by admin | Jan 13, 2016 | National News
MANILA, Jan. 13 (PIA)–Giseguro sa Malakanyang nga igo pa gihapon ang pondo sa Department of Health (DOH) alang sa Maternal Health ug Reproductive Health (RH) bisan gikaltasan sa Kongreso ang 2016 National Budget.
Kahinumdoman nga gibasol ni DOH Kalihim Janette Garin si Senador Vicente Tito Sotto nga maoy nagpatangtang sa P1 bilyong alokasyon unta sa DOH aron pangpalit og mga contraceptives sama sa condoms ug pills.
Matud pa ni Presidential Communications O¬perations Office (PCOO) Kalihim Herminio Coloma Jr., gipasabot ni Department of Budget Kalihim Butch Abad nga dili tibuok sa balaodnong pondo alang sa family planning program sa DOH ang gitangtang sa Kongreso.
Gitataw ni Abad nga naa sa kapin P860 milyon lamang ang aktuwal nga gikaltas sa Kongreso.
Gipasabot usab ni Coloma nga gipatangtang ni Sotto ang maong pondong gigahin alang sa Implanon implant tungod sa Temporary Restraining Order (TRO) sa Korte Suprema batok sa distribusyon ug pagbaligya sa nahisgotang contraceptives.
Gitumbok ni Coloma nga may kantidad pang mahimong gamiton alang sa family planning gawas sa savings sa niaging tuig nga mahimo pang gamiton sa DOH.
Sa kinatibuk-an, mokabat sa P2.27 bilyon ang budget nga gigahin alang sa Womens and Mens Health Development Component sa Family Health and Responsible Parenting, ang gigahin sa pinal nga bersyon sa General Appropriations Act for 2016. (ecb/PIA7-Bohol)
by admin | Jan 13, 2016 | National News
MANILA, Jan. 13 (PIA)–Kun may hypertension o diabetes ka, mahimo kang mahatagan sa Department of Health (DOH) og libreng maintenance medication.
Matud pa ni DOH Kalihim Janette Garin, target sa buhatan nga makahatag og libreng tambal sa tulo ka milyong hypertensive patients ug usa ka milyong diabetic patients.
Gipasabot sa Kalihim nga gikan sa estimate nga gihimo sa mga program director base ang gidaghanon sa kinahanglang tabangan sa ilang maintenance medication.
Alang sa mga adunay hypertension, manghatag ang DOH og Amlodipine, Losartan ug Metoprolol.
Kun diabetic usab, Metformin ang ipanghatag.
Aron makadawat niini, giingong kinahanglan lamang magpasusi ug magpalista sa rural o urban health center.
Kun nalista na didto, ipasa sa regional ang ngalan ug ipaapil usab sa regional office ngadto sa national office ang pangalan aron maapil kini sa database.
Sa higayong maapil na sa database, matag-buwan nang makadawat og libreng tambal ang mga pasyente sa ilang pinakaduol nga regional health unit o urban health center.
Nunot niini, gi-aghat ni Garin ang tanang local government units sa pagmugna og “hypertensive and diabetes clubs.”
Gikan sa maong pondok nga mamugna, adunay mga mosunod pang programang ilusad ang buhatan.
Matud pa nga usa na niini ang mailhan ang mga diabetic nga nanginahanglan og insulin.
Giingong may ipahigayon usab nga regular nga pakig-pulong ang mga tinugyanan sa DOH alang sa padayon nga paghatag og kasayoran sa sama sa lifestyle change, diet ug kun unsa man ang mga posibleng ikatabang sa buhatan ngadto sa pamilya. (ecb/PIA7-Bohol)
by admin | Jan 12, 2016 | Major Events, National News
MANILA, Jan. 12 (PIA)–May gibanabanang 2.6 mil¬yong pamilya ang nakasinati og gutom sa katapusang kwarter sa tuig 2015, matud pa sa survey sa Social Weather Station (SWS).
Apan kining gidaghanona mao ang pinaka-ubos sa milabay nga napulog-usa ka tuig.
Sa gipahigayong survey sa SWS sa 1,200 ka hamtong sa tibuok nasud niadtong Dis¬yembre 5-8, 2015, 11.7% sa respondents o kapareho sa 2.6 milyong pamilya ang miingon’g nakasinati sila nga wala mokaon bisan kausa sulod sa tulo ka buwan.
Kining gidaghanon mas ubos kun itandi sa 15.7% o 3.5 milyong pamilya niadtong Setyembre 2015.
Sa tibuok tuig sa 2015, ang ave¬rage hunger rate naa sa 13.4%, ubos og 4.9% kun itandi sa average niadtong 2014 nga 18.3%.
Kini na ang pinaka-ubos nga gidaghanon sa pa¬milyang gigutom niadtong 2004 diin ang average naa sa 11.8%.
Nunot niini, nanghinaot ang Malakanyang nga mas moubos pa ang gidaghanon sa pamilyang makasinati og gutom karong tuiga tungod kay dakung pahat sa P 3.002 trilyong budget ang nakareserba aron ma-solus¬yonan ang problema sa kakabos ug pagkagutom.
“Government is determined to sustain the gains achieved in terms of addressing poverty and hunger. That is why the biggest slice of the 2016 budget was allotted to social protection and human development,” matud pa ni Presidential Communications O¬perations Office (PCOO) Kalihim Herminio Coloma Jr. (ecb/PIA7-Bohol)
by admin | Jan 12, 2016 | Major Events, National News
MANILA, Jan. 12 (PIA)–Walay nakitang dautan ang Commission on Elections (Comelec) kun mokuha og video ang mga motorista sa pagpahigayon og checkpoint dungan sa pagpatuman sa election gun ban sa tibuok nasud.
Matud pa ni Comelec Chairman Andres Bautista, mahimong kuhaan og video sa bisan kinsang motorista ang himuong pang-inspeksyon sa mga polis sa ilang mga sakyanan nga ipahunong sa mga gibutangan og checkpoints sa Philippine National Police (PNP) ug Armed Forces of the Philippines (AFP).
Gipasabot ni Bautista nga tuyo lamang niini nga masigurong dili ma among-amongan ang tawhanong katungod sa bisan kinsang motorista batok sa mga abusadong polis ug militar.
Dungan niini, nanawagan usab si Bautista sa publiko ug sa mga motorista nga ipaabot dayon sa Comelec ang bisan unsang reklamo kun nabatyagan nilang may nalapas sa ilang tawhanong katunod ang mga polis sa pagpahigayon og checkpoint.
Apan gipasabot usab sa Comelec Chair nga angay usab mosunod ang mga motorista sa gitakdang balaod nga election gun ban. (ecb/PIA7-Bohol)
by admin | Jan 11, 2016 | Major Events, National News
MANILA, Jan. 11 (PIA)–Dobleng silot ang atubangon sa bisan kinsang molapas sa gipatuman na karon sa Commission on Elections (Comelec) nga gun ban.
Matud pa ni Department of Interior and Local Government (DILG) Kalihim Mel Senen Sarmiento, base sa iyang pakig-alayon sa Comelec, mogawas nga duha ang posibleng atubangon nga kaso sa mga molapas niini.
Kini ang illegal possession ug ang usa ang violation sa gun ban nga nalakip sa omnibus election code.
Dugang pa sa Kalihim, may unom ka bulan hangtud sa unom ka tuig nga pagkabilanggo ang atubangon sa molapas niini.
Mao nga pahinumdom ni Sarmiento sa mga gun owners nga naanad na og bitbit sa ilang mga pusil nga mokuha una og exemption sa Comelec. (ecb/PIA7-Bohol)
by admin | Jan 11, 2016 | Major Events, National News
MANILA, Jan. 11 (PIA)–Nipasidaan sa publiko ang Department of Health (DOH) ug Department of Trade and Industry (DTI) sa mga ginikanan batok sa pagpalit og ‘hoverboard’ alang sa ilang mga anak nga may edad 14-anyos paubos tungod sa peligro ug disgrasyang mahimong ihatag niini sa ilang mga anak.
Nakabutang sa joint advisory nga gi-isyu sa DOH ug DTI, posibleng may dalang peligro sa mga bata ang hoverboard tungod kay nagtangag kini og baterya nga taas ang boltahe nga mokabat sa 36-volt o mas taas pang boltahe.
Lapas na kini sa gitakdang 24 volts nga baterya sa mga electronic toys, aron na usab masiguro ang kahilwasan sa mga bata.
Giingong mahimo usab maka-aksidente ang hoverboard sa mga bata tungod sa ‘unsteady driving position’ niini ug lisud kontrolon ug balansehon nga board.
Una na usab gidili ang pagdala sa mga hoverboard sa pagsakay sa eroplano tungod sa lithium battery niini nga mahimong mag-overheat ug mahimong hinungdan sa sunog ug pagboto.
Matud pa sa DOH ug DTI, sa Estados Unidos nakatala na og pagdaghan sa hoverboard-related injuries niadtong Agosto, 2015 diin apil na niini ang fractures, strains, sprains, contusions, lacerations ug head injuries. (ecb/PIA7-Bohol)
