala ug pagpadala og salapi nga nagkantidad og P500, 000.00 o labaw pa sa susamang mga petsa.
“For this purpose, all cash being transported and carried exceeding such amount shall be presumed for the purpose of vote-buying and electoral fraud in violation of the money ban,” matud pa sa resolusyon.
Apan gi-angkon ni Comelec Commissioner Sixto Brillantes nga wala ni uyon niini ang Bangko Sentral ng Pilipinas (BSP).
Gipasabot ni Brillantes nga sa “cash basis” lang ipatuman ang resolusyon mao nga dili maapektuhan niini ang mga negosyo. (PIA-Bohol/ecb/i-gg)
by aimee | May 6, 2013 | Headlines, National News
TAGBILARAN CITY, Bohol, May 06 (PIA)–Gitahasan na sa Malakanyang ang Department of Foreign Affairs (DFA) nga susihon ang kahimtang sa tulo ka overseas Filipino workers (OFWs) nga gi-aresto sa Saudi police human mipahigayon og lihok-protesta sa gawas sa Philippine Embassy sa Riyadh.
Una niini, gitaho ni Philippine Ambassador to Saudi Arabia Ezzedin Tago nga gisikop sa mga otoridad ang tulo ka OFWs tungod sa pagsamok-samok.
Gitumbok sa opisyal nga giingong walay “justification” ang maong lakang sa mga OFWs ilabi na nga gihimo na sa gobyerno ang tanan aron mapadali ang ilang pagpaule sa nasud.
Base sa taho, giingong gibuhian ra dayon sa mga otoridad ang mga nasikop nga sila si Lyndon Salonga, Juan Carlos ug Jon Jon de Vera.
Gibutyag usab ni Tago nga mokabat na sa kapin 7,500 ka Filipino workers ang nagpatala sa ilang intension nga mopaule sa Pilipinas taliwala sa crackdown sa gobyerno sa Saudi batok sa mga overstaying ug undocumented foreign workers.
Matud pa ni presidential spokesperson Abegail Valte, susihon sa gobyerno ang kaso sa tulo, dungan sa pagsiguro sa tabang o assistance aron makapaule ang mga Pinoy nga gusto nang mopaule sa Pilipinas. (PIA-Bohol/ecb/i-gg)
DTI, nipasidaan batok sa solicitation scam karong eleksyon
TAGBILARAN CITY, Bohol, May 06 (PIA)–Nipasidaan ang Department of Trade and Industry (DTI) sa publiko batok sa business scam nga migamit sa mga pangalan nilang DTI Secretary Gregory Domingo ug Executive Secretary Paquito Ochoa.
Gihimo sa DTI ang pasidaan human makadawat na usab og reklamo gikan sa nagkalin-laing buhatan kalabot sa mga grupo ug indibidwal nga migamit sa pangalan sa maong mga opisyal sa gobyerno aron maka-solicit og kwarta.
Sa report nga nadawat ni Domingo, modus sa grupo nga aghaton ang target nga buhatan ug mangayo og pondo nga gamiton alang sa nasudnon ug lokal nga eleksyon sa Mayo 13.
Matud pa sa kalihim, hugot nga gidili sa DTI ang bisan unsang pag-solicit.
Nanawagan sila sa publiko nga i-report sa ilang buhatan sa DTI direct 751-3330 o mahimo usab susihon ang legitimacy sa promo pinaagi sa www.dtincr.ph ang ingon niining matang sa modus aron mahatagan dayon sa tukmang aksyon. (PIA-Bohol/ecb/p-gg)
by aimee | May 2, 2013 | Headlines, National News
TAGBILARAN CITY, Bohol, May 02 (PIA)–Gitahasan ni Presidente Benigno Aquino III si Bureau of Internal Revenue (BIR) Commissioner Kim Henares nga tun-an kun mahimong e-exempt sa tax ang mga mamumuo nga nagdawat og suholan nga labaw sa minimum wage.
Kini ang gimando ni Presidente Aquino kang Henares human makig-dayalogo sa mga lider sa labor organizations sa Malakanyang niadtong Martes.
Matud pa ni Presidential spokesperson Edwin Lacierda, usa sa nahimong suliran sa labor group nga bisan pasakaan og bisan piso ang ilang minimum wage, dili na sila exempted sa pagbayad og buwis.
“Ang isang concern po nila tulad nu’ng sa minimum wage. Ang minimum wage kasi tax exempt ‘yon e ‘pag nasa minimum wage. Kapag umakyat ng isang piso ‘yung sweldo n’yo, lumampas ka ng minimum wage, nata-tax siya. Naging concern po ‘yan ng ating labor sector,” pagbutyag ni Lacierda.
“So kunyari 456 ang sweldo n’yo, minimum wage, ‘pag naging 457, taxable na ‘yan. So ang concern ng mga labor sector, kung tumaas sila ng isang piso, may tama na kami sa tax whereas 456 ‘yan, tax exempt kami,” dugang pa sa tigpamaba sa Presidente.
Tungod niini, miingon si Lacierda nga gimanduan dayon ni Presidente Aquino si Henares nga sa higayong mahuman na niini ang iyang misyon batok sa mga tax evader, kinahanglang isunod dayon ang pagtuon kun unsaon mahimong exempted sa tax ang mga mamumuo nga nagdawat og labaw sa minimum wage. (PIA-Bohol/ecb/i-hd)
PH, nakadawat og ikaduhang investment grade rating
TAGBILARAN CITY, Bohol, May 02 (PIA)–Nakadawat na usab og investment grade rating ang Pilipinas sa ikaduhang higayon sulod ning tuiga.
Gikan sa BB+ nga may “positive outlook”, gipasaka sa Standard & Poor ang credit rating sa nasud sa BBB.
Matud pa ni Standard & Poor credit analyst Agost Bernard, ang upgrade nga gihatag sa Pilipinas tungod sa nagkakusog nga external profile sa nasud, wala kaayo paglihok sa presyo sa mga nag-unang panaliton ug nagka-ubos nga pagdepende sa gobyerno sa foreign currency debt.
Sa opisyal nga pahayag sa S&P, pareho niining gidayeg ang pagpadagan sa gobyerno sa milabay ug kasamtangang administrasyon.
“The current and previous administrations improved fiscal flexibility through restraining expenditures, reducing the share of foreign currency debt, deepening domestic capital markets, and more recently through modest revenue gains,” matud pa sa pahayag.
Giingon pang gipaabot nga magpadayon ang pagsulod og remittance gikan sa mga trabahanteng Pilipino sa gawas sa nasud ug paglambo sa industriya ug business process outsourcing (BPO).
Niadtong Marso lang, nadawat sa Pilipinas ang labing-unang investment grade gikan usab sa Fitch Ratings. (PIA-Bohol/ecb/i-ed)
