BOHOL, April 15 (PIA)–Uban sa mapa ug mga LED nga suga, ma-monitor na karon sa mga Bol-anon ang kalamboan sa mga proyekto sa Department of the Interior and Local Government (DILG) nga Bohol Earthquake Assistance (BEA) repair and reconstruction.
Uban sa Bohol city, municipal ug provincial governments, si DILG Kalihim Mar Roxas mi-presentar sa gitawag nga “City of Lights.”
Usa kini ka project monitoring tool nga mag-determinar sa estado sa nagkalain-laing BEA projects sa lalawigan human gitay-og sa 7.2 magnitude nga linog ang lalawigan sa Bohol ug ubang parte usab sa Sugbo niadtong Oktubre 15, 2013.
Gibuksan ni Roxas ang geographical representation atol sa iyang pagbisita sa lungsod sa Sagbayan niadtong Martes diin gitukod ang public market sa maong lungsod nga nagkantidad og P52 milyon ug nagpadayon usab ang pag-ayo sa ilang civic center nga nagkantyidad og P23.4 milyon.
“Gusto nating makita ng taumbayan na nagagastos nang maayos ang buwis na ibinabayad nila”, matud pa ni Roxas.
Sa pagkakaron, 57 ka repair projects nga may suma-total nga P9.7 milyon ang nahuman na. Tulo niining proyekto ang sa lalawigan sa Sugbo nga naapektuhan usab sa maong linog.
Giseguro ni Roxas nga ang P327.75 milyon gikan sa pondo sa BEA-DILG gastohon gayud aron mahuman ang nagpabiling 8 ka proyekto sa Sugbo ug 198 ka repair ug reconstruction nga proyekto sa Bohol ug uban pang nakalinyang proyekto.
Sa kinatibuk-an, labaw sa P2.4 bilyon ang gigahin alang sa rehabilitasyon sa labaw sa libo ka proposed repair ug reconstruction projects nga gi-proseso ug gi-subli na sa DILG.
Ang maong geographical representation gidala sa provincial capitol aron makita sa publiko. (ecb/PIA7-Bohol/with reports from DILG)
