by admin | Dec 28, 2015 | National News
MANILA, Dec. 28 (PIA)–Gi-isa na sa Bureau of Fire Protection (BFP) sa red alert status isip parte sa pagpangandam sa mga sunog nga posibleng mahitabo sa pagsugat sa Bag-ong Tuig.
Human niini, miingon ang tigpamaba sa BFP nga si Superintendent Renato Marcial nga sama sa Department of Health (DOH), suportado usab nila ang sugyot nga total ban sa tanang matang sa paboto.
Matud pa ni Marcial nga sa mga syudad sa Davao ug Muntinlupa, epektibong napatuman ang total ban sa mga paboto alang sa kaluwasan sa ilang mga konstituwente.
Gidugang ni Marcial nga mas makaayo ang pagtakda og usa ka lugar sa mga lokal nga kagamhanan aron didto ipahigayon ang fireworks display diin mga eksperto lamang ang mogunit sa mga paboto ug fireworks.
Pila ka adlaw sa dili pa isaulog ang Pasko ug Bag-ong Tuig, sunod-sunod nga mga sunog nga mahitabo sa ubang parte sa kaulohan ug bisan sa mga lalawigan.
Pagmatuod niini matud pa sa BFP, ang datos sa mga insidente sa sunog nga natala karong tuig nga mas taas na og 1,500 kun itandi sa natala niadtong 2014. (ecb/PIA7-Bohol)
by admin | Dec 28, 2015 | National News
MANILA, Dec. 28 (PIA)–Nanghinaot ang Malakanyang nga suportahan unta sa publiko ang kampanya sa Department of Health (DoH) batok sa paggamit og paboto sa pagsugat sa Bag-ong Tuig sa nasud.
Gidasig hinuon sa Malakanyang ang publiko nga magpahigayon na lang og party sa kalsada imbes nga magpaboto sa pagsugat sa Bag-ong Tuig.
Kumbinsido si Presidential Communications Operations Office (PCOO) Kalihim Herminio Coloma Jr. nga kun magsaba-saba lang sa kalsada ang mga tawo, malayo sila sa peligro kaysa mogamit sa makadaot nga paboto.
“Sa pagpanguna sa DOH ubos sa kampanyang “Tetano: Nakamamatay, Huwag Pasaway; Sa Paputok May Goodbye” subli natong gipahinomdoman ang katawhan, ilabi na ang mga ginikanan nga bantayan ang ilang mga anak sa paggamit sa mga paboto ug aghaton silang mogamit nalang og mga alternatibo ug luwas nga pamaagi sa pagsaba-saba sama sa torotot, musika, kaldero ug bisan ang pagpahigayon og kasadya sa kalsada o ‘street parties’ isip pagsugat sa Bag-ong Tuig,” hangyo ni Coloma.
Matud pa, padayon ang pakiglambigit sa DOH sa uban pang ahensya sa gobyerno sama sa Department of Interior and Local Government (DILG), Department of Trade and Industry (DTI) ug Philippine National Police (PNP) aron mapugngan pa ang pagbaligya og ilegal nga paboto, makuhaan ang mahimong biktima niini ug mapa-amgo sa mga ginikanan ang kakuyaw nga dala sa mga paboto sa kinabuhi sa ilang mga anak. (ecb/PIA7-Bohol)
by admin | Dec 23, 2015 | National News
MANILA, Dec. 23 (PIA)–Nipahinomdom ang Department of Trade and Industry (DTI) sa mga mamamalit nga susihon gayud ang expiry dates o shelf life sa mga palitong produkto nga pang-noche buena.
Matud pa sa abiso nga gipagawas sa DTI, sa dili pa paliton ang produkto, kinahanglang susihon gayud sa mga mamamalit ang expiry date o ‘best before date’ ug bisan ang price tag sa mga produktong pang-noche buena ilabi na ang hamon.
Giingong angay siguradohon sa mga mamamalit nga ang shelf price sa item susama sa presyo sa kahera tungod na usab sa gidaghanon sa mga produktong midagsang karon tungod sa holiday ug mahimong masayop o masipyat sa pricing o sa presyo.
Apil sa gitutokan sa price monitoring sa DTI ang hamon, fruit cocktail, keso ug keso de bola, palamat, pan, mayonnaise, spaghetti ug pasta, elbow ug salad macaroni, spaghetti sauce, tomato sauce ug creamer.
Una nang namaskil ang DTI sa mga poster nga nagbutang sa suggested retail price (SRP) sa mga produktong pang-noche buena sa mga establisimento aron mahimong giya di lamang sa mga mamamalit apan apil na usab sa mga retailers o nagtinda. (ecb/PIA7-Bohol)
by admin | Dec 23, 2015 | National News
MANILA, Dec. 23 (PIA)–Posibleng mapalit na sa mga botika sugod sunod tuig ang bakuna batok sa dengue.
Matud pa ni Department of Health (DOH) Kalihim Janette Garin, sa dili pa matapos ang tuig, ipagawas na nila ang pag-aprubar sa Food and Drug Administration (FDA) alang sa pagbaligya og bakuna batok sa dengue.
Sukad lamang Enero hangtud Disyembre, nakatala na og kapin 100,000 ka kaso sa dengue ang DOH, diin 300 niini ang naule sa kamatayon.
Ang Pilipinas ang ikaduhang nasud nga magbaligya og anti-dengue vaccine sunod sa Mexico.
Ning Disyembre lamang, gi-aprubahan na sa Mexico ang pagbaligya og dengvaxia, usa ka anti-dengue vaccine nga hinimo sa Sanofi, usa ka French pharmaceutical company. (ecb/PIA7-Bohol)
by admin | Dec 21, 2015 | National News
MANILA, Dec. 21 (PIA)–Gisaka na sa code white alert sa Department of Health (DOH) ang tanang mga ospital niini sa tibuok nasud sugod karong adlawa, Disyembre 21.
Matud pa ni DOH Kalihim Janette Garin, kini isip parte sa ilang pagpangandam alang sa posibilidad nga mosaka ang gidaghanon sa mga magkasakit tungod sa bugnaw nga panahon.
Pasabot ni Garin, mas daku ang posibilidad nga maigo sa ubo, sip-on, hilanat ug trangkaso ang mga bata ug mga tigulang.
Tungod niini, gipahinomdoman sa DOH ang publiko nga hingosgan ang resistensiya ug mokaon og mga masustansiya nga pagkaon aron makalikay sa mga sakit karong tingtugnaw.
Kun naa sa white alert status, tanang hospital personnel naka standby alang sa deployment ug augmentation kun kinahanglan ang dugang medical services.
Una niini, nag-andam na usab ang DOH ug uban pang ahensiya sa gobyerno alang sa posibleng mabiktima sa paboto ug saag nga bala dungan sa pagsaulog sa Pasko ug pagsugat sa bag-ong tuig. (ecb/PIA7-Bohol)
by admin | Dec 21, 2015 | National News
MANILA, Dec. 21 (PIA)–Gi-aprobahan ni Presidente Benigno ‘Noynoy’ Aquino III ang suspension of military operations (SOMO) sa Armed Forces of the Philippines batok sa New People’s Army.
Matud pa ni Presidential Communications Operations Office (PCOO) Kalihim Sonny Coloma, magsugod ang maong unilateral ceasefire sa Disyembre 23, sa alas-12:01 sa buntag, hangtud Enero 3, 2016 sa alas-11:59 sa gabii.
Niadtong Disyembre 15, ang departamento sa depensa mirekomendar kang Presidente Aquino sa pag-aprobar sa SOMO batok sa mga komunistang rebelde.
Tumong sa gideklarang SOMO sa New People’s Army (NPA) nga makauban usab sa mga sundalo ang ilang mga mahal sa kinabuhi sa tradisyunal nga pagsaulog sa Pasko ug Bag-ong Tuig.
Niadtong Martes lamang, nagdeklarar usab ang NPA og unilateral ceasefire nga magsugod usab sa Disyembre 23 hangtud Enero 3 isip pakighiusa sa pagsaulog sa holiday season.
Kini nagpasabot nga ihunong nila ang binsan unsang operasyon batok sa mga pwersa sa gobyerno. (ecb/PIA7-Bohol)
