TAGBILARAN CITY, November 8 (PIA)–May maayong balita alang sa 720,000 ka public school teachers sa tibuok nasod.
Kini tungod kay sa dili pa matapos ang tuig, gipaabot nga dobleng Christmas bonus ang madawat sa mga magtutudlo kun itandi sa nadawat nila sa niaging tuig.
Matud pa sa Teachers’ Dignity Coalition (TDC), mokabat gikan P34,000 hangtud P64,000 ang mga madawat nga bonus sa mga public school teachers karong tuig.
Matud pa ni TDC chair Benjo Basas, ang magtutudlo nga adunay basic salary nga P19,077 makadawat sa mga mosunod: dili moubos sa P5,000 nga performance-based bonus (PBB); year-end bonus nga nagkantidad og P19,077; P5,000 nga cash gift ug lain pang P5,000 nga productivity enhancement incentive (PEI).
Apan alang sa mga magtutudlo nga mokabat sa P35,000 ang madawat nga PBB, posibleng makadawat og maximum nga kinatibuk-ang kantidad nga P64,077.
Gipasabot ni Basas nga madawat na sa mga magtutudlo ang ilang PBB, year-end bonus ug cash gift karong bulan, samtang ang PEI usab ihatag sa Disyembre.
Ang PBB parte sa productivity-based incentive system ubos sa Salary Standardization Law-3 diin ang mga magtutudlo ug ubang empleyado makadawat og bonus nga gikan P5,000 taman P35,000, depende sa ilang nahimong performance sa tibuok tuig.
Apan matud pa ni Basas, naa sa 2 porsiyento lang sa teaching force sa Department of Education (DepEd) ang makadawat sa maximum amount sa PBB tungod kay giingong lisud usab nga makakuha og kapin sa P5,000. (ecb/PIA7-Bohol)
