TAGBILARAN CITY, Bohol, Oct. 11 (PIA)–Gitataw ni Commission on Election (Comelec) Chairman Sixto Brillantes nga kadtong mga lehitimong media practitioners lamang ang mahatagan og higayon nga makabotar ubos sa early voting for media sa 2013 midterm elections.
Matud pa ni Brillantes, mo-agi sa hingpit nga proseso ang pagtumbok sa mga tinuod nga mamamahayag tungod kay posibleng adunay mopahimos sa maong proseso.
Bisan pa niini, itakda pa ang paghipno sa implementing rules and regulations (IRR) kalabot sa early voting sa mga media aron mahimong sumbanan sa media entity, broadcast, print ug bisan sa mga online media.
Gibutang usab sa Comelec en banc ang local absentee committee aron maoy mohimo sa paghipno sa pag-usab sa IRR. (PIA-Bohol/ecb/I-gg)
Voter’s registration status, mahimo nang susihon sa internet
TAGBILARAN CITY, Bohol, Oct. 11 (PIA)–Mahimo nang susihon pinaagi sa Internet ang registration status sa usa ka botante.
Sa opisyal nga Twitter account ni Commission on Elections (Comelec) Chairman Sixto Brillantes, gipa-ambit niini ang site nga http://www.comelec.gov.ph/?r=precinct_finder diin mahibaw-an dayon ang polling center, precinct number ug uban pang impormasyon kalabot sa voter’s registration.
Gipahinumdom usab ni Brillantes nga deactivated na ang voter’s registration sa mga botanteng wala nakabotar og duha ka sunod-sunod nga eleksyon.
Kini nagpasabot nga kinahanglang i-reactivate sa mga wala nakabotar niadtong Mayo 10, 2010 ug Oktubre 25, 2010 elections ang ilang status aron makabotar sa 2013.
Gibalik usab og pahinumdom sa Comelec nga hangtud Oktubre 31 lang ang voter’s registration ug dili na kini lugwayan pa.
“There will be NO EXTENSION after October 31, 2012 as we already need to finalize the number of ballots to be printed, among others. Oct. 31, 2012 is also the deadline for transfer of registration, validation of registration & reactivation of deactivated registration.”
Tambag ni Brillantes sa mga kwalipikadong botante nga dili na paabuton pa ang katapusang adlaw sa registration.
Abli ang buhatan sa Comelec gikan sa adlaw nga Lunes hangtud Sabado, apil na ang holidays, gikan alas-8:00 sa buntag hangtud alas-5:00 sa hapon. (PIA-Bohol/ecb/I-hd)
