by admin | Jan 7, 2016 | National News
MANILA, Jan. 07 (PIA)–Giseguro sa Palasyo ang kaandam sa gobyerno nga atimanon ang seguridad sa mga Pilipino sa Tunga-tungang Sidlakan kun mo-grabe pa ang sitwasyon didto tungod sa tensyon tali sa Saudi Arabia ug Iran.
Matud pa ni Presidential Communications Operations Office (PCOO) Kalihim Sonny Coloma, may naandan nang emergency procedure ang Department of Foreign Affairs (DFA).
Apil na niini ang pagsaka sa alert levels sama sa gihimo kaniadto sa pagpabakwit sa mga Pilipino sa Egypt ug Libya.
“Nakig-alayon na usab kita sa nagkalain-laing mga Embahada ug Konsulada sa atong mga higalang nasud. Nasayod man kita nga tali sa Indonesia ug Pilipinas, adunay gipatuman nga kasabotan ug pooling resources tungod lagi sa nahitabong emerhensiya. Kadtong kongkretong pwersa sa atong Embahada nga kasagarang 25 ngadto sa 30 lang ang ilang mga kawani, gi-augment man kini sa mga uban pang opisina.”
“Apan makasiguro kita nga gipangandaman kini ug igo ang resources nato aron makatubag sa bisan unsang emergency,” matud pa ni Coloma.
Dugang pa sa Kalihim, naa sa kapin 2.5 milyon ang gidaghanon sa mga Pilipino sa Middle East ug mga usa ka milyon kanila ang naa sa Saudi Arabia.
Gibutyag pa ni Coloma nga kun pilion sa mga OFWs nga moule ug magpabilin na sa Pilipinas, adunay nakaandam nga programa ang gobyerno alang sa ilang alternatibong panginabuhian.
Tungod usab sa sitwasyon, gikahadlokang maapektuhan ang supply ug presyo sa lana gikan sa tunga-tungang sidlakan.
Apan giseguro sa Palasyo nga bisan kini, ila nang gipangandaman. (ecb/PIA7-Bohol)
by admin | Jan 7, 2016 | National News
MANILA, Jan. 07 (PIA)–Nipasidaan ang Philippine Atmospheric, Geophysical and Astronomical Services Administration (PAGASA) og mas init nga panahon sa mga mosunod nga buwan tungod sa nasinating epekto sa El Niño phenomenon.
Matud pa ni Dr. Flaviana Hilario, acting Deputy Administrator for Research and Development ug Project Manager sa PAGASA, mahimong mas mo-grabe pa ang huwaw sa pagsulod sa ting-init karong tuiga kun itandi sa susamang panahon niadtong 2015.
Giingong posibleng mokabat sa 41.5 degrees celsius ang temperatura sa mga ubos nga lugar sa Luzon sa Mayo samtang gipaabot nga mosaka sa 39.3 degrees celsius sa Visayas sa Pebrero ug 39.5 degrees celsius sa Mindanao sa Marso.
Sa Metro Manila, mahimong mokabat sa 38 degrees celsius ang maximum temperature sa Abril samtang 38.6 degrees celsius sa Mayo.
Nagpasabot kini nga halos hapit na moabot sa record high ang maximum temperature.
Matud pa ni Hilario, gipaabot ang huwaw, below normal level ug alimoot nga temperatura sugod karong bulan sa Enero.
Tungod niini, gi-aghat ni Hilario ang tanan nga pangandaman na ang mga nahisgotan niyang tulo ka epekto sa El Niño nga grabeng masinati sa mga buwan sugod Pebrero taman Abril. (ecb/PIA7-Bohol)
by admin | Jan 6, 2016 | National News
MANILA, Jan. 06 (PIA)–Manghatag ang Department of Health (DOH) og libreng bakuna batok sa makamatay nga rabies sa mga animal bite treatment centers sa tibuok nasud.
Kini aron ipakatap pa ang ilang kampanya ug mapapas ang rabies nga makuha gikan sa pinaakan sa atong mga gi-alimahang hayop partikukar na ang iro ug iring nga hinungdan sa kamatayon sa kapin 220 ka tawo niadtong 2015.
Gibutyag ni DOH Kalihim Janette Garin nga libre nilang ipanghatag ang walo ug kumpletong dose sa bakunang anti-rabies sa 480 ka animal bite treatment centers sa nasud ilabi na sa mga grabeng nanginahanglan niini.
Dungan niini, nanawagan ang Kalihim nga dili gayud angay pasagdan ang pinaakan sa hayop ug moadto dayon sa pinakaduol nga bite center sa higayong mapaakan.
Gikonsiderar sa DOH nga napasagdan na ang sakit sa rabies nga mahimo raman untang mapugngan.
Nipasidaan pa ang DOH sa panglawas sa publiko nga sa higayong manggawas na ang mga sintomas sa sakit, dili na kini mahimo pang tambalan.
Gibutyag ni Garin nga usa pa gihapon ang sakit nga rabies sa nag-unang problema sa panglawas sa tibuok Pilipinas nga naa sa 1,100 na ka mga Pilipino ang nanginahanglan og bakuna matag tuig.
Base sa datos sa DOH, sa kinatibuk-ang 432,458 nga kaso sa mga gipaak og hayop niadtong 2015, 226 niini ang namatay.
Grabeng makamatay ang rabies nga gikan sa laway sa usa ka infected nga hayop nga mapasa sa tawo pinaagi sa pagpaak sa panit sa biktima. (ecb/PIA7-Bohol)
by admin | Jan 6, 2016 | National News
MANILA, Jan. 06 (PIA)–Madayon na sa buwan sa Abril ang paglusad sa kawanangan sa kinaunahang micro-satellite sa nasud.
Matud pa ni Department of Science and Technology (DOST) Executive Director Dr. Carlos Primo, tawgong “Diwata 1” ang maong satellite.
Gamiton ang labing unang Pinoy-made Micro-Sat sa pagbantay sa ruta sa bagyo, surveillance sa atong teritoryo ug pagkuha og hulagway sa mga lugar nga maigo sa kalamidad.
Ang Diwata 1 adunay gibug-aton nga 50-kilogram ug susama lang kadak-on sa usa ka Balikbayan box base sa pasabot ni Dr. Primo.
Hinimo sa mga scientist gikan sa University of the Philippines (UP) nga nagpaka-eksperto pa sa nasud sa Japan ang maong satellite.
Kun malusad na kini sa kawanangan, magpabilin kini didto sa gilay-ong 420-kilometers ibabaw sa atong nasud ug ikaduha kini motuyok matag adlaw sa Pilipinas.
Sa pagkakaron, hapit na usab mahuman ang gihimo nga usa ka Receiving Station sa Subic Zambales nga maoy modawat sa mga impormasyon nga ipadala sa Diwata 1.
Ang nahisgotang labing-unang Micro-Satellite sa nasud nagkantidad og P500 milyon. (ecb/PIA7-Bohol)
by admin | Jan 5, 2016 | National News
MANILA, Jan. 05 (PIA)–Pangunahan na usab sa Department of Science and Technology (DOST) ang tibuok nasud sa pag-obserbar sa ikaduhang National Time Consciousness Week (NTCW) gikan Enero 4 taman 8, 2016 diin gi-awhag ang mga Pilipino sa pagsunod sa oras nga gitakda sa Philippine Standard Time (PhST) nga gihatag sa DOST-Philippine Atmospheric, Geophysical and Astronomical Services Administration (PAGASA).
Kining inisyatiba nagtinguha sa pagmugna og kultura sa pag-disiplina sa mga Pilipino sa pagbag-o gikan sa giingong “Filipino Time” nga naandan na ngadto sa saktong oras isip pagpakita og respeto sa kamahinungdanon sa oras sa ubang tawo.
Matud pa ni DOST Kalihim Mario Montejo, ang oras usa ka kabtangan nga importante kaayo apan kanunay lamang mataligam-an.
“Other than its social and economic value, time is something that can unite us Filipinos,” dugang pa ni Montejo.
Niadtong Enero 2014, gilusad sa DOST ang kampanyang gitawag nga “Juan Time” agig pagdasig sa paggamit sa PhST ug pagtabang sa pagkab-ot sa kultura sa saktong oras pinaagi sa pagsunod sa oras sa PhST sa mga relo, orasan ug bisan sa mga bundy clocks sa mga opisina.
Ang maong kalihokan isip pagsunod sa Republic Act 10535 o ang Philippine Standard Time Act of 2013, nga nagmando sa mga nasudnon ug lokal nga buhatan sa gobyerno, apil na sa mga broadcasting companies sa pagbutang sa PhST sa ilang time sources.
Gilagdaan kini aron mahimong balaod ni Presidente Benigno ‘Noynoy’ Aquino III niadtong Mayo 2013, diin gi-deklarar pinaagi sa RA 10535 ang unang semana matag tuig isip National Time Consciousness Week. (ecb/PIA7-Bohol)
by admin | Jan 5, 2016 | National News
MANILA, Jan. 05 (PIA)–Mapalit na sa nasud sugod sunod semana ang bakuna batok sa dengue.
Matud pa ni Department of Health (DOH) Kalihim Janette Garin, sa Pilipinas lamang gihimo ang tulo ka hugna nga clinical trial alang sa dengue vaccine, indikasyon nga maayo gayud ang mga Pinoy researcher.
Giingong nigahin og P3 bilyon ang gobyerno sa 2016 national budget alang sa maong bakuna.
Gipahayag ni Garin nga sa pagkakaron, taas ang presyo sa dengue vaccine tungod kay ang kumpanyang Sanofi Pasteur lamang ang naghimo niini.
Matud pa nga nahatagan lamang og diskwento ang Pilipinas sa dihang nagpulong ang Department of Finance ug mga executive sa Sanofi sa APEC Summit niadtong Nobyembre.
Ug dugang 34 porsiyento usab ang gihatag human makahinabi ni PNoy ang usa pa ka opisyal sa maong kumpanya sa France.
Samtang gi-aprobahan na ni PNoy ang pagdumala sa DOH sa libreng bakuna sa dengue alang sa mga kabos nga estudyante sa mga pampublikong tunghaan nga nahimutang sa mga lugar nga adunay taas nga kaso sa dengue.
Matud pa ni Garin nga ihatag ang libreng bakuna sa dengue sa mga estudyanteng grade 4 taman grade 5 o sa mga batang may edad 9 taman 10 anyos o may kinatibuk-ang 1,077,000 ka bata sa National Capital Region, Region 3 ug 4-A.
Gitakda ang vaccination o pagbakuna sa mga buwan sa Marso ug Setyembre ning kasamtangang tuig.
Apan gipasabot sa Kalihim nga kinahanglang ibaligya ang ubang bakuna sa mga pribadong pasyente aron mapondohan ang nahisgotang programa. (ecb/PIA7-Bohol)
