by admin | Apr 6, 2016 | Headlines, National News
MANILA, April 06 (PIA)–Gi-awhag sa Department of Labor and Employment (DOLE) ang mga estudyante sa pagsulod sa ilang Government Internship Program (GIP).
Matud pa ni DOLE Kalihim Rosalinda Baldoz, usa sa kasagarang problema nga atubangon sa mga bag-ong mi-gradwar ang mga kumpanyang mangita og working experience ug ang GIP matud pa ang solusyon niini.
Gipasabot sa Kalihim nga kining maong internship program saktong training ground nga maghatag og pundasyon sa work experience sa mga bag-ong mi-gradwar ug maghatag kanila og kahigayonang maka-alagad sa publiko.
Gipasigarbo usab sa Kalihim nga sukad tuig 2012, diin unang gilusad ang GIP hangtud tuig 2015, nakatala na sila og 32, 625 nga mga interns nga ilang natabangan.
Subling gi-imbetar sa ahensya ang mga interesadong aplikante nga naa sa edad 18 taman 30 anyos sa pagbisita sa ilang mga buhatan sa DOLE dala ang mga requirements sama sa: transcript of record, resume, certificate of indigency gikan sa baranggay ug birth certificate. (ecb/PIA7-Bohol)
by admin | Apr 6, 2016 | Headlines, National News
MANILA, April 06 (PIA)–Kusganong gihimakak sa Department of Public Works and Highways (DPWH) ang giingong namaligya ang ahensya og ticket, isip fundraising activity alang sa mga senior citizen.
Matud pa ni DPWH Kalihim Rogelio Singson, nakadawat sila og taho nga adunay mga indibidwal nga nagpa-ila isip usa ka opisyal o kawani sa DPWH.
Kini sila ang giingong namaligya og raffle ticket alang kuno sa Senior Citizens Fundraising event.
Gi-klaro sa Kalihim nga walay kalabotan ang DPWH sa ticket selling ug bisan sa maong fundraising event.
Matud pa nga hugot nga gi-bawal sa DPWH ang bisan unsang matang sa solicitation sa ilang mga regional ug district engineering offices sa tibuok nasod.
Panawagan pa sa kalihim, kun may moduol ug magpa-ila nga kawani sa DPWH ug motanyag og raffle ticket, dili na magduha-duha pa nga itawag kini dayon sa mga otoridad. (ecb/PIA7-Bohol)
by admin | Mar 30, 2016 | National News
MANILA, Mar. 30 (PIA)–Gilagdaan na ni Presidente Benigno ‘Noynoy’ Aquino III ang balaodnong maghatag og 12% value added tax (VAT) exemption sa mga persons with disabilities (PWDs).
Matud pa ni Presidential Communications Operations Office (PCOO) Kalihim Herminio Coloma Jr., Marso 23 pa gilagdaan ni PNoy ang Republic Act 10754 nga maghatag og susamang benepisyo sa mga adunay kakulian sa panglawas sama sa mga senior citizens.
Ubos sa maong balaod, miingon si Coloma nga makakuha na usab og VAT exemption ang mga PWDs sa ilang serbisyong medikal ug dental.
Dili na usab kinahanglang pahamtangan og VAT ang mga PWDs sa mga palitong tambal sa botika apil na sa pagsakay sa MRT/LRT ug bawas sa pletehan sa mga bus.
May VAT exemption usab ang mga PWDs sa mga sinehan, concert hall, serbisyo sa mga hotel, restaurant ug recreation centers.
Nahisulod usab sa maong balaod nga ang mga paryente sa mga PWDs hangtud sa “fourth civil degree of consanguinity or affinity” nga nag-atiman nila mahimong maka-avail og tax deduction nga P25,000 sa ilang annual income tax.
Base sa datos sa Philippine Statistics Authority, naa sa 1.5 milyon ang populasyon sa mga PWDs sa nasod. (ecb/PIA7-Bohol)
by admin | Mar 30, 2016 | National News
MANILA, Mar. 30 (PIA)–Gi-awhag sa Commission on Elections (COMELEC) ug Civil Service Commission (CSC) ang publiko sa pagsumbong sa ilang buhatan kun may empleyado o opisyal sa gobyerno, polis o militar nga nalambigit sa electioneering o partisan politics.
Sa joint circular advisory on electioneering and partisan political activities sa COMELEC ug CSC, bawal nga gamiton ang mga sakyanan o uban pang resources sa gobyerno sa pagpangampanya.
Matud pa ni CSC Chairman Alicia Bala, ang molapas niini pahamtangan og usa hangtud unom ka buwang suspensyon alang sa first offense ug dismissal sa serbisyo alang sa second offense.
Mawad-an og katungod ang mga mapamatud-ang milapas niini nga makakuha og benepisyo ug mokupot pa og bisan unsang government office.
Apan wala gi-bawal sa maong joint circular ang pag-like, share, repost, comment sa facebook o uban pang social media account basta wala kini nagsolicit og boto.
Wala usab gidili ang pagpahayag kun kinsang kandidato ang ilang suportahan.
Sakop usab sa circular ang mga opisyal sa barangay apil na ang mga kagawad sa gobyerno nga ni-file og leave of absence. (ecb/PIA7-Bohol)
by admin | Mar 30, 2016 | National News
MANILA, Mar. 29 (PIA)–Nimugna si Presidente Benigno ‘Noynoy’ Aquino III og National Task Force for the West Philippine Sea (NTF-WPS) pinaagi sa usa ka Memorandum Circular.
Sa Memorandum Circular No. 94 nga gipagawas sa Malakanyang, nakalatid nga base sa Section 7, Article II sa 1987 Constitution diin nagtadhana sa katungod sa Pilipinas nga protektahan ang soberenya, territorial integrity, national interest ug right to self-determination isip parte sa international community.
Tumong sa task force nga magbaton og nagkahiusa ug klaro nga paglihok sa mga hingtungdang ahensya ug buhatan sa gobyerno sa pag-atiman sa mga interes sa West Philippine Sea.
Ang maong task force pangunahan sa National Security Adviser isip chairperson samtang miyembro ang Department of Foreign Affairs (DFA), Department of National Defense (DND), Department of Justice (DOJ), Department of Interior and Local Government (DILG), Department of Environment and Natural Resources (DENR), Department of Energy (DOE), Department of Agriculture (DA), Department of Trade and Industry (DTI), Department of Transportation and Communications (DOTC), Department of Finance (DOF), National Economic and Development Authority (NEDA), National Coast Watch System, Armed Forces of the Philippines (AFP), Philippine National Police-Maritime Group, Philippine Coast Guard (PCG) ug Bureau of Fisheries and Aquatic Resources (BFAR).
Kauban usab sa task force isip permanent representatives sa matag ahensya sa gobyerno ang opisyal niining adunay ranggong Undersecretary.
Nahisulod sa MC nga ang NTF-WPS modawat og giya ug direktiba gikan sa Presidente pinaagi sa Cabinet Cluster on Security, Justice and Peace ug mahimong responsable sa paghiusa o koordinasyon sa mga plano ug paglihok sa West Philippine Sea.
Ang task force usab ang magsumite og mga rekomendasyon ug report sa Presidente pinaagi sa Security Cluster.
Samtang tanang sangay sa gobyerno, departamento, bureaus, agencies, mga buhatan, local government units (LGUs) apil na ang mga government-owned and controlled corporations (GOCCs) gimanduang maghatag sa tibuok nilang suporta ug kooperasyon sa task force sa pagpatuman niini sa ilang mandato ug katungdanan. (ecb/PIA7-Bohol)
by admin | Mar 30, 2016 | National News
MANILA, Mar. 28 (PIA)–Usa ka adlaw human nagsugod ang kampanya sa pang-lokal nga mga mokandidato karong Mayo 9 nga piniliay, mihangyo ang liderato sa Philippine National Police (PNP) sa publiko og kooperasyon alang sa luwas ug hapsay nga piniliay.
Kini mismo ang panawagan ni PNP Chief Dir. Gen. Ricardo Marquez tungod kay giangkon nilang kulang ang ilang pwersa, apan sa tabang sa mga sibilyan, dali nila kining matobag gamit ang bag-ong teknolohiya sama sa social media.
Matud pa sa tigpamaba sa PNP nga si Wilben Mayor, kasagarang taas ang tensyon sa bugnoay sa pang-lokal nga posisyon sa gobyerno ilabi na nga nagsugod na ang ilang kampanya.
Pagseguro pa sa pamunoan sa PNP nga plantsado na ang tanan nga ilang gihikyad nga seguridad ug bisan ang mga gitawag nga worst case scenario, ila nang gipangandaman.
Apan giangkon sa PNP nga daku ang hagit nga ilang gi-atubang karong tuig kalabot sa pag-mentenar sa peace and order sa nasod.
Usa na niini ang kakulang sa ilang pwersa mao nga gi-awhag nila ang publiko nga i-report kanila ang mga kagobot nga mahitabo sa ilang lugar o bisan ang mga pagpanglapas nga gihimo sa matag kandidato samtang nangampaniya kini.
Sa pagkakaron, nakabutang sa heightned alert ang nasudnong polisya sa tibuok nasod ug posibleng isaka pa kini kun duol na ang adlaw sa piniliay. (ecb/PIA7-Bohol)
