MANILA, October 10 (PIA)–Nipasidaan ang Department of the Interior and Local Government (DILG) nga wala sila’y gihatagan og awtoridad nga bisan unsang organisasyon nga mag-rekomendar o endorsar og indibidwal isip officer-in-charge (OIC) sa barangays nga mohulip sa mga kapitan sa barangay nga mahuman na ang ilang ternimo karong tuiga.
Matud pa ni DILG Kalihim Ismael Sueno, nakadawat og taho ang ilang buhatan nga usa ka organisasyon nga gitawag og National Interfaith Council of the Philippines (NICOPHIL) ang giingong nigamit sa pangalan sa buhatan sa DILG sa pag-aghat sa mga indibidwal sa pagsumitir og resumes isip mangindahay nga barangay captains.
“Do not be deceived by any group or individual that is using the name of the DILG to give false hopes about being OICs in the barangays,” matud pa ni Sueno.
“The DILG is not in any way connected to NICOPHIL nor have we authorized the said group to recommend OIC barangay captains,” dugang pa sa Kalihim.
Ning bag-o lang, ang Kalihim sa DILG mipadayag sa iyang pag-uyon sa pag-appoint og OIC-barangay captains kun i-oktaba ang gitakdang Barangay ug Sangguniang Kabataan (SK) election karong Oktubre 31 ning tuig.
Sa pagkakaron, wala pa gilagdaan ni Presdiente Rodrigo Duterte ang balaod nga mag-oktaba sa maong barangay ug SK eleksiyon.
Matud pa ni Sueno, giingong nangita ang NICOPHIL og 50,000 ka mga OIC applicants sa tibuok nasod aron ihulip sa mga mabakanteng posisyon sa mga barangay.
Giingong ang maong grupo nihatag sa ilang email address nga neccnicophil@gmail.com diin didto ipadala ang resume sa mga interesadong aplikante taman Oktubre 09, 2016.
Nangayo na karon og tabang ang DILG sa Philippine National Police (PNP) aron susihon kining maong taho ug aron manguha og ibedensiya aron magamit sa pagpasaka og kaso tungod sa pagpangilad.
Gi-awhag usab ni Sueno ang publiko sa pagpahibalo sa DILG ug sa mga rehiyonal nilang buhatan sa bisan unsang kasayoran kalabot niining grupo nga nanghatag og bakak nga pasalig nga mahimong barangay OICs. (ecb/PIA7-Bohol)
