MANILA, Jan. 14, 2014 (PIA)–Atubangan sa gibutyag sa Commission on Election (Comelec) nga milyon-milyong voters identification card (ID) ang wala pa gi-claim ug anaa lamang sa ilang mga buhatan, nihatag sila og mga pamaagi unsaon kini pagkuha sa mga botante.
Matud pa sa tigpamaba sa Comelec nga si Atty. James Jimenez, daghang bontante ang adunay sayop nga pagtuo nga ipadala lamang sa ilang panimalay ang ilang mga voter’s ID.
Gibutyag ni Jimenez nga dili usab kini makuha sa barangay apan ang pag-claim niini adto mismo sa buhatan sa election officer.
Giingong andam na ug mahimo nang makuha ang mga ID sa mga botante nga nagparehistro niadtong tuig 2004 ug 2010.
Samtang gi-proseso pa ang voters ID sa mga nagpa-rehistro sukad tuig 2011.
Mahimo usab mobisita sa website sa Comelec nga www.comelec.gov.ph ug susihon kun na-imprenta na ang inyong ID.
Kini pinaagi sa pag-click lamang sa “Precinct Finder and ID Priting Status Checker” sa wala nga bahin sa page.
Human masulat ang mga gipangayong impormasyon, i-click lamang ang “search”.
Kun makita sa website nga na-imprenta na ang inyong ID, mahimong motawag sa buhatan sa Comelec kun asa ka nagparehistro aron matino kun mahimo na kining makuha.
Alang usab sa mga adunay social media accounts, mahimong tan-awon kun na-imprenta na ang inyong ID pinaagi sa Twitter page nga @comelec.
Mahimo usab motawag sa Comelec hotline nga (02) 525-9294 o sa lokal nga buhatan sa Comelec dinhi sa lalawigan sa Bohol sa 501-8339 alang sa uban pang pangutana.
Aron usab mas daling matubag ang mga pangutana sa publiko, gi-andam na karon sa Comelec ang ilang text line ug ang pagmantala sa listahan sa mga mahimo nang mokuha sa ilang voters ID. (PIA7-Bohol/ECB)
