GAWAS sa kamatayon o diskwalipikasyon na lamang mamahimong pulihan ang usa ka kandidato, kini maoy sugyot sa Commission on Elections (Comelec) samtang ipatuman ang automated elections sa 2010.
Kini usab aron ka-amendahan na sa Kongreso ang balaod subay ning hisgutanan.
Sa Omnibus Election law, ang ngalan sa ipuli kinahanglang isuwat kinamot, apan kini mahimong dili mabasa sa makina ug mamahimo na hinuong suliran, butyag ni Commissioner Jose Melo.
Sa samang balaod, mahimong kapulihan ang kandidato sa adlaw sa piliay.
Apan sa sugyot sa COMELEC, kon dili lang sa hisgutanan sa kamatayon o diskwalipikasyon, dili na mapulihan ang kandidatong nakalista. (PIA)
