TAGBILARAN CITY, Bohol, Feb. 12 (PIA)–GIPAHAYAG ni Presidente Benigno “Noynoy” Aquino III nga posibleng malagdaan na ang comprehensive peace agreement tali sa gobyerno ug Moro Islamic Liberation Front (MILF) sa Marso.
Gipakita sa Presidente nga seryoso kining tapuson na ang rebelyon sa Mindanao sa iyang pagduaw sa labing unang higayon sa kampo sa MILF sa Sultan Kudarat kagahapon.
Sa usa ka panayam human gilusad kagahapon ang Sajahatra Bangsamoro sa Sultan Kudarat, Maguindanao, wala gibutyag sa Presidente ang eksaktong petsa sa paglagda apan mi-ingon kining posibleng sa dili pa matapos ang Marso.
Giingong walay imposible kun tanan nagtinguha sa tinuoray nga kalinaw ug paglambo sa Mindanao.
Kalabot usab sa komposisyon sa transition commission, miingon ang Presidente nga posibleng makapili na siya sulod ning semanaha.
Ang matudlong transition commission ang mohipno sa draft sa Bangsamoro basic law nga ihulip sa balaod nga nimugna sa Autonomous Region in Muslim Mindanao (ARMM). (PIA-Bohol/ecb/i-sjp)
Palasyo, masaligon nga makab-ot ang 7-M job target sa turismo sa 2016
TAGBILARAN CITY, Bohol, Feb. 12 (PIA)–MASALIGON ang Malakanyang nga makab-ot sa gobyerno ang target nga pito ka milyong trabaho sa turismo nga gitakda sa Department of Tourism sa paghuman sa termino ni Presidente Benigno “Noynoy” Aquino III sa 2016.
Matud pa ni Deputy Presidential Spokesperson Abigail Valte, apil sa gisaligan sa gobyerno ang sektor sa turismo ug agribusiness aron makamugna og mga dugang trabaho sa nasud.
“Tourism and agribusiness are just (among) sectors that the economic cluster is looking at to generate high employment,” pamahayag ni Valte.
Una niini, miingon si Tourism Secretary Ramon Jimenez Jr. nga mahimong makamugna og pito ka milyong trabaho ang gihikyad nga National Tourism Development Plan ug padayon nga pagsaka sa mga turista sa nasud sa pag-abot sa 2016.
Niadtong 2012, mikabat sa 4.272 milyon ang mibisitang mga turista sa nasud, mas taas sa 9.07 kun itandi sa natala niadtong 2011.
Pinakadaghang turista nga mibisita sa nasud ang naggikan sa Korea nga mikabat sa kapin usa ka milyon, gisundan sa Estados Unidos (625,626) ug ikatulo ang Japan (412,474). (PIA-Bohol/ecb/p-ed)
