DUNGAN sa hulga sa swine flu o influenza A H1NI, mipasidaan ang Department of Health pinaagi ni Kalihim Francisco Duque, dili malinga sa lain pang mas kuyaw nga sakit: ang dengue.
Butyag niya, gikagubtan man ang swine flu apan 57 na ang namatay sa dengue og wala pay nadisgrasya sa swine flu.
Sumpay niya, dili kaayo grabe ang matang sa A/H1N1 nga mi-igo sa Pilipinas kon itandi sa mga matang nga didto nagsugod sa Mexico.
Sa iyang pagtandi sa duha ka sakit, matud niya niabot nag 33 ka kasao sa swine flu ang natala sa nasud apang kinahanglang hinumduman nga 6,537 na ang kaso sa dengue nga natala sukad pa sa Enero.
Tungod sa nagkausab nga panahon, napamubo usab ang incubation period sa kagaw sa dengue, inay 12 days, karon, naa na sa 7 ka adlaw human motapnas sa tawo. (rachiu/PIA)
