by boholbalita | Sep 14, 2010 | Headlines, Local News / Bohol Balita
PATAY ang usa construction worker human aksidenteng naigo sa kilat didto sa barangay Cogon Norte, Loon, Bhol niadtong Sabado lapas sa kaudtohon.
Ang biktima nga si Teofisto Simbajon alias Tata, 31, ulitawo, taga-barangay Poblacion, Maribojoc, Bohol nakaangkon og grabeng paso sa iyang lawas ug patay na dihang nadangat didto sa Congressman Natalio Castillo Memorial Hospital sa samang lungsod.
Sa taho nga nahipos sa kapulisan, nga samtang ang biktima kinsa usa ka trabahante sa Teo Hollow Block and Construction Supply nga gipanag-iyahan ni Jun Carlos Romea naglakaw paingon sa pansayan gumikan sa sugo sa lawas mga alas 12:45 sa hapon dihang paggawas niini kalit lamang nikilat gisundan sa makusog nga liti ug naigo ang maong biktima.
Si PO3 Eutiquio Pulmones, imbestigador sa Loon Police Station nibutyag sa Bohol Balita nga ang pansayan sa maong establisamento anaa sa gawas nga bahin mga 10 metros ang gilay-on.
“Nasunog ang iyang tibuok lawas ug nagbuwa ang baba sa biktima dihang napalgan sa iyang mga kauban, ” asoy pa ni Pulmones.
Matud ni Pulmones nga ang silingan nga shop nga naa sa ibabaw nga bahin maoy nakakita sa naasoy nga biktima nga nagkulob na ang posisyon niini ug wala kini mahibaw-i gilayon gumikan kay namahuway ang mga kaubang trabahante.
Dugang niya gisuwayan sa pagluwas ang biktima pinaagi sa paghatud kaniya sa maong tambalanan apan nabugtuon na sa iyang kinabuhi. (Andy Nalzaro)
by boholbalita | Sep 11, 2010 | Headlines, Local News / Bohol Balita
TAWONG namutol og mga punoan sa bakhaw nasakpan duol sa suba didto sa barangay Soom, Trinidad, Bohol niadtong nakalabay nga adlaw.
Suspetsado nailhan nga si Camilo Morgia, 51, minyo, taga-Purok 5 sa maong dapit.
Sa taho sa kapulisan nga samtang ang ginsakpan sa Trinidad Coastal Law Enforcement Team kun TCLET nga gipangoluhan ni Felix Tabigue uban nila ni Rolando Cañete ug Jose Gucon nagpahigayon og foot patrol duol sa suba sa maong lugar mga 1:30 sa kabuntagon niadtong Martes, ilang naabtan ug nasakpan sa akto ang suspetsado nga nikarga og pito ka bundle sa pinutol nga bakhaw nga gibana-banang moabot ngadto sa 350 ka buok ug dunay gitas-on nga 24 ka pulgada.
Matud sa taho nga gikarga sa maong suspek ang mga pinutol nga bakhaw sa iyang pumpboat nga puti nga may 9 HP Mitsubishi nga makina.
Nadiskobrehan usab sa maong tim ang biniyaan nga pinutol nga round timber sa bakhaw nga moabot ngadto sa 22 ka buok ug dunay gitas-on nga unom ka tiil ug upat ka bundles sa pinutol sa linghod nga bakhaw nga moabot ngadto sa 200 ka buok.
Ang suspetsado lakip na ang mga ebidensiya gitunol ngadto sa Trinidad Police Station alang sa dugang nga imbestigasyon ug pagpasaka og sumbong. (Andy Nalzaro)
by boholbalita | Sep 11, 2010 | Headlines, Local News / Bohol Balita
PADAYON pang gisusi sa kapulisan sa Loboc kun kinsa ang responsable sa pagpusil sa Rural Bank of Loboc niadtong nakalabay nga gabii.
Nasayran sa taho nga nahipos sa maong lungsod nga naigo ang roll-up door diin ang bala nilusot ngadto sa bildo nga pultahan.
Ang insidente nadiskobrehan pasado alas 7 sa buntag kagahapon.
Sigun sa pakisusi sa kapulisan nga dunay nagpaboto sa wala mailhing kalibre sa armas niadtong Martes sa gabii ug hangtud kagahapon, wala pay matumbok ang kapulisan kun kinsa ang naghimo niini. (Andy Nalzaro)
by boholbalita | Sep 11, 2010 | Headlines, Local News / Bohol Balita
139 na ka kaso sa Agosto, 3 patay
GIBASUL sa City Health Office kun CHO ang mga transient residents o kadtong taga-lungsod nga temporaryong nagpuyo sa dakbayan sa Tagbilaran nga maoy nakatampo sa pagsaka sa kaso sa nataptan og sakit nga dengue sa bulan sa Agosto.
Si City Health Officer, Dr. Alberto Jones nibutyag sa Bohol Balita nga dili mga Tagbilaranon ang ubang natakbuyan sa maong makamatay nga sakit nga aduna nay 139 ka kaso sa bulan sa Agosto ug tulo na ang namatay gikan sa Enero hangtud sa maong bulan.
Gipunting ni Jones nga ang mga estudyante kinsa nagsaka og mga boarding house nga mataptan sa maong sakit mogamit og adres sa siyudad kun ma-admit sa Gov. Celestino Gallares Memorial Regional Hospital.
Gitumbok usab ni Jones nga ang namuyo sa mga squatter area nga gikan sa mga kalungsuran nakatampo usab sa pagsaka sa talaan sa maong sakit kay mogamit usab sa adres sa siyudad.
Sa laing bahin, gibutyag ni Jones nga ang barangay Cogon nakatala og pinakadaghang kaso nga may 22 ka biktima sa bulan sa Agosto gisundan sa barangay Bool nga may 21 ug ikatulo ang barangay Dao nga dunay 17. Ang maong talaan naghatag na og alarma sa mga kagamhanang lokal human nabutang ang barangay Cogon sa usa ka nasyunal nga pamantalaan nga ikawalo nga barangay sa nasud nga dunay daghang nabiktima sa dengue.
Gumikan niini, gipahigayon ang fogging operation sa mga lugar sa barangay Cogon kagahapon nga naglakip sa Tamblot, Calceta, Lower Cogon ug tunghaan sa elementarya.
Matud ni Jones nga gawas sa fogging machine nga mopatay sa mga hamtong nga lamok nigamit usab sila og kemikal nga Abate aron ibutang sa stagnant kun nagpundo nga tubig aron mapatay ang waya-waya.
Nagpahigayon usab sila og information campaign sama sa 4″ o’ clock hapit nga mao ang paglimpiyo sa palibot pinaagi sa pagyabo sa mga pundo nga tubig.
Dugang niya nga nakapalit ang siyudad og fogging machine ug mga kemikals alang sa pagpakgang sa pagkuyanap sa maong makamatay nga virus sa lamok. (Andy Nalzaro)
by boholbalita | Sep 11, 2010 | Headlines, Local News / Bohol Balita
SI Senior Supt. Constantino Barot Jr. pormal nang nilingkod isip bag-ong officer-in-charge sa Bohol Provincial Police Office hulip kang outgoing director Senior Supt. Rodolfo Llorca atol sa turned-over ceremony didto sa Kampo Dagohoy kagahapon.
Si Senior Supt. Silvestre Primero, Deputy Regional Director for Administration maoy ni-officiate sa kalihukan kinsa gitambungan nila ni Gobernador Edgar M. Chatto, provincial administrator Alfonso Damalerio II, mga hepe sa kapulisan ug ubang opisyales sa lalawigan.
Atol sa iyang mensahe, iyang gisaad nga makigtambayayong ang kapulisan alang sa kalambuan sa probinsiya sa Bohol pinaagi paghatag og saktong seguridad sa katawhang Bol-anon.
Gipunting ni Barot ang bag-ong nahitabo nga hostage crisis didto sa Manila niadtong Agosto 23 diin nikalas og walo ka turista gikan sa Hongkong lakip na ang hostage taker nga niresulta sa pag-us-os sa tourist arrivals ug naapektuhan niini ang Bohol.
Matud niya nga iyang gihagit ang kapulisan nga mohatag unta kini og positibo nga pagtagad aron makabangon sa maong insidente.
Nagpasalamat si Barot sa mga taas nga opisyal sa PNP lakip na kang Chatto nga gihatagan siya og kahigayonan nga mahimong provincial director.
Si Barot kinsa lumad sa Negros Oriental kanhi nadestino sa United Nation Police heaquarters sa East Timor niadtong Abril 12, 2009-Abril 10, 2010 diin nibalik siya sa nasud ug nadestino sa Kampo Crame.
Nakadawat siya og daghang mga awards sa iyang pagserbisyo isip pulis.
Siya naminyo ngadto kang Nina Socorro G. Barot kinsa nga lumad didto sa lungsod sa Balilihan. (Andy Nalzaro)
by magnolia_eic | Sep 9, 2010 | Headlines, Local News / Bohol Balita
P8 bilyones nga gikaltas gikan sa National Food Authority (NFA) ang idungag sa programa alang sa cash subsidies sa kagamhanan pinaagi sa Department of Social Welfare and Development (DSWD), matud sa taho sa Philippine Daily Inquirer.
Ang P8B nga kanhi gigamit sa NFA alang sa subsidy sa pagpamalit og bugas karon deretso nga nga ihatag isip subsidiya sa bugas sa mga kabus, butyag ni Budget Secretary Florencio Abad subay sa gitaho.
Dugang ni Abad nga ang P8B nga gigamit sa subsidiya sa buhis sa pagpalit og humay sa gawas mahimo na nga tangtangon kay laraw sa kagamhanan nga ipapribado nga ang pagpamalit og bugas aron mapasayon ang gimbuhaton sa NFA.
Hinuon, dili pa piho kon ang P8B nga gihisgutan ni Abad mao ba ang kwarta nga ibayad sa NFA sa mga mag-uuma sa pagpalit sa humay o ang subsidy sa buhis alang sa NFA sa pagopalit niining bugas aron pun-on ang mga bodega niini pag-andam sa tingnihit. (PIABohol)
