MANILA, Mar. 18, 2014 (PIA)–Daghang benepisyo ang makuha sa Pilipinas kun madayon na ang kasabotan kalabot sa dugang rotational presence sa mga sundalong Amerikano sa nasud.
Matud pa ni Presidential spokesman Edwin Lacierda, ang kasabotang nauyonan tali sa Estados Unidos sama sa Visiting Forces Agreement ug Mutual Defense Treaty siguradong makatabang sa Pilipinas sa larangan sa technology transfer ug disaster response.
Giingong ang rason nganong makatabang kini mao ang pagbaton og technology transfer, apil na usab ang pagbayloay og kahibalo sa mga sundalong Amerikano ug Pilipino sa himuon nilang dungan nga pagbansay-bansay.
“Pabubutihin nito ang kakayahang magtanggol ng Pilipinas sa pagiging handang lagi. Itulot ninyong bigyang diin ko na ang isang bahagi ng rotational presence na ito sa kasalukuyan ay ang pagtutuon ng pansin sa pagiging handa sa panahon ng kalamidad at kung paano mababawasan ang kalamidad,” matud pa ni Lacierda.
Nakita sa gobyerno sa Pilipinas ang dakung kabag-ohang mahitabo kalabot sa ‘increased rotational presence’, ilabi na sa dihang mipadala ang tropang Amerikano sa mga kagamitan niini sa Central Visayas sa dihang gihasi kini sa labing kusog nga bagyong Yolanda.
Nipadala ang Estados Unidos og mga bapor, eroplano, helikopter ug militaty vehicles aron tabangan ang gobyerno sa paghatud sa mga relief goods, supplies ug equipment sa mga naapektuhang dapit sa Visayas region.
Samtang giingong dili na kinahanglan pang ratipikahan sa Senado ang bag-ong pagdugang sa rotational presence pact sa Estados Unidos. (PIA7-Bohol/ECB)
