TAGBILARAN CITY, Bohol, Jan. 09 (PIA)–Natumbok ang Chocolate Hills sa lalawigan sa Bohol isip usa sa angay bisitahon sa mga turista sa tibuok kalibotan.
Kini human nasulod ang Pilipinas sa Top 10 Countries nga angay suroyon sa tibuok kalibotan matud pa sa Rough Guides, usa ka travel guidebook sa nasud sa Bretanya.
Gawas sa Chocolate Hills sa Bohol, gitumbok usab sa Rough Guides ang mga maanindot nga lugar sa Pilipinas nga agay adtuon sama sa Boracay, El Nido nga limestone islands sa Palawan, ang mga baybayon sa Coron sa Palawan usab ug ang mga dalampasigan sa Puerto Galera sa Mindoro.
Naapil usab ang perfectly coned nga Bulkang Mayon sa Kabikulan ug ang mga lawa sa kabukiran sa Mt. Pinatubo, nga matud pa sa Rough Guides nga dili angay sipyaton sa pagsuroy kun moduaw sa Pilipinas.
Gawas sa mga maanindot nga lugar, mahimo usab makighiusa sa mga tradisyon ug mga mabulokon nga pista sa nasud sama sa Ati-Atihan Festival sa Panay aron makita ang mga tradisyunal nga mga sapot ug sayaw, sumala pa sa travel advisor.
Ang uban pang mga nasud nga nasulod sa listahan sa Top 10 sa Rough Guides mao ang Georgia, Turkey, Macedonia, Japan, Rwarna, Ehtiopia, Brazil, Bulgaria ug Madagascar.
Daku kini kaayong tabang sa turismo sa Bohol human naigo ang lalawigan sa magnitude 7.2 nga linog niadtong Oktubre 15 nga nakapahugno sa daghang simbahan, taytayan, tunghaan ug mga panimalay.
Nagtinguha karon ang mga kadagkuan sa lalawigan sa Bohol sa pagpanguna ni Gob. Edgar Chatto sa agresibong pag-promote sa Bohol isip makasaysayanong destinasyon human sa linog samtang ipahigayon sa Philippine Travel Agencies Association sa SMX Convention Center sa syudad sa Pasay karong Pebrero 14-16 ang ika-21 nga Travel Tour Expo. (PIA7-Bohol/ECB)
