by admin | Jun 7, 2016 | Headlines, Major Events, National News
MANILA, June 7 (PIA)–Subling nipahinumdom ug nihatag og pasidaan sa mga public transportation drivers ang Land Transportation Franchising and Regulatory Board (LTFRB) kalabot sa pagbukas sa klase karong buwan sa Hunyo.
Matud pa ni LTFRB Board Member Ariel Inton, mobalik na sa pagtungha ang mga kabataan karong Hunyo 13 mao nga gipahinumdoman nila ang mga drivers sa jeep ug bus nga kasagarang sakyan sa mga estudyante nga ihatag ang saktong 20% discount sa ilang pletehan.
Sa higayong may pagduda ang kundoktor o driver, giingong mahimong ipakita sa estudyante ang iyang school ID o Certificate of Registration.
Dungan niini, gipahinumdoman usab ni Inton ang mga tinun-an nga ang paghatag og diskuwento sa mga aldaw lamang nga adunay klase.
“Students are entitled to the fare discount only during school days, and not during holidays and weekends when there are no classes. But we should also consider that there are some students who have Saturday classes, and even Sundays for some, especially those like ROTC, NSTP that are being conducted on a Sunday,” matud pa ni Inton.
Nakalatid sa memorandum circular sa LTFRB nga ang bisan kinsang molapas o mapamatud-ang wala nihatag og diskuwento mapahamtangan og multa nga P2,000.00 alang sa first offense; multang P3,000.00, 60-days suspension sa Certificate of Public Convenience (CPC) ug pagkumpiska usab sa “for hire” plates sa second offense; ug multang P5,000 ug kanselasyon sa CPC sa third offense. (ecb/PIA7-Bohol)
by admin | May 31, 2016 | Headlines, Major Events, National News
MANILA, May 31 (PIA)–Gipagawas na sa Department of Budget and Management (DBM) ngadto sa Department of Social Welfare and Development (DSWD) ang P2.6 bilyon nga kinatibuk-ang pondo alang sa social pension ug uban pang social welfare programs niini.
Gawas pa kini sa pondo alang sa Conditional Cash Transfer (CCT) program o mas gi-ila usab nga Pantawid Pamilyang Pilipino Program (4Ps).
Parte usab kini sa “For Later Release” (FLR) appropriation ubos sa DSWD budget karong tuiga.
Matud pa ni Budget Sec. Butch Abad, apil sa pagapondohan niini ang Social Pension alang sa mga Indigent Senior Citizens, Protective Services for Individuals ug Families in Difficult Circumstances, Supplementary Feeding Program, ug kalamboan sa mga plano ug polisiya ubos sa buhatan sa Kalihim sa DSWD.
Ubos sa National Budget Circular 561, ang FLR appropriations nanginahanglan sa pagsumiter og special budget request, kauban sa financial plan, physical plan, ug monthly disbursement program. (ecb/PIA7-Bohol)
by admin | May 27, 2016 | Headlines, Local News / Bohol Balita, Major Events
TAGBILARAN CITY, May 27 (PIA)–Sa pagtuon nga gihimo sa Philippine Statistics Authority (PSA), ang job-skill mismatch ang usa sa mga nag-unang hinungdan nganong daghan ang walay trabaho sa Pilipinas ilabi na sa mga kabataan.
Tungod niini, nag-unang tumong sa gimugnang Career Guidance Advocacy Plan nga patas-an ang employment rate sa nasod ug makahatag og trabahong tukma sa kursong natapos o sa katakos sa usa ka aplikante og trabaho.
Kaabag ang Department of Labor and Employment (DOLE) sa pagmugna sa Career Guidance Advocacy Plan ug Working Group o CGAP-WG ang nagkalain-laing ahensya sa gobyerno sama sa Department of Education (DepEd), Department of Science and Technology (DOST), Commission on Higher Education (CHED), Technical Education and Skills Development Authority (TESDA) ug Professional Regulation Commission (PRC).
Target sa Career Guidance Advocacy Program Working Group nga tutokan ang mga kabataang wala natapos sa pagtungha ug naglisod sa pagpangita og trabaho.
Apil sa plano nila ang pagmugna og mga proyektong maghatag og tukma nga trabaho bisan sa mga out of school youth sa nasod.
Matud pa sa PSA, naa sa 101.6 milyon na ang populasyon sa Pilipinas niadtong 2015.
Naa sa 67 milyon niini ang adunay trabaho.
Base usab sa Enero 2016 PSA Labor Force Survey, ang mga unemployed workers sa nasod naa sa 48.3% gikan 15 taman 24 anyos o kapareho sa 1.169 milyon.
47.8% usab niini o 1.157 milyon ang naa sa 25 hangtud 54 ang edad.
Nikabat usab ang youth unemployment rate sa 14.4% samtang naa sa 19. 7 porsyento ang total underemployment rate. (ecb/PIA7-Bohol)
by admin | May 23, 2016 | Headlines, Major Events, National News
MANILA, May 23 (PIA)–Personal nga gidawat ni Presidente Benigno ‘Noynoy’ Aquino III ang kapin sa P40 bilyon nga remittances gikan sa nagkalain-laing mga Government Owned and Controlled Corporations (GOCCs).
Sa usa ka yanong seremonya sa Rizal Hall sa Malakanyang karong adlawa, miingon si PNoy nga mas dako ang maong kantidad kun itandi sa mga na-remit nga kita sa mga GOCC ug mga Government Financial Institutions (GFIs) niadtong niaging tuig nga nagkantidad lamang sa P36.36 bilyon.
Pinakadakong parte sa kita ang naggikan sa Land Bank of the Philippines (LBP) nga nikabat sa P6.6 bilyong kantidad sa mga dibidendo ug kita nga nikabat sa P6.8 bilyon.
Gisundan kini sa Philippine Amusement and Gaming Corporation (PAGCOR) nga may kinatibuk-ang share nga P8.8 bilyon.
Apil usab sa ni remit ang Mactan-Cebu International Airport Authority (MCIAA), P5.062 bilyon; Bases Conversion Development Authority (BCDA), P3.930 bilyon; Development Bank of the Philippines (DBP), P2.87 bilyon; Manila International Airport Authority (MIAA), P2.358 bilyon; Philippine Deposit Insurance Corporation (PDIC), P2.27 bilyon; Philippine Ports Authority (PPA), P2.187 bilyon; ug Philippine Reclamation Authority (PRA), P1 bilyon.
Ang tanang mga GOCCs ug GFIs adunay mandato nga mohatag og 50-porsiyento sa ilang deklaradong kita ug dibidendo sa National Treasury agi og pagsunod sa Republic Act 7657 o Revised Dividend Law. (ecb/PIA7-Bohol)
by admin | May 20, 2016 | Headlines, Major Events, National News
MANILA, May 20 (PIA)–Milambo og 6.9% ang ekonomiya sa nasod sa unang kwarter sa tuig 2016.
Mas taas kini sa 5% niadtong unang kwarter ug 6.5% sa ikaupat nga kwarter niadtong tuig 2015.
Matud pa sa National Economic Development Authority (NEDA), dako ang ambag sa sektor sa industriya ug serbisyo sama sa mga call center industry sa paglambo sa ekonomiya ning unang kwarter.
Samtang ubos ang sector sa agrikultura tungod sa epekto sa El Niño sa mga pananom ug isdaan sa tibuok nasod.
Apan bisan pa niini, nanguna pa gihapon ang ekonomiya sa Pilipinas sa mga silingang nasod nga nagsunod sa China, Vietnam, Indonesia ug Malaysia.
Matud pa ni Presidential Communications Operations Office (PCOO) Kalihim Herminio Coloma Jr., ang padayon nga “upward trend” sa ekonomiya pagmatuod sa maayong pagdumala sa mga macro-economic fundamentals nga gipatuman sa administrasyon.
Dugang pa sa Kalihim, makatabang kini sa pagpadayon sa paglambo sa ekonomiya o high growth trajectory nga maghatag og dalan aron maapil ang Pilipinas sa mga gitawag nga “high income countries.”
Mao nga gitumbok sa Malakanyang ang kamahinungdanon nga ipadayon ang mga social protection ug human development programs aron makab-ot ang tinguhang inclusive growth ug kinatibuk-ang paglambo. (ecb/PIA7-Bohol)
by admin | May 19, 2016 | Headlines, Major Events, National News
MANILA, May 19 (PIA)–Gihimakak sa Malakanyang ang balita nga 16 porsiyento na lamang sa nasudnong budget ang nahabilin alang sa administrasyon ni Davao City Mayor Rodrigo Duterte.
Matud pa ni Presidential Communications Operations Office (PCOO) Kalihim Herminio Coloma Jr., sayop ang balita nga nagasto na sa administrasyong Aquino ang otsenta porsiyento sa P3.002 trilyon nga national budget.
Pasabot pa sa Kalihim, sa P3.002 trilyong nasudnong budget, P2.5 trilyon na ang na-release o gihatagan og otoridad nga magamit ang pondo, apan wala kini nagpasabot nga na-disburse/napagawas na ang kwarta.
Matud pa nga P464 bilyon pa lamang niini ang na-obligate na o gipangayoan og financial plan nga himuong basehan sa pag-aprubar sa pag-release sa pondo o disbursement.
Giseguro usab ni Coloma nga hapsay nga ibilin sa Aquino administration ang gobyerno kalabot sa fiscal policy.
Giseguro usab sa Kalihim nga maayo ug nisubay sa balaod ang nahimong paggamit sa Presidente alang ning tuig sa iyang intelligence fund ug Presidential Social Fund.
Gipaniguro pa ni Coloma nga mopasar ang administrasyon ni PNoy sa mga pagsusi kun nisunod ba kini sa mga balaod kalabot sa paggunit sa budget. (ecb/PIA7-Bohol)
