TAGBILARAN CITY, Bohol, Sept. 04 (PIA)–Gipasabot sa Department of Enery (DOE) ang paglihok sa presyo sa diesel ug gasolina karong semanaha.
Matud pa ni DOE Oil Industry Management Bureau Dir. Zenaida Monsada, dili na parehong dependent ang presyo sa diesel ug gasolina sa presyo sa krudo sa world market apan sa nagka-daiyang specific product target na kini.
Giingong niadtong tuig 2009 pa sa dihang nakita nila nga buwag na ang presyuhan sa diesel ug gasolina tungod sa managlahi ang gidaghanon ug demand niini.
Giingong naiimpluwensyahan sa ekonomiya sa Amerika ang gasolina samtang ang Europe ug Asya usab partikular ang China ang nakaaapekto sa presyo sa diesel.
Gipasabot ni Monsada nga may rollback karong semana sa presyo sa gasolina tungod kay nisaka man ang demand niini niadtong niaging semana human sa hulga sa Bagyong Isaac sa Amerika.
Apan wala man niigo ang maong bagyo hinungdan nga nibalik ra sa normal ang suplay sa gasolina sa world market.
Nagtuo si Monsada nga halos pareho lang ang computation sa DOE sa computation sa mga kumpanya sa lana sa pagsaka o pagkaltas sa presyo.
Gitataw usab ni Monsada nga wala nagkulang ang DOE sa pag-monitor sa presyo sa krudo dili lamang matag semana apan sa kinatibuk-ang presyo niini sukad pagsugod ning tuig. (PIA-Bohol/ECB/I-gg)
DOH, nimandu sa pagbutang sa dengue express lanes sa mga ospital
TAGBILARAN CITY, Bohol, Sept. 04 (PIA)–Gimanduan na sa Department of Health (DOH) ang mga ospital sa pagbutang og dengue express lanes aron mahatagan og prayoridad alang sa paspas nga pagtagad ang mga pasyente sa dengue.
Matud pa sa buhatan, ang dengue usa ka matang sa sakit nga angay atimanon dayon ang pasyente kun nakitaan na og mga sintomas sama sa hilanat, sakit sa tiyan, naglisod sa pagginhawa, pagsuka ug pag-ubos sa platelet.
Gikahadlokan sa DOH nga malabwan pa ang gidaghanon sa kaso sa dengue karong tuig ang kapin sa 100,000 nga natala niadtong 2011.
Sa labing ulahing talaan sa DOH, mikabat na sa kapin 80,000 ang naigo sa sakit sukad Enero hangtud Agosto 2012.
Mas taas na kini og 14-porsyento kun itandi sa kapin 70,000 nga natala sa milabay nga tuig.
Gwas niini, mikabat na usab sa 496 ang gidaghanon sa mga namatay tungod sa dengue diin pinakadaghan ang natala sa National Capital Region (NCR) sa 16,087 nga kaso ug 84 na ang namatay. (PIA-Bohol/ECB/I-gg)
