by boholbalita | May 4, 2010 | Local News / Bohol Balita
Patay dihadiha dayon ang duha ka manginhasay og kinhason lakip na ang usa ka 15 anyos nga batang lalaki samtang naospital ang kauban nga dalagita human naigo sa liti didto sa baybayon sa Catagbacan Norte, Loon, Bohol niadtong Miyerkules sa hapon.
Ang mga biktima nailhan nga sila si Arcelita Palo, 46-anyos, minyo, ug Marlon Manlupig, 15 anyos pulos nagpuyo sa maong lugar. Samtang usa ka Meann Modreondo, 15-anyos naka angkon ug daghang paso sa iyang lawas ig gidala didto sa Ramiro Community Hospital sa dakbayan sa Tagbilaran.
Nasayran sa taho nga samtang ang mga biktima nanginhas ug tuway sa daplin sa baybayon sa maong dapit mga alas 4:30 sa hapon dihang nisipa ang makusog nga tingog sa liti ug nahurot sila ug kaigo. Matud sa taho nga wala damha sa mga biktima ang naasoy nga trahedya gumikan kay naatol man kini sa sa panahon nga ting-init. (Andy Nalzaro)
by boholbalita | Apr 28, 2010 | Local News / Bohol Balita
Namatay ang usa ka lalaki human nasobrahan sa ilimnong makahubog didto sa basketball court didto sa barangay Malinao East, Lila, Bohol niadtong Sabado.
Biktima nailhan nga si Teodomiro Raut, 48-anyos, minyo, ug nagpuyo sa maong lugar.
Nasayran sa taho nga sa wala pa ,ahitabo ang insidente, nakit-an ang biktima nga nakigtagay sa iyang mga higala gikan ala-una sa hapon niadtong Biyernes ug naabtan ang ilang panag inom hangtud alas 11:3- sa gabii.
Katapusang makit-an nga buhi ang maong biktima sa naasoy nga oras ug pagka-alas 5 sa buntag sa Sabado, naplagan ang patay’ng lawas niini nag buy-od na sa basketbol court sa maong dapit.
Sigun sa pakisusi sa municipal health officer, nga namatay ang maong biktima gumikan sa sobrang inom ug walay tinunto nga nagpaluyo sa kamatayon niini. (Andy Nalzaro)
by boholbalita | Apr 28, 2010 | Local News / Bohol Balita
Grabeng hingsamdan ang usa ka 33-anyos nga lalaki human gi dunggab sa usa ka ex-convict didto sa basketbolan sa barangay Langkis, Duero, Bohol niadtong Sabado sa gabii.
Naigo sa walang bahin sa iyang kuot-koto ang biktima nga si Andrin Pacarat, minyo, ug nagpuyo sa maong lugar. Gidala ang biktima didto sa Jagna District Hospital sa Lungsod sa Jagna apan gumikan sa kalisud sa iyang kahimtang, gibalhin sa Gov. Celestino Gallares Memorial Hospital sa Dakbayan sa Tagbilaran.
Suspetsado nailhan nga si Ambrosio Jamila alias Jerry, 44-anyos, ulitawo, ug nagpuyo sa maong lugar. Sigun sa pagik susi sa kapulisan samtang naglakaw ang maong suspek kinsa ubos sa impluwensya sa ilimnong makahubog dihang nag-abot sila sa biktima sa basketbol court mga alas 10:30 sa gabii, kalit niyang gidunggab ang naulahi.
Gidakop ang natumbok nga suspetsado sa kapulisan sa Duero human sa insidente. (Andy Nalzaro)
by boholbalita | Apr 28, 2010 | Local News / Bohol Balita
Gipusil-patay ang usa ka barangay kapitan sa wala mailhing mga mamumuno samtang natulog tapad sa iyang asawa ug duha ka mga anak didto sa ilang pinuy-anan sa barangay Abihid, Dimiao, Bohol niadtong Dominggo sa kaadlawon.
Ang biktima nailhan nga si Alexander Bascunas, 38-anyos, minyo. Naigo ang biktima sa walang bahin sa iyang likod ug gi deklarang patay sa dihang nadangat sa Dimiao Municipal Infirmary.
Nasayran sa taho nga samtang ang biktima nahinanok sa pagkatulog sud sa iyang kwarto uban sa iyang pamilya mga alas 4 sa kabuntagon dihang ang wala mailhing mga suspetsado nikatkat sa bintana gamit ka usa ka 2×6 nga tabla dayong tangtang sa usa ka bildo nga jalousie ug gipusil ang maong biktima.
Si PO2 Aniceto Lacierda sa Dimiao Police Station nibutyag sa Bohol Balita nga ilang gitan-aw nga pulitika ang usa sa mga hinungdan sa pagpusil.
Matud ni Lacierda nga niadtong nakalabay nga semana nagpahigayon ug usa ka rally ang pundok ni mayoralty candidateJimmy Balbon sa Nacionalista Party didto sa maong lugar ug giingon nga gilimitahan sa oras sa biktima ang nahisgutang kalihukan. “Dunay gikasungi ang biktima sa usa sa mga supporter ni Balbon,” asoy pa ni Lacierda.
by magnolia_eic | Apr 28, 2010 | Local News / Bohol Balita
Tubigon — Patay ang usa ka mag tiayon, ang asawa buntis, human ang motorsiklo nga ilang gisakyan aksidenteng nibangga sa usa ka de pasaheroang bus nga naka-parking sa karsada didto sa barangay Ilijan Norte, Tubigon, Bohol niadtong Dominggo sa gabii. Ang mga biktima nailhan nga sila Ryan Jumamil, 28 anyos, minyo ug ang buntis niyang asawa nga si Feliza Jumamil, 26-anyos, nagpuyo sa barangay Calunasan, Calape, Bohol. Naka angkon ang duha ug grabeng samad sa ulo ug ubang bahion sa ilang lawas ug gidiklarang patay na sa dihang nadangat sa Tubigon Community Hospital.
Nasayran sa taho nga samtang ang isa ka Titi Transport Bus nga may body number 258 ug plaka numero GVL-419 nga gipanag-iyahan ni Jesus Veloso, taga Catagbacan Sur, Loon, Bohol ug gimanehoan ni Tito Corbeta, 57-anyos, minyo ug nagpuyo sa samang dapit gikan sa Tubigon ug samtang nagparking ang maong sakyanan sa tuong bahin sa kalsada mga 6:35 sa gabii aron mo-drop ug pasahero, kalit na mibangga ang usa ka Honda XRM kolor itom nga motorsiklo nga dunay plaka MC6493KH ug gimanehuan ni Jumamil didto sa sampot sa bus.
Matus sa taho nga gumikan sa kakusog sa bangga, napasok ang motorsiklo sa ilalom sa maong bus ug nangalagpot ang magtiayon didto sa karsada.
Sigun sa taho nga si Jumamil walay lisensya sa pagmaneho ug waala nagsul-ob ug crash helmet sama sa iyang asawa.
Naguba ang motorsiklo sa biktima samtang ang driver sa natumbok nga bus gikustodiya na sa Tubigon Police Station. (Andy Nalzaro)
by boholbalita | Apr 27, 2010 | Local News / Bohol Balita
Dakpan ang gidudahang usa ka suertres coordinator human gironda sa bahan sa kapulisan ang usa ka balay didto sa barangay Campo Oriental, Getafe, Bohol niadtong milabay nga Miyerkulis.
Giila ang suspetsado nga si Felix Degamo, hamtong nag panuigon.
Sigun sa taho nga ang balay nga gitaguan sa suspek gironda sa hiniusang mga sakop sa Criminal Investigation and Detection Team kun CIDT-Bohol ubos sa pagpangulo ni Chief Inspector Germano Mallari ug sa Getafe Police Station mga alas 10 na sa gabie pinasikad sa alias search warrant nga gipirmahan ni Maghuhukom Irmazita Masamayor sa Regional Trial Court Branch 52 nga nakabase didto sa Lungsod sa Talibon.
Nasakmit gikan sa balay nga gipanag-iyahan sa usa ka Ariel Anzano mao ang 55 ka tally sheets sa ilegal nga sugal nga suertres, 11 kabuok nga tip nga penetsahan ug Abril 21, 2010 ug salapi nga P2,300 nga gituhuang taya ug uban pang paraphernalia sa maong sugal. Gidala ang natumbok nga suspek sa CIDT ug gikustodya didto sa Kampo Dagohoy. (Andy Nalzaro)
