by admin | Jan 4, 2017 | Headlines, National News
MANILA, January 4 (PIA)–Gipahibalo sa Philippine Coconut Authority (PCA) nga epektibo sugod niadtong Enero 3, 2017 ang moratorium sa pagputol sa punoan sa lubi sa nasod gawas lamang sa mga lalawigan sa Basilan ug syudad sa Isabela.
Matud pa ni PCA Administrator Billy Andal, ang national moratorium sa pagputol sa mga punoan sa lubi molanat og tulo ka bulan sugod niadtong Enero 3.
Giingong kinahanglang ipatuman ang moratorium tungod kay wala man gi-seryoso sa mga coco loggers ang nakalatid sa RA 8048.
Matud pa nga kun dili ipatuman ang moratorium, mabutang sa peligro ang industriya sa lubi sa nasod tungod kay mas daghang punoan sa lubi ang gipangputol kaysa gipangtanom.
Gawas kang Andal, ang moratorium sa pagputol sa punoan sa lubi gilagdaan usab nila Cabinet Secretay Leoncio Evasco Jr: ug mga miyembro sa PCA Governing Board nga sila si Alan Tanjuakio, Edicio dela Torre ug Ponciano Batugal.
Gipasabot ni Andal nga ipaubos usab sa makuting pagtuon ang Implementing Rules and Regulations sa RA 10510593 nga nag-amyenda sa RA 8048 nga tuyong tarongon ang pag-isyu sa permit ug clearance sa mga coco loggers.
Exempted sa maong moratorium ang probinsiya sa Basilan ug syudad sa Isabela tungod sa nasinati nilang problema didto sa cocolisap. (ecb/PIA7-Bohol)
by admin | Jan 4, 2017 | BFAR Advisory, Health and Medicine, Local News / Bohol Balita, National News
MANILA, January 4 (PIA)–Subling nagpagawas og shellfish ban sa 9 ka kabaybayonan ang Bureau of Fisheries and Aquatic Resources (BFAR) sa Visayas human mag-positibo sa red tide toxins ang mga gisusing sample nga mga shellfish.
Apil sa mga apektado sa red tide ang mga baybayon sa Biliran, Calubian, Leyte, Gigantes Islands sa Iloilo; Carigara Bay sa Leyte; Cambatutay Bay ug Daram Island sa Western Samar; ug Dauis ug Tagbilaran City sa Bohol.
Giseguro ni BFAR Director Eduardo Gongona nga padayon ang ilang monitoring sa mga apektadong lugar aron malikayang makapalit ug makakaon ang mga residente sa mga shellfish nga apektado sa red tide.
Subling nanawagan ang BFAR sa mga residente sa mga apektadong lugar nga likayan una ang pagpanguha, pagpamaligya, pagpamalit ug pagkaon sa tanang matang sa shellfish sama sa tahong, talaba ug tulya. (ecb/PIA7-Bohol)
by admin | Dec 28, 2016 | DOH Updates, Headlines, National News
MANILA, December 28 (PIA)–Ilusad karong adlawa sa Department of Health (DOH) ang pagtumbok sa mga lokal nga kagamhanan nga makonsiderar nga pinakakuyaw sa pagsugat sa Bag-ong Tuig.
Matud pa sa tigpamaba sa DOH nga si Asec. Eric Tayag, ipagawas nila karon ang listahan sa mga lungsod o munisipyo nga nakatala og daghang biktima sa paboto.
Giingong gihimo ang pag-tally niini base sa gidaghanon sa mga nabiktima sa paboto sa usa ka lugar kun itandi sa natala sa susamang petsa sa niaging tuig.
Samtang subling nanawagan ang DOH sa mga lokal nga kagamhanan nga suportahan ang kampanya sa ahensya aron malikayan ang gidaghanon sa mga masamdan sa pagsugat sa Bag-ong Tuig.
Bisan tulo ka adlaw na lang ang nahabilin sa pagsugat sa tuig 2017, miingon si Tayag nga may mahimo pang paagi aron malikayan ang mga madisgrasya sa paboto. (ecb/PIA7-Bohol)
by admin | Dec 23, 2016 | Major Events, Malakanyang Updates, National News
MANILA, December 23 (PIA)–Bisan ni us-os og gamay ang trust ratings ni Presidente Rodrigo Duterte, nagpasalamat pa gihapon ang Malakanyang sa padayon nga pagsalig sa katawhan sa Chief Executive.
Base sa 4th quarter survey sa Social Weather Stations, naa sa positive 72 na lamang ang nakuha sa Presidente o upat ka puntos nga mas ubos sa positive 76 nga nakuha niadtong Setyembre.
Apan bisan pa niini, naa sa kategoryang excellent trust rating pa gihapon ang Presidente.
Matud pa ni Presidential Communications Office (PCO) Kalihim Martin Andanar, testamento kini sa padayon nga pagsalig sa katawhan nga batokan ni Presidente Duterte ang problema sa ilegal nga droga, kriminalidad ug korapsiyon.
“We thank the Filipino people for their continued trust on the President. Net public confidence in the President stays excellent at +72 during the Fourth Quarter. It is noteworthy to mention that the President’s net trust rating has been excellent for three consecutive quarters, namely, days before his inauguration on June 30, last September, and now December,” pahayag pa ni Andanar.
Dugang pa ni Andanar, magsilbing inspirasyon sa administrasyong Duterte ang bag-ong resulta sa SWS survey aron mas tarongon pa nila ang ilang trabaho. (ecb/PIA7-Bohol)
by admin | Dec 23, 2016 | Edukasyon Updates, Headlines, Malakanyang Updates, National News
MANILA, December 23 (PIA)–Gilagdaan na kagahapon ni Presidente Rodrigo Duterte ang Republic Act 10924 o ang General Appropriations Act nga nagkantidad og P3.35 trilyon.
Sama sa nahisulod sa atong Batakang Balaod, makakuha ang Department of Education (DepEd) sa pinakadakong pondo nga nagkantidad og P544.1 bilyon.
Sa iyang pahayag human gilagdaan ang 2017 National Budget, miingon ang Presidente nga makonsiderar nga “golden age of infrastructure” ang sunod tuig diin naggahin ang administrasyon og P454.7 bilyon nga pondo alang sa Department of Public Works and Highways (DPWH).
Daghan usab og mga proyekto ang gobyerno aron makuhaan ang gibug-aton sa dagan sa trapiko mao nga naggahin kini og P53.3 bilyon nga budget alang sa Department of Transportation (DOTr).
Dako usab ang gigahing pondo alang sa mga State Universities and Colleges nga mokabat sa P58.7 bilyon samtang P18.7 bilyon usab ang alang sa Commission on Higher Education (CHED).
Giseguro usab sa Presidente nga padayon ang kampanya sa gobyerno batok sa ilegal nga droga mao nga gipasakaan ang pondo sa Department of Interior and Local Government (DILG) sa P148 bilyon.
Ang Department of National Defense (DND) usab adunay pondo sa 2017 nga mokabat sa P137 bilyon.
Gibalik usab sa gobyerno ang health care program sa mga kalongsoran mao nga adunay budget ang Department of Health (DOH) nga mokabat sa P96 bilyon.
Aron mas maalagaran ang mas daghang kabos nga Pinoy, naggahin ang gobyerno og P53.2 bilyon alang sa Philhealth.
Giseguro usab sa Presidente nga magsilbing pro-people, pro-investment, pro-growth ug pro-development ang pondo sa iyang administrasyon alang sa 2017. (ecb/PIA7-Bohol)
by admin | Dec 23, 2016 | Headlines, Holiday Updates, National News
MANILA, December 23 (PIA)–Nipasidaan ang Bangko Sentral ng Pilipinas (BSP) batok sa pagkatap sa mga peke nga salaping papel karong holiday season.
Pasidaan pa sa BSP, siguradohong susihon gayud og maayo ang features sa paper bills sama sa watermark, serial number nga angay dili susama og gidak-on ug angay usab nga may security thread kini.
Matud pa sa BSP, sa matag usa ka milyong tinuod nga salaping papel nga naa sa sirkulasyon, napulog-usa niini ang peke.
Apan gitumbok usab sa BSP nga dili igo ang ipakatap nga mga pekeng salapi aron maka apekto kini sa ekonomiya sa nasod.
Dungan niini, nakig-alayon ang BSP sa Kongreso aron tun-an ang pagpahamtang og mas bug-at nga multa sa mga sindikatong masakpang nag-imprenta ug nagpakatap sa mga peke nga salaping papel. (ecb/PIA7-Bohol)
