by aimee | Mar 8, 2013 | National News
TAGBILARAN CITY, Bohol, Mar. 08 (PIA)–Gipaabot nalang ni Presidente Benigno “Noynoy” Aquino III ang resulta sa gihimong review sa Armed Forces of the Philippines (AFP) kalabot sa deployment sa peacekeeping contingent sa United Nations (UN).
Atubangan kini sa nahitabong pagka-hostage sa 21 ka sundalong Pinoy peacekeepers sa Syria.
Matud pa sa Presidente, gusto niyang mahibaw-an kun sakto bang magpadala pa og ingon adto kadaghang contingent ang atong nasud nga mokabat sa kapin 1,000.
Ang Presidente nagkanayon nga basin usab mahimong kuhaan ang gidaghanon sa gipadalang sundalo sa UN tungod kay daghan usab kita og panginahanglan dinhi sa atong nasud.
Sa pagkakaron, padayon ang monitoring sa Malakanyang kalabot sa nagpadayon nga negosasyon alang sa luwas nga pagpabuhi sa mga nabihag nga mga Pinoy.
“So tina-task ko ‘yong ating AFP, in particular, to… Parang to reassess, matagal na, na can we afford to send this number of people? I am told the number is about a thousand for all of the deployments everywhere when we also have our needs here in the country. So I’m still awaiting the results of that study,” matud pa ni Presidente Aquino. (PIA-Bohol/ecb/i-gg)
Tax relief law sa int’l carriers, gilagdaan na ni PNoy
TAGBILARAN CITY, Bohol, Mar. 08 (PIA)–Gilagdaan na kagahapon ni Presidente Benigno “Noynoy” Aquino III ang Republic Act 10374 o Common Carriers Tax Act, ang balaod alang sa tax relief ug exemptions sa mga international carriers.
Mao kini ang hiniusang bersyon sa House Bill No. 6022 ug Senate Bill No. 3343 nga gi-ilang An Act Recognizing the Principle of Reciprocity as Basis for the Grant of Income Tax Exemptions to International Carriers and Rationalizing Other Taxes Imposed Thereon by Amending Sections 28(A)(3)(a), 109, 11 and 236 of the National Internal Revenue Code, as Amended, and For Other Purposes.
Ubos niining bag-ong balaod, dili na mobayad og common carrier tax ang mga foreign air ug shipping carriers.
Gawas niini, exempted na usab sa pagbayad og value added tax ang maong mga carriers nga mobiyahe og mga pasahero pasulod sa Pilipinas.
Gipaabot nga mopalambo kini sa travel ug tourism sector sa nasud.
Matud pa ni Presidente Aquino, daku kini’g ikatabang sa pagkab-ot sa bag-ong tourist arrival target sa kagamhanan nga 56.1 milyon sa tuig 2016. (PIA-Bohol/ecb/p-gg)
by aimee | Mar 7, 2013 | Headlines, National News
TAGBILARAN CITY, Bohol, Mar. 07 (PIA)–Gikumpirmar karon sa Armed Forces of the Philippines (AFP) ang pagkabihag sa 21 ka Filipino peacekeepers sa Syria.
Matud pa ni AFP spokesperson Col. Arnulfo Burgos, apil sa mga gibihag sa mga rebeldeng Syrian ang 18 ka sundalo ug tulo ka mga opisyal.
Base sa inisyal nga impormasyon, giingong gibabagan sa kapin 30 ka mga armadong rebelde ang convoy sa UN Disengagement Force (UNDOF) sa maong ceasefire zone ug pugsanong gidagit ang mga biktima.
Sa pagkakaron, padayon pa ang gipahigayong negosasyon sa United Nations alang sa dinalian ug luwas nga pagpabuhi sa mga bihag.
Gitataw ni Burgos nga dili kwarta ang gipangayo sa mga rebeldeng Syrian kun dili ang realignment sa mga Syrian forces sa maong lugar.
Gipahayag usab ni UN deputy spokesman Eduardo del Buey nga ang deployment sa peacekeepers sa rehiyon alang sa pag-monitor sa ceasefire agreement tali sa Syria ug Israel sukad pa niadtong 1974.
“The UN observers were on a regular supply mission and were stopped near Observation Post 58, which had sustained damage and was evacuated this past weekend following heavy combat in close proximity, at Al Jamlah,” dugang pa sa opisyal.
Taliwala niini, positibo ang AFP sa gipahigayong negosasyon karon alang sa dali ug luwas nga pagbuhi sa mga nabihag nga Pinoy. (PIA-Bohol/ecb/i-sjp)
by aimee | Mar 7, 2013 | Headlines, National News
TAGBILARAN CITY, Bohol, Mar. 07 (PIA)–Gi-aprubahan na sa Department of Budget and Management (DBM) ang pagpagawas sa P10 bilyong budget alang sa pagpahimo og mga lawak-tunghaan.
Matud pa ni Budget Secretary Florencio Abad, pagtuman kini sa Presidente sa iyang saad nga sulbaron ang classroom gap ning tuiga.
Sa maong kantidad, igahin ang P1.7 bilyon sa pagpahimo og dugang mga classrooms sa National Capital Region (NCR), P1.2 bilyon sa Region IV-A, kapin P800 milyon sa Region 8 ug P600 milyon ang igahin sa Autonomous Region in Muslim Mindanao (ARMM).
Ang nahabiling pondo, igahin gihapon sa pagpahimo og mga lawak-tunghaan ug konstruksyon sa uban pang mga educational facilities diin gipaabot pa ang listahan sa mga recipient nga tunghaan gikan sa Department of Education (DepEd).
Ang maong pondo apil sa budget sa DepEd alang sa Basic Education Facilities ubos sa 2013 General Appropriations Act. (PIA-Bohol/ecb/p-gg)
2 bag-ong Comelec commissioners, gi-anunsyo ni PNoy
TAGBILARAN CITY, Bohol, Mar. 07 (PIA)–Pormal nang gitudlo ni Presidente Benigno “Noynoy” Aquino III silang Macabangkit Lanto ug Atty. Bernadette Sardillo isip bag-ong commissioner sa Commission on Elections (Comelec).
Matud pa sa Presidente, gipadala na niini ang appointment papers sa Kongreso alang sa ilang kumpirmasyon.
Sa wala pa natudlong poll commissioner si Lanto, ni alagad kini isip kongresista, undersecretary sa Department of Justice (DOJ) ug Department of Tourism (DOT) ug kanhi ambassador sa nasud sa Egypt ug Sudan.
Samtang si Sardillo usa ka election law expert.
Ang duha maoy gihulip sa mga nagretirong sila Commissioner Rene Sarmiento ug Armando Velasco. (PIA-Bohol/ecb/i-gg)
by aimee | Mar 6, 2013 | Headlines, National News
TAGBILARAN CITY, Bohol, Mar. 06 (PIA)–Andam gihapon ang gobyerno sa Pilipinas nga tabangan ang grupo sa mga Kiram kun maaresto ug kasuhan sa Sabah.
Sa briefer nga gipadala sa Malakanyang gikan sa Department of Foreign Affairs (DFA), nahisulat nga apil sa polisiya ni Presidente Benigno ‘Noynoy’ Aquino III nga atimanon ang mga Pilipino bisan asa man sila nahimutang sa ubang nasud.
Nahisulod niini nga walay diskriminasyon sa paghatag og legal assistance sa mga kababayang makalapas sa balaod.
Una niini, miingon si Presidential Spokesman Edwin Lacierda nga tun-an pa nila ang isyu tungod kay giingong talagsaong kaso ang nahitabo sa mga Kiram.
Kahinumdoman nga pila ka higayon nga gibalibaran sa mga Kiram ang apela sa gobyerno.
Samtang gi-angkon karon sa DFA nga sa ila nawala ang sulat ni Rajah Mudah Agbimuddin Kiram alang kang Presidente Aquino.
Giingong gi-angkon ni DFA Secretary Alberto del Rosario ang responsibilidad. (PIA-Bohol/ecb/i-sjp)
Comelec, nagpagawas og patakaran sa source code
TAGBILARAN CITY, Bohol, Mar. 06 (PIA)–Gipagawas na sa Commission on Elections (Comelec) ang ilang patakaran sa pagpahigayon og source code review alang sa nagsingabot nga midterm elections.
Ang source code mao ang programa o sistema sa makinang gamiton sa Mayo 13, 2013 nga piniliay.
Base sa upat ka pahinang Comelec Resolution 9651, ang mga political party lamang nga accredited sa poll body, indibidwal nga midagan sa national post ug adunay igong technical capability sa pagpahigayon og source code review ang mahimong hatagan lamang sa proseso.
Samtang gibawalan sa pagpahigayon og review ang mga sekta sa relihiyon, foreign party ug organisasyon nga tigkuha og pondo sa banyagang organisasyon ug kagamhanan.
Taliwala sa pagpagawas og resolusyon sa source code, gi-angkon sa Comelec nga wala pa sa ilang mga kamot ang code alang sa precinct count optical scan (PCOS) machines. (PIA-Bohol/ecb/i-gg)
by aimee | Mar 6, 2013 | National News
THE Aquino administration doesn’t see the ongoing standoff in Lahad Datu in Sabah a hindrance for the realization of a single community by the Association of Southeast Asian Nations (ASEAN) by December 2015.
The regional grouping agreed last year during a summit in Cambodia to realize the ASEAN Community by 2015.
President Benigno S. Aquino III and Malaysian Prime Minister Najib Abdul Razak have been in touch with each other on the Sabah crisis and both are working to resolve the issue at the soonest possible time, Presidential spokesman Edwin Lacierda said in a press briefing in Malacanang on Tuesday.
Lacierda said the administration doesn’t believe the Sabah issue would be an obstacle to the ASEAN’s goal of achieving a single community by 2015.
The President’s perspective is much broader and he cares not only for the 180 people holed up in Lahad Datu, the Palace spokesman said.
“He cares not only for the 800,000 Filipinos in Sabah, he also has to be concerned with the interest of the 95 million Filipinos here in the Philippines. We have a national interest to protect and to promote.”
The ASEAN Community will be based on three pillars, namely, a security community, an economic community and a socio-cultural community. (PND)
by aimee | Mar 5, 2013 | Headlines, National News
TAGBILARAN CITY, Bohol, Mar. 05 (PIA)–Masaligon ang Malakanyang nga ma-upgrade na ang aviation safety sa Pilipinas human ang positibong report sa Coordinated Validation Mission sa International Civil Aviation Organization (ICAO).
Kahinumdoman nga gipadala sa ICAO ang validation mission aron susihon ang gipahigayong lakang sa Civil Aviation Authority of the Philippines (CAAP) aron makasunod sa international aviation safety standards ug tubagon ang significant safety concerns (SSC) nga gitumbok sa ICAO.
Matud pa ni Deputy Presidential Spokesperson Abigail Valte, sa wala pa nipaule ang ICAO team, miingon kini nga kuntento na sila sa gipahigayong pagsusi ug irekomendar nila sa ilang headquarters sa Montreal, Canada nga ilibkas na ang ‘safety concerns’ sa Pilipinas.
Niadtong tuig 2008, gibutang sa US Federal Aviation Authority sa Category 2 ang CAAP tungod kay napakyas kini sa pagsunod sa ‘global aviation standards’.
“With this positive development, the CAAP will continue to coordinate with the European Union and the Federal Aviation Administration about upgrading the country’s aviation status,” matud pa ni Valte. (PIA-Bohol/ecb/p-gg)
Deployment ban sa Iraq ug Yemen, gi-libkas na sa DOLE
TAGBILARAN CITY, Bohol, Mar. 05 (PIA)–Mahimo nang makabalik og trabaho ang mga overseas Filipino workers (OFW) sa Iraq ug Yemen.
Kini human gibutyag ni Department of Labor and Employment (DOLE) Secretary Rosalinda Baldoz nga gi-libkas na nila ang deployment ban sa Iraq ug Yemen.
Matud pa ni Baldoz, kini tungod usab sa pagtangtang na sa Department of Foreign Affairs (DFA) sa alert level human nahimong malinawon na ang grabeng kagubot kaniadto sa maong mga nasud.
Apan bisan pa niini, giingong kinahanglan unang mag-umol og bilateral agreement nga maoy mohimo og regulasyon sa pagtrabaho sa mga newly-hired o bag-ong OFW sa Iraq.
Alang usab sa mga daan nang nagtrabaho sa Iraq, mahimo na silang mobalik didto apan kinahanglang may ma-prisintar sila nga kontrata.
Kahinumdoman nga gihunong sa gobyerno ang pagpadala og mga Pinoy workers sa maong mga nasud tungod sa grabeng kagubot didto. (PIA-Bohol/ecb/i-hd)
