by admin | Aug 3, 2016 | Headlines, National News
MANILA, August 3 (PIA)–Ibalik sa Malakanyang ang mandatory Reserved Officers’ Training Corps (ROTC) sa kolehiyo aron mabalik ang disiplina ug paghigugma sa nasod ilabi na sa mga kabataan.
Matud pa ni Presidential Chief Legal Officer Salvador Panelo, gusto ni Presidente Rodrigo Duterte nga iduso ang balaodnon nga himuong mandatory ang ROTC.
Sa kasamtangan, ‘optional’ ang pagkuha sa ROTC sa mga tinun-an sa kolehiyo ubos sa National Service Training Program (NSTP).
Gitangtang ang ROTC niadtong 2001 tungod sa mga insidente sa hazing kaniadto diin may pipila ka kadete pa ang namatay.
Giingong ang planong ibalik ang ROTC unang gi-rekomendar sa Commissioin on Higher Education (CHED) sa usa ka cabinet meeting kauban si Presidente Duterte.
Matud pa ni Panelo nga makaayo nga ibalik ang ROTC tungod kay epektibo kining paagi sa pagdisiplina.
Gibutyag ni Panelo nga plano niyang tun-an ang ROTC ug siya ang mo-rekomendar sa Presidente kun unsaon ang himuong pag-amyenda.
Giingong makig-alayon usab kini sa Kongreso kun kinsa ang gustong mo-sponsor sa maong balaodnon. (ecb/PIA7-Bohol)
by admin | Aug 3, 2016 | Headlines, National News
MANILA, August 3 (PIA)–Misaad si Presidente Rodrigo Duterte sa mga sundalo sa Armed Forces of the Philippines (AFP) sa pagpaayo ug pagpanindot sa AFP Medical Center.
Sa pag-atubang niya sa mga sundalo sa AFP Medical Center kagahapon, gipahayag sa Presidente nga maggahin ang Department of Budget Management (DBM) og P500 milyon alang sa pagpaayo ug pagpatukod og dugang bilding sa ospital sa mga sundalo.
Matud pa sa Pangulo, ang mga sundalo ang kanunay nga nagbuhis sa ilang kinabuhi ug kaluwasan apan sila ang kulang sa mga kagamitan sa ospital.
Gawas sa mas maayo nga serbisyong panglawas alang sa mga sundalo, misaad usab si Presidente Duterte nga iduso niya ang libreng edukasyon alang sa ilang mga anak.
Giseguro sa Presidente nga magpatukod siya og opisina sa AFP nga mag-atiman sa pag-proseso sa mga pensyon sa mga sundalo.
Giingong himuon niya ang tanan aron mahimong komportable ang trabaho sa mga sundalo ug aron mahatag ang mga panginahanglan sa AFP. (ecb/PIA7-Bohol)
by admin | Aug 2, 2016 | Headlines, National News
MANILA, August 2 (PIA)–Ipasarado ni Presidente Rodrigo Duterte ang mga kumpanya nga nagpatuman og kontraktuwalisasyon.
Sa pahayag sa Presidente didto sa Malakanyang, gi-aghat niini ang publiko nga motawag sa hotline number nga 8888 kun may mga kumpanya nga dili sakto ang pagtratar sa mga mamumuo.
Matud pa sa Presidente, angay sundon ang walo ka oras nga trabaho ug angay bayran ang Social Security System (SSS) ug uban pang benepisyo sa mga mamumuo.
Gihisgotan usab ni Duterte nga sa dugay nang panahon, nagpahimos sa daang sistema ang pipila ka kumpanya mao nga panahon na aron bag-ohon kini ug ipatuman ang katungod sa mga mamumuo.
Pangunahan ni Department of Labor (DOLE) Kalihim Sylvestre Bello ang pagpahiluna sa bag-ong sistema aron padayon nang tangtangon ang “Endo” o end of contract.
Niadtong panahon sa kampanya, nahimong sentro sa programa ni Duterte ang pagtangtang sa kontraktuwalisasyon sa labor force sa nasod. (ecb/PIA7-Bohol)
by admin | Aug 2, 2016 | Headlines, National News
MANILA, August 2 (PIA)–Gisugdan na sa Bureau of Internal Revenue (BIR) ang lifestyle checks sa ilang mga kawani.
Matud pa ni BIR Commissioner Cesar Dulay, tumong sa lifestyle check nga matumbok kun kinsa sa mga empleyado ang mi-abusar sa ilang posisyon.
Katambayayong sa BIR ang Land Registration Authority (LRA), Land Transportation Office (LTO) ug National Bureau of Investigation (NBI) nga nagpahigayon og background checking sa mga kawani sa BIR.
Pila ka higayon na usab miingon si Dulay nga ilang ipatuman ang ‘no gift’ policy sa ilang buhatan sa tibuok nasod. (ecb/PIA7-Bohol)
by admin | Aug 1, 2016 | Headlines, National News
MANILA, August 1 (PIA)–Padayong gipabati sa gobyerno ang pagpaabot sa ilang serbisyo sa publiko pinaagi sa pagbukas sa duha ka hotlines karong adlawa.
Sugod karong adlawa, mahimo nang motawag ang publiko sa 911 emergency hotline kun manginahanglan og dinaliang tabang, samtang ang 8888 complaint desk usab ang sumbunganan ug mahimo usab reklamohan kalabot sa korapsiyon sa gobyerno ug uban pa.
Matud pa ni Telecommunications Commissioner Gamaliel Cordoba, sa 911 mo-diretso ang mga tawag sa kanhi Patrol 117 samtang gitukod pa ang command center niini.
Bukas ang maong mga hotline 24 oras, diin ang mga reklamo sa 8888 ipaabot sa nagkalain-laing ahensyang may kalabotan niini.
Ang mga subscriber sa PLDT, Smart ug ePLDT mahimong makatawag og libre, samtang adunay P5 matag tawag nga singil sa mga Globe subscriber. (ecb/PIA7-Bohol)
by admin | Aug 1, 2016 | Headlines, National News
MANILA, August 1 (PIA)–Dungan sa pagsaulog sa ika-24 ka tuig nga anibersaryo sa Philippine National Police-Police Community Relations Group (PNP-PCRG), gipaila-ila karong adlawa ang mascot nga si “PO1 Bato” nga kapareho og dagway ni PNP chief Director Gen. Ronald “Bato” Dela Rosa.
Ang maong PNP mascot gamiton sa roadshow sa PNP-PCRG sa mga tunghaan ug komunidad aron ipahibalo sa mga kabataan ang mga kadaot sa ilegal nga droga.
Ang paglusad sa bag-ong proyekto sa PCRG gipahigayon atol sa flag-raising ceremony sa Kampo Crame nga gipangunahan ni PNP chief Dela Rosa, diin nahimong pinasidunggang dinapit si Presidential Communications Office (PCO) Kalihim Martin Andanar.
Matud pa ni PCRG chief Senior Supt. Gilberto Cruz, ang pag-promote sa imahe sa usa ka mas “maka-masang polis” nagtinguhang aghaton ang katawhan nga dili kahadlokan ang kapolisan ug mahimong mas aktibong katimbang sa PNP sa kampanya batok sa ilegal nga droga.
Samtang dungan sa paglusad sa mascot, gi-presentar usab sa PCRG ang ilang komiks ug stuffed police dolls nga mahimong magamit sa kabataan. (ecb/PIA7-Bohol)
