by admin | Jul 14, 2015 | Headlines, National News
MANILA, July 14 (PIA)–Nanawagan ang Catholic Bishops Conference of the Philippines (CBCP) sa katawhan nga mag-ampo sa Oratio Imperata o Obligatory Prayer kalabot sa krisis nga gi-atubang sa Pilipinas sa West Philippine Sea.
Gihimo ni CBCP President Archbishop Socrates Villegas ang panawagan human sa ika-111 CBCP plenaryo diin gitoki sa mga obispo ang pipila ka mga kontrobersyal nga isyu karon sa nasud.
Matud pa ni Villegas, kinahanglang manghilabot ang Simbahang Katoliko sa isyu tungod sa posibilidad nga mo-grabe pa ang tensyon sa gi-ilogang teritoryo ug mabutang sa kakuyaw ang kalinaw.
Gitumbok sa arsobispo nga kalinaw ang nag-unang misyon sa Simbahan.
Matud pa nga walay gahom ang Simbahan nga makipag-negosasyon sa mga superpower o gamhanang mga nasud o di kaha i-representar ang Pilipinas sa international court apan mahimo man nilang hangyuon ang Ginoo nga panalipdan ang Pilipinas.
Sa Oratio Imperata, kauban sa i-ampo ang kahilwasan sa mga Pilipino gikan sa ‘manmade disaster’ apil na sa marine environment.
Samtang una nang gipahayag sa Department of Foreign Affairs (DFA) nga sulod sa tulo ka buwan, mahimo nang ipakanaug sa United Nations tribunal ang desisyon niini sa hisgotanan sa hurisdiksiyon sa kaso sa Pilipinas nga mi-kuwestiyon sa halapad nga pag-angkon sa China sa South China Sea.
Matud pa ni DFA spokesman Charles Jose, kini ang banabana sa abogado sa Pilipinas nga si Paul Reichler base sa naunang mga kasong gigunitan sa Permanent Court of Arbitration nga naka-base sa Hague ug nag-dungog sa petisyon sa Pilipinas.
Miadto sa Hague ang mga opisyal sa Pilipinas nga suportado sa mga international maritime ug international law experts aron kumbinsihon ang korte nga gunitan ang kaso taliwala sa pagsupak sa China. (ecb/PIA7-Bohol)
by admin | Jul 14, 2015 | National News
karong panahon na sa ting-ulan
MANILA, July 14 (PIA)–Sa pagsulod sa panahon sa ting-ulan, nipasidaan ang Department of Health (DOH) batok sa mga water-borne diseases ilabi na sa dengue ug leptospirosis apil na ang diarrhea.
Matud pa ni Dr. Lyndon Lee Suy, tigpamaba sa DOH nga human masinati ang mga pagbaha, angay hinluan dayon sa publiko ang gibahang kabalayan.
Giingong angay seguradohon nga limpyo ang mga kagamitan, ilabay na ang mga pagkaon nga gibaha tungod kay kontaminado na kini og mikrobyo ug tan-awon ang palibot alang sa mga posibleng breeding site sa mga lamok nga may dalang dengue.
Gi-angkon sa DOH nga daghang lugar ang kanunay bahaon ug adunay pipila nga dili malikayan nga mosuong sa tubig-baha mao nga tambag sa ahensya nga gahinan ang pagbaton og botas aron makalikay sa leptospirosis.
Giingong kun mosuong sa tubig-baha, angay siguradohong mag-limpyo og maayo sa lawas.
Hugot usab nga gidili sa mga adunay samad sa tiil sa pagsuong sa baha tungod kay giingong siguradong makakuha og leptospirosis diin sa samad sa tawo mosulod ang mikrobyo. (ecb/PIA7-Bohol)
by admin | Jul 14, 2015 | Headlines, National News
MANILA, July 14 (PIA)–Natudlong bag-ong hepe sa Philippine National Police (PNP) si Director Ricardo Marquez, hepe sa Directorate for Operations.
Mismong si Interior Secretary Mar Roxas ang ni-anunsyo sa appointment ni Marquez sa pag-atubang niini sa media ganinang buntag, Hulyo 14 sa Camp Crame, syudad sa Quezon.
Si Marquez usa ka two-star general ug miyembro sa Philippine Military Academy (PMA) class of 1982 ug mi-alagad isip Regional Director sa Region 1 o Ilocos Region.
Nahimo usab nga dako ang papel ni Marquez sa paghikyad sa seguridad sa pagbisita ni Pope Francis sa nasud niadtong Enero.
Pulihan ni Marquez si PNP officer in charge Deputy Director General Leonardo Espina nga gitakdang mo-retiro sa Huwebes, Hunyo 16.
Nikabat sa pito ka bulan nga walay permanenteng PNP chief human masuspinde ug padayon nang natangtang sa serbisyo si kanhi PNP chief Alan Purisima.
Lima ang gi-pilian isip PNP chief. Apil sa mga kaubang gi-konsiderar isip PNP chief silang Deputy Director General Danilo Constantino, chief directorial staff; Deputy Director General Marcelo Garbo, deputy PNP chief for operations; ang gisibak sa serbisyo nga si Chief Superintendent Raul Petrasanta; Police Director Benjamin Magalong, Crime Investigation ug Detection Group chief; ug Police Director Juanito Vaño, directorate for logistics head.
Gitakdang moretiro si Marquez sa Agosto 26, 2016. (ecb/PIA7-Bohol)
by admin | Jun 30, 2015 | Headlines, National News
MANILA, June 29 (PIA)–Nagpagawas ang Bureau of Immigration (BI) og sumbanan sa pag-isyu og visa waiver sa mga langyaw human wala na kini dawata sa Department of Foreign Affairs (DFA).
Matud pa ni Atty. Elaine Tan, tigpamaba sa BI, tuyo niining sumbanan nga mapadali ang pag-isyu og visa waiver request nga ginaandam sa ahensya.
Una nang gipahibalo ni Foreign Affairs Assistant Secretary Wilfredo C. Santos nga dili na modawat pa ang visa section sa DFA og visa waiver requests ug ihatag na lamang kini sa BI.
Ubos sa Operations Order No. SBM-2015-016, o “Processing of Requests for Recall Exclusion of and/or Visa Waiver for Excluded Aliens”, ang tanang mga langyaw nga gustong musolod sa nasud apan gipugngan, kinahanglang moduso sa mga gikinahanglang dokumento sa Central Receiving Unit sa BI sulod sa 12-oras human madawat ang Exclusion Order.
“Visa waivers may be issued to foreign nationals who have been excluded for failure to present an entry visa to the Philippines, based on the following considerations: Visa-required minors or infants accompanied by or returning to a Filipino parent; Visa-recruited foreign nationals related by blood or affinity to a Philippine citizen; Visa-required foreign nationals married to a Philippine citizen and qualified dependents below 18 years of age; at other meritorious cases as may be considered”.
Human makumpleto ang mga gipangayong dokumento, dinhi lamang mahimong mobayad ang mga langyaw nga mokabat sa P5,000. (ecb/PIA7-Bohol)
by admin | Jun 16, 2015 | Headlines, National News
MANILA, June 15 (PIA)–Nipahinomdom ang Department of Health (DOH) sa mga school administrators nga hugtanong ipatuman ang ‘No Smoking Policy’ sa mga tunghaan ug unibersidad.
Matud pa ni DOH Kalihim Janette Garin, ang mga magtutudlo ang angay nga mahimong maayong ehemplo o role models sa mga kabataan ilabi na sa pagsiguro sa 100% smoke free schools apil na usab ang pagsiguro nga walay mga sigarilyong ibaligya 100 meters gikan sa school perimeter.
Gi-aghat ni Garin ang publiko nga isumbong sa ilang buhatan kun adunay molapas sa maong balaod ug giingong ila kining i-refer sa Department of Trade and Industry (DTI) nga maoy adunay gahom nga mopahamtang og silot sa mga nilapas sa maong balaod.
Base sa Tobacco Act, pahamtangan og multa nga P500 taman P400,000 ang bisan kinsang masakpang magbaligya og sigarilyo duol sa school premises ug mahimong mabilanggo og 30 ka adlaw taman 3 ka tuig gawas pa nga kanselahon ang ilang business permit.
Base sa datos sa DoH, daghan pa gihapon ang nanigarilyo bisan sa aktibong kampanya batok sa bisyong panigarilyo tungod sa epekto niini sa panglawas.
Karong bulan sa Hunyo, gisaulog ang No Smoking Month mao nga subling nanawagan ang DOH sa mga nagbisyo og panigarilyo nga undangon na kini.
Matud pa ni Garin, 10 ka Pinoy matag oras ang nangamatay matag adlaw tungod sa dautang epekto sa panigarilyo mao nga panahon na aron molikay niini.
Giseguro sa DoH nga padayon ang kampanya niini batok sa panigarilyo nag-una na niini ang mas gihingosgan nga information campaign apil na usab ang pagsulong sa smoking ban sa mga pampublikong lugar ug pagbaton og smoking cessation programs alang sa mga gusto nang molikay sa bisyo. (ecb/PIA7-Bohol)
by admin | Jun 16, 2015 | National News
MANILA, June 10 (PIA)–Giseguro sa Malakanyang nga gi-atiman na sa gobyerno ang mga problema sa penal system sa nasud.
Kini ang tubag sa Malakanyang sa panawagan sa usa ka magbabalaod nga i-audit ang mga detention facility tungod kay gawas nga huot na, daghan na usab ang mga overstaying nga inmates.
Matud pa ni Presidential Communications Operations Office (PCOO) Kalihim Sonny Coloma, gi- atiman na sa Department of Justice (DOJ) ang kahimtang sa mga bilanggoan ubos sa Bureau of Corrections.
Gibutyag usab ni Coloma nga adunay plano ang gobyerno nga magpatukod og usa ka bag-ong nasudnong bilanggoan pinaagi sa Public-Private Partnership aron matarong ang kondisyon sa mga bilanggoan.
Kalabot niini, miingon si Coloma nga gi-andam na ang competitive bidding alang sa planong itukod nga bag-ong national penitentiary. (ecb/PIA7-Bohol)
