by admin | Nov 11, 2014 | Headlines, National News
Gobyerno, gi-dugtong ang mga estudyante sa sektor sa pamuo aron masulbad ang job mismatch
MANILA, Nov. 11(PIA)–Padayon ang pakig-hinabi sa gobyerno sa mga hingtungdang sektor sa pamuo aron masulbad ang job mismatches sa nasud.
Tubag kini ni Presidente Benigno ‘Noynoy’ Aquino III sa mga delegado sa Asia-Pacific Economic Cooperation (APEC) Chief Executive Officers’ Summit niadtong niaging adlaw nga gipahigayon sa Beijing, China sa pangutana nga unsaon pagdugtong sa iyang administrasyon ang mga nitapos na sa pagtungha sa mga panginahanglan sa sektor sa pamuo.
“Palagay ko, ang angkop na sagot diyan ay maikli lamang. Kinakausap namin ang mga kina-uukulang sector upang malaman ang mga tiyakan nilang kailangan at mga nais, hindi lamang para sa kasalukuyang taon, kundi pati sa darating na apat na taon, limang taon, o 10 taong programa, kaya nasa kalagayan kami para gabayan ang aming mga mag-aaral tungkol sa mga kursong dapat nilang kunin at nang matiyak na may trabaho sila pagkatapos mag-aral, “ pasabot ni PNoy.
Matud pa sa Presidente nga usa sa mga tuyo sa gobyerno nga hatagan og insentibo ang mga tunghaan aron magsugod sila og mga kahibalo o programang derektang mapahimoslan sa katawhan.
Dugang pa ni PNoy nga nakig-hinabi na ang gobyerno sa growth industries aron hangyuon sila nga mohimo og pamaagi sa espisipikong programa nga mosiguro kun unsang matang sa kahibalo ang kinahanglanon nila.
Gi-dugang pa ni PNoy nga may usa ka milyong direktang nangalagad na karon sa mga business processing management o outsourcing sektor sa Pilipinas.
Sa 100 milyong populasyon sa nasud ug workforce nga 50 milyon, gibanabana ni PNoy nga ang maong sektor maka-empleyo og 1.3 milyon sa 2016.
Matud pa sa Presidente nga pipila ka kolehiyo ug tunghaan na ang may kursong tukma sa partikular nga industriya aron suportahan ang pag-uswag nila agig pagsuporta usab sa paggamit sa potensiyal ug kahibalo sa mga tinun-ang Pilipino.
Ang gobyerno namuhonan sa mga short- and medium-term courses sa sector sa technical-vocational aron siguradohon nga maka-trabaho dayon ang mga tinun-an.
Gihisgotan usab ni PNoy ang conditional cash transfer program sa gobyerno nga naghatag og insentibo sa mga ginikanan aron padayong motungha sa eskwelahan ang ilang mga anak. (ecb/PIA7-Bohol)
by admin | Nov 7, 2014 | Headlines, National News
Labing unang bakuna batok sa dengue, ipagawas sa 2015
MANILA, Nov. 6 (PIA)–Gihangop sa Department of Health (DoH) ang pagpagawas sa labing unang bakuna batok sa makamatay nga sakit nga dengue sa sunod tuig.
Kini human nahimong malamposon ang pagtuon sa labing unang Asian dengue vaccine efficacy trial sa milabay nga duha ka tuig.
Sa gipahigayong pagtuon, migawas nga 56.7% nga epektibo ang maong bakuna.
Base usab sa gipahigayong pagtuon, mikunhod sa 88.5% ang posibilidad nga ma-develop sa hemmoragic fever ang dengue base sa criteria sa World Health Organization (WHO), samtang mikunhod usab sa 67% ang posibilidad nga ma-ospital ang usa ka tawo pinaagi sa maong bakuna.
Gipahigayon ang pagtuon sa kapin 10,000 nga bata sa Asya nga adunay edad 2 hangtud 14 anyos diin 3,500 niini ang gikan sa Pilipinas.
Matud pa ni Dr. Lyndon Lee Suy, tigpamaba sa DoH nga dakung tabang ang maong bakuna nga makadugang og proteksyon sa mga Pilipino batok sa dengue.
Dugang pa ni Lee Suy nga kun available na ang maong bakuna, mohimo sila og pila ka modelo aron masayran kun asa nga lugar sa nasud ang kinahanglang mahatagan dayon niini.
Usa ka French company ang nag-develop sa maong bakuna kontra dengue nga ang kaso sa Pilipinas nakatala na sa kapin 60,000 sugod pa niadtong Enero.
Subling gipahinomdom sa DoH nga bisan may bakuna na batok sa dengue, kinahanglan pa gihapon nga mag-amping aron malikay sa makamatay nga sakit nga dengue. (ecb/PIA7-Bohol)
by admin | Nov 7, 2014 | Headlines, National News
Awit sa paglaom, ipatik sa anibersaryo sa bagyong Yolanda
MANILA, Nov. 6 (PIA)–Ilusad ugma, Nobyembre 7, sa buhatan sa Presidential Assistant for Rehabilitation and Recovery (OPARR) sa unang anibersaryo sa halapad nga kadaot nga gimugna sa bagyong Yolanda ang: “We Will Rise Again” nga usa ka music video nga pahinungod sa tanang Pilipino nga nahimong biktima sa maong kalamidad.
Gipagawas online pinaagi sa YouTube channel sa anibersaryo sa Yolanda niadtong Nobyembre 3, gipadayag sa “music video” ang diwa sa bayanihan ug gipakita ang walay susama nga paningkamot nga gihimo sa nagkalain-laing grupo ug indibidwal sa panahon sa paghatag og tabang, pagbangon gikan sa kadaot ug rehabilitasyon sa mga lugar nga naigo sa bagyo.
Ang “We Will Rise Again” usa ka pop ballad nga gisulat ni Jude Gitamondoc ug gi-awit ni Raki Vega, mang-aawit nga Pilipina nga taga-Cebu. Una kining gipagawas ni Vega niadtong 2010 apan kinasingkasing nga gihalad sa duha ka artista ang ilang kahibalo sa dihang giduol sila kalabot niining proyekto.
Matud pa sa OPARR nga napili nila kini nga awit tungod kay ang musika ug pulong niini nagsilbing “perpektong pahinumdom sa walay puas nga determinasyon, di mabontog nga diwa ug ang walay sama nga pagbangon sa mga Pilipino” nga sama sa makita sa video.
Puno ang maong awit sa mga mensahe sa nagpabiling paglaom nga timaan sa prinsipyo sa gobyerno nga ‘building back better’, nga mabati sa pamulong nga “Like an eagle to the distant dawn / From out the shackles of the past / We’ll be flying free at last / And rising with the morn / We will stand and we will rise again…”
Gi-apil usab sa music video ang nagkalain-laing hulagway ug film footages nga gikan sa nagkalain-laing ahensiya sa gobyerno, mga katimbang sa kalamboan, civil society organization, pribadong sektor, media networks ug sa mga naluwas sa bagyo.
Matud pa ni Kalihim Herminio Coloma, Jr. sa Presidential Communications Operations Office (PCOO), opisyal nga i-brodkas sa OPARR sa tibuok nasud ang maong music video ugma, Nobyembre 7, sa pakigtambayayong sa Kapisanan ng mga Brodkaster ng Pilipinas. Sa maong adlaw usab itaho ni Kalihim Panfilo Lacson ang “Yolanda Report: A Story on Hope and Change.”
Gi-aghat ang tanang mga ahensiya sa gobyerno, mga estasyon sa telebisyon, mga sinehan, mga kahabig sa kalamboan ug ang katawhang Pilipino nga ibutang sa ilang opisyal o personal man nga website ug uban pang social media platforms ang maong music video.
“Ang video sanang ito ay maging alay sa tibay ng paninindigan at bayanihan at ang awit na ito ay maging tagapaghatid ng pasasalamat natin sa lahat,” matud pa sa OPARR. (ecb/PIA7-Bohol)
by admin | Nov 5, 2014 | Headlines, National News
Tigbao hanging bridge sa Loboc, Bohol gi-ilang usa sa “most spectacular” sa kalibotan
TAGBILARAN CITY, Bohol, Nov. 05 (PIA)–Ang hanging bridge sa lalawigan sa Bohol gi-ila sa usa ka travel website isip usa sa “most spectacular” footbridges sa kalibotan.
Ang Tigbao Hanging Bridge nga nagbitay 82 ka tiil ibabaw sa Loboc River, nalakip sa artikulo nga gi-ulohang “13 of the world’s most spectacular footbridges” nga gimantala sa CNN Style niadtong Domingo.
Ang manunulat nga si Tamara Hinston nitumbok gi-unsa sa bamboo layer o hut-ong sa kawayan nga gi-ibabaw sa metal Tigbao Hanging Bridge nihatag sa “authentic” look o katuhuan tan-awon.
Ang ubang footbridges nga nalakip sa listahan mao ang Peak Walk by Tissot and Trift Bridge sa Switzerland, SkyBridge sa Russia, Aiguille du Midi Bridge sa France, Taman Negara National Park Bridge sa Malaysia, Capilano Suspension Bridge sa Canada, Hanging Bridge of Ghasa sa Nepal, El Caminito Del Rey sa Spain, The Marienbrucke sa Germany, Carrick-a-Rede Rope Bridge sa Northern Ireland, Kokone “Yume” Grand Suspension Bridge sa Japan ug ang Highline179 sa Austria.
Gawas sa Tigbao Hanging Bridge, ang ubang iladong atraksiyon sa Bohol naglakip sa Chocolate Hills, ang Loboc River cruise, ang mga puting kabaybayonan ug ang mga karaang simbahan o centuries-old stone churches. (ecb/PIA7-Bohol)
by admin | Nov 5, 2014 | Headlines, National News
PHLPost, milusad sa bag-ong postal ID nga mas daghang security features
MANILA, Nov. 5 (PIA)–Gipasigarbo sa Philippine Postal Corporation (PHLPost) nga makonsiderar nang usa ka valid identification ang bag-ong postal ID karon nga mas daghan nang security features.
Gipangunahan ni Postmaster General Josie dela Cruz ang paglusad ning bag-o lang sa bag-ong disenyo sa ID nga hinimo sa plastic sama sa ATM card ug driver’s license.
Gipasabot usab ni Lhan Marasigan Cruz, tigpamaba sa PHLPost nga daling mapeke ang daang postal ID mao nga daghang transaksyon ang dili modawat niini tungod na usab sa karaang disenyo niini nga hinimo lamang sa karton ug gitaptan lang og litrato sa dili pa ipa-laminate.
Dayag na karon sa bag-ong postal ID ang multiple security features mao nga mahimo na kining gamiton isip proof of identity ug address.
Mahimo nang maka-apply sa bag-ong postal ID sugod sa Nobyembre 10 sa kaulohan samtang sa Pebrero 2015 pa maka-apply sa tibuok nasud. (ecb/PIA7-Bohol)
by admin | Nov 5, 2014 | Headlines, National News
One-stop shop gitukod alang sa permanent housing sa mga lugar nga naigo sa bagyong Yolanda
MANILA, Nov. 5 (PIA)–Gipahibalo ni Presidential Assistant for Rehabilitation and Recovery (PARR) Kalihim Panfilo Lacson ang pagkatukod sa one-stop shop alang sa relokasyon aron pag-pahisayon sa pagtukod og permanenteng housing units sa mga lugar nga apektado sa bagyong Yolanda.
Sa usa ka press briefing nga gipahigayon sa Malakanyang kagahapon, miingon si Presidential Communications Operations Office (PCOO) Kalihim Herminio Coloma, Jr. nga gipahibalo kini ni Kalihim Lacson atol sa usa ka pulong-pulong kauban ni Executive Secretary Paquito Ochoa.
Ang maong pulong-pulong nga gipahigayon niadtong Lunes gitambongan sa mga miyembro sa Cabinet clusters nga direktang nalambigit sa implementasyon sa ‘Yolanda’ Comprehensive Recovery and Rehabilitation Plan (CRRP).
Ang pagkatukod sa one-stop shop alang sa relokasyon agig pagsunod sa Administrative Order No. 44, nag-streamline o nagpahapsay sa proseso sa pag-isyu og permits, certifications, clearances ug lisensiya alang sa housing and resettlement projects sa mga lugar nga naigo sa labing kusog nga bagyo. Ang kamanduan gi-aprobahan sa Presidente niadtong Oktubre 28.
Ang Housing and Urban Development Coordinating Council (HUDCC) mao ang lead agency niini.
Atol sa maong pulong-pulong, si Lacson nitumbok nga ang delinasyon sa safe, unsafe, ug controlled zones na pinalisar na pinaagi sa joint memorandum nga gilagdaan sa mga kalihim sa Department of Environment and Natural Resources (DENR), Department of Science and Technology (DOST), Department of National Defense (DND), Department of Interior and Local Government (DILG) ug Department of Public Works and Highways (DPWH).
Gipahibalo usab ni Lacson ang padayong delivery sa construction materials nga gidumala sa Departments of Trade and Industry (DTI) ug DPWH.
Gi-anunsiyo ni Kalihim Coloma nga si Lacson mohatod sa “Yolanda Report: A Story on Hope and Change” sa Biyernes, Nobyembre 7.
Itunong kini sa paglusad sa music video nga “We Will Rise Again,” sa kooperasyon sa Kapisanan ng mga Brodkaster ng Pilipinas. (ecb/PIA7-Bohol)
