by magnolia_eic | Sep 16, 2010 | Headlines, Local News / Bohol Balita
KON mahinayon, usa ka barko nga kahoy sa Espanya ang unang barkong modunggo sa bag-ong nahumang cruise port sa Catagbacan, lungsod sa Loon.
Kini human gibutyag si Gobernador Edgar Chatto sa ang laraw sa mga tigpasiugda sa “Dia del Galeon” sa pagtanda sa Bohol.
Ang Dia del Galeon, usa ka kasaulogan nga magpabalik-tan-aw sa galleon, nag-unang barkong giluwanan sa mga Espanyol sa ilang pag-anhi sa Kasubangan.
Gisugyot ang kasaulogan sa nasudnong kagamhanan agi ug paghandum sa makasaysayanong pagkatukod sa Manila-Acapulco Galeon Trade niadtng 1565.
Ang pamatigayon sa galeon nagbukas sa ganghaan sa Pilipinas ngadto sa tibuok kalibutan ug may usa ka aginan sa pagbayloay sa kultura, pamatigayon ug panag-inigsoonay.
Kahinumduman nga gideklara sa United Nations Educational, Scientific and Cultural Organizations (UNESCO) niadtong Hulyo 22 dinhi sa Bohol ang Dia del Galeon pinaagi ni Jakarta Director Huber Gaizjen.
Pinaagi sa dia del Galeon, may barkong galleon nga mosuroy sa Pilipinas aron pagpalapad sa pagsabot sa international nga patigayon ug sa pagbayloay sa kultura nga dala sa galleon, kapid-an na ka tuig ang milabay. (PIABohol)
by boholbalita | Sep 15, 2010 | Headlines, Local News / Bohol Balita
Krimen nahitabo sa gisak-an sa uyab sa biktima
GITABANGAN og lugos sa tulo ka wala mailhing lalaki ang usa ka maanyag nga 17-anyos nga dalaga sud sa usa ka boarding house sa iyang uyab didto sa barangay Tejero, Jagna, Bohol niadtong nakalabay nga Sabado sa buntag.
Biktima ilhon lamang sa ngalan nga si alias Venus, lumad sa lungsod sa Valencia.
Sigun sa pamahayag ni alias Venus sa kapulisan nga nahitabo ang insidente mga alas 8 sa buntag samtang ang biktima didto kini sa sak-anan sa iyang hinigugma dihang gibiyaan kini nga nag-inusara.
Matud sa biktima nga kalit lamang nga nisulod ang tulo ka wala mailhing lalaki agi sa pultahan sa kusina ug dihang nakasud na , gisirad-an sa unang suspetsado ang atubangan nga pultahan samtang ang ikaduhang suspetsado maoy nanarangka sa pultahan sa kusina ug ang ikatulo nga lalaki maoy nigunit sa iyang mga kamot ug gituok ug giguyod padung sa bungbong ug gitionan og mahait nga kuttsilyo sa iyang liog dayong hulga nga dili mosinggit.
Ang unang suspek niduol ngadto sa biktima ug gisuntok ang iyang kuto-kuto ug dihang naluya na, gidala sa tulo didto sa usa ka lawak ug gipahigda sa katre.
Sigun sa biktima nga gitabangan og hubo ang iyang mga sapot sa una ug ikaduhang suspek diin ang unang suspek maoy niuna sa paglugos kaniya samtang ang ikatulong suspek maoy naggunit sa iyang mga kamot nga gipataas ang posisyon niini ug ang ikaduhang suspek maoy nition sa kutsilyo ngadto sa iyang liog.
Pagkahuman sa unang suspek, nisunod ang ikaduhang suspek samtang ang ikatulong lalaki igo lamang nga nitan-aw sa linuog nga gibuhat sa duha ka kauban.
Human sa insidente, nanibat ang mga suspetsado agi sa pultahan didto sa kusina.
Padayon pang gisusi sa kapulisan sa Jagna ang maong krimen. (Andy Nalzaro)
by boholbalita | Sep 15, 2010 | Headlines, Local News / Bohol Balita
GISAKA sa duha ka wala mailhing lalaki ang usa ka balay ug gitulis ang tag-iya niini didto sa barangay Bool, dakbayan sa Tagbilaran, Lunes sa kaadlawon.
Biktima nailhan nga si Proseso Sarigumba, 44, minyo ug nagpuyo sa Dangoy Street sa maong dapit.
Sa taho sa kapulisan, nahibaw-an nga samtang nahinanok sa pagkatulog ang namuyo sa maong balay mga ala-una sa kabuntagon, duha ka wala mailhing lalaki, usa niini nagsul-ob og itom nga jacket ug nagtabon og dirty white nga sinina sa iyang nawong samtang ang usa nakaitom og sinina ug gitaptapan usab ang nawong nisud sa maong pinuy-anan.
Usa sa mga suspetsado nipukaw sa anak sa biktima nga si Jake Sarigumba, 16-anyos ug gihiktan ang mga kamot niini ug gisugo nga tuktokon ang pultahan sa lawak sa iyang amahan ug pukawon.
Dihang nigawas ang maong biktima, nideklara og tulis ang mga gikatahapan.
Nakuha gikan sa maong biktima ang mga alahas nga nagkantidad og P100,000 salaping cash nga moabot ngadto sa P30,000, usa ka video camera, usa ka Nokia 1202, usa ka Nokia N70, usa ka Nokia 5200, usa ka Motorella nga cellphone kolor pink, usa ka digital camera ug usa ka computer monitor.
Nisibat ang mga suspek sa wala mahibaw-i nga direksiyon samtang gisusi pa sa mga sakop sa theft and robbery section sa Tagbilaran City Police Station ang maong hitabo. (Andy Nalzaro)
by boholbalita | Sep 15, 2010 | Headlines, Local News / Bohol Balita
GIKUMPIRMAR kagahapon ni Kongresista Rene Relampagos sa unang distrito sa Bohol nga usa ka tim sa Department of Transportation and Communication kun DoTC gitahasan nga mosusi sa estado sa site sa Panglao Airport didto sa lungsod sa Panglao.
Matud ni Relampagos dihang nahinabi sa usa ka sibyaanan sa radyo nga atol sa committee meeting sa Committe on Transportation sa Kongreso nga gustong tan-awon sa DoTC tim ang kahimtang sa lugar diin ibutang ang maong tugpahanan.
Niingon si Relampagos nga gustong ma-evaluate sa maong tim ang Phase 1 sa maong airport project ug iyang gilauman nga magpadayon ang implementasyon sa maong proyekto ug pagailhon ni Presidente Noynoy Aquino.
Nagbutyag si Relampagos nga nagkinahanglan gayud ang Bohol og usa ka bag-ong airport gumikan kay nilambo na pag-ayo ang turismo, daghan na ang mobisita ug iyang nakita ang limitasyon sa Tagbilaran City Airport diin wala nay luna alang sa expansion niini.
“Huwaton pa ba nato nga dunay maaksidente, ” asoy pa ni Relampgaos sa maong pakighinabi.
Matud niya nga mohimo usab og project review ang maong tim kalabot sa pundo nga pagagamiton niini nga niabot na ngadto sa P7 bilyones.
Dugang ni Relampagos nga ipaneguro nila ni Gobernador Edgar Chatto nga nakigtambayayong kaniya nga mapadayon ang naasoy nga proyekto nga angayan nang pagasugdan alaang sa dugang nga kalabuan sa probinsyua sa Bohol. (Andy Nalzaro)
by boholbalita | Sep 14, 2010 | Headlines, Local News / Bohol Balita
Biktima namadlong sa suspek kinsa nag-wild sud sa videokehan.
BARANGAY Tanod nakuyapan human gihapak sa iyang ulo sa usa ka lalaki nga iyang gibadlong sud sa usa ka videokehan didto sa barangay Cagawasan, Inabanga, Bohol niadtong Biyernes sa gabii.
Biktima nailhan nga si Virgindito Vito, 37, minyo, nagpuyo sa maong dapit. Nakaangkon ang biktima og bun-og sa ulo ug gidala didto sa Francisco Dagohoy District Hospital sa barangay Cagayan samang lungsod.
Suspetsado nailhan nga usa ka Kakoy Bescocho, hamtong ang panuigon ug nagpuyo gihapon sa samang lugar.
Nasayran sa taho nga samtang ang suspetsado nga giingong nag-wild sud sa usa ka videokehan nga gipanagiyahan ni Tarcisia Garcia didto sa Sitio Sambawan sa maong baryo mga alas 11 sa gabii, gibadlong kini sa biktima apan gihapak hinuon sa usa ka kahoy.
Matud sa taho nga gumikan sa kakusog sa paghapak, natumba ang maong biktima sa yuta ug nakuyapan.
Nidagan ang suspetsado paingon sa ngitngit nga bahin sa naasoy nga lugar ug padayon pang gipangita sa kapulisan. (Andy Nalzaro)
by boholbalita | Sep 14, 2010 | Headlines, Local News / Bohol Balita
PATAY ang usa ka drayber sa motorsiklo samtang laing duha ang grabeng naangol human nagsungag ang duha ka motorsiklo didto sa nasudnong dalan sa barangay Bagumbayan, Loboc, Bohol niadtong Sabado sa alas 10:30 sa buntag.
Ang biktima nailhan nga si Angelito Bebero, 25, ulitawo kinsa giingong kolektor sa usa ka kompaniya sa lending ug taga-barangay Bayacabac, Maribojoc.
Nakaangkon ang biktima og grabeng angol sa iyang lawas ug sa ulo ug nabugtuan sa iyang kinabuhi pasado alas 5 sa hapon nianang adlawa didto sa Gov. Celestino Gallares Memorial Regional Hospital sa dakbayan sa Tagbilaran.
Samtang ang naangol nailhan nga sila si Ricardo Leopoldo, 49, minyo, drayber sa motorsiklo ug ang iyang backrider nga iyang asawa nga si Olimpia Leopoldo, 57, minyo, nagpuyo sa barangay Lagtangan, Sevilla, Bohol. Gidala ang maong magtiayon sa samang tambalanan.
Sa pakisusi sa kapulisan nga samtang ang magtiayong Leopoldo nagsakay sa usa ka Suzuki TS 100 nga motorsiklo kolor pula nga walay plaka ug walay rehistro nagdagan paingon sa Poblacion Loboc dihang pag-abot sa maong dapit, kalit lamang nibangga ang naghaguros nga Honda Wave 125 kolor itom nga dunay buak nga plaka 7-A 8248 ug gimanehoan ni Bebero kinsa nagdagan sa lahi nga direksiyon.
Matud sa taho nga pulos nangatuwad ang duha ka mga sakyanan ug nangalagpot ang mga sakay niini pipila ka metros sa nahitaboan.
Dugang sa taho nga pulos walay helmet nga gisul-ob ang naasoy nga mga biktima atol sa insidente. (Andy Nalzaro)
