MURAG dagok sa Simbahang Katoliko ang giingong nahimong pahayag ni Pope Benedict XVI nga may mga benepisyo usab nga makuha sa paggamit og condom, bisan pa sa hugot nga pagbabag niini sa Simbahang Katoliko.
Base sa taho sa Associated Press, gihimo sa Santo Papa ang giingong komento sa usa ka German book nga gipanguluhan og “Light of the World: The Pope, the Church and the Signs of the Times” nga gikatakdang ipagawas ning buwana.
Sa maong taho, giingong namahayag si Pope Benedict XVI nga dili moral solution ang paggamit sa condom aron mapugngan ang pagkatap sa makatakod nga sakit nga AIDS apan adunay mga higayon nga mapahimuslan kini sama na lang sa mga prostitute.
Sukwahi usab kini sa naunang pahayag sa Santo Papa sa pagbisita niini sa Africa sa niaging tuig diin kusganon niyang gipahayag nga dili ang pagpanghatag og condom ang tubag sa pagkatap sa sakit nga AIDS apan nagdugang lamang kini sa pagdaku sa problema.
Isip reaksiyon, wala nituo sa giingong pamahayag ang ubang Obispo sa Simbahang Katoliko sa Pilipinas ug niingon nga posible daw nga gihimo lamang kini aron ibagsak ang simbahan. Dugang pa nila, imposibleng muluwat sa maong pamahayag ang Santo Papa tungod kay sukwahi kini sa gitudlo sa simbahan. (PIA)
