TAGBILARAN CITY, Bohol, July 24 (PIA)–Nanawagan ang Department of Health (DOH) sa mga persons with disabilities (PWD) nga magpa-rehistro sa ilang mga lungsod aron makakuha sa mga diskwento sa mga paliton nga tambal ug uban pang medical services.
Matud pa ni DOH Center for Health Development – National Capital Region (NCR) Director Eduardo Janairo, mahimong magpalista ang mga PWD sa Persons with Disabilities Affairs Office (PDAO) sa ilang mga lungsod o munisipalidad aron mahatagan sila og mga gikinahanglang dokumento nga magamit sa pagkuha og diskwento.
Gibutyag ni Janairo nga makakuha og taman 20% nga diskwento sa tambal ug serbisyong medikal ang mga magparehistrong PWD.
Sa Kapihan sa PIA niadtong Hulyo 12 agig pagsaulog sa National Disability Prevention and Rehabilitation Week gikan Hulyo 17-23, ang presidente sa Bohol Federation of Disabled Persons Incorporated (BFDPI) nga si Mateo Quilas, miaghat na sa mga nahikawan sa abilidad sa pagpasakop sa mga kapunongan sa mga disabled sa ilang mga lungsod.
Kini, matud pa aron maatiman ug kahatagag igo nga suporta aron kapahimuslan sa katilingban.
Segun sa butyag ni Quilas, ang BFDPI nagtanyag og mga pamaagi aron ang sakop makapailawom sa mga bansay alang sa kapanginabuhian. (PIA-Bohol/ecb)
Wala nay bayad ang helmet ICC stickers
TAGBILARAN CITY, Bohol, July 24 (PIA)–Ang mga protesta sa mga tigpanakayan og motorsiklo nakapugos sa Department of Trade and Industry (DTI) sa pagtangtang sa koleksyon sa bayad alang sa processing ug sticker alang sa accreditation sa motorcycle helmets.
Si DTI Regional Director for Central Visayas Asteria Caberte sa pakighinabi sa radyo nipahibalo nga dili na mobayad ang mga tigpanakayan og motorsiko sa gitakdang P100 nga processing fee ug P1.25 nga sticker fee sa ilang buhatan sa pagbalik ug isyo sa International Commodity Clearance (ICC) ug Product Standard (PS) stickers karong adlawa, Hulyo 24 (Martes).
Kadtong mga nakabayad na sa ilang processing ug sticker fee sa buhatan sa DTI sa pagkuha sa ilang ICC/PS stickers, mahimong mokuha sa ilang refund nga P101.25 sa maong buhatan.
Kining maong kalambuan niabot human nipalanog ang mga tigpanakayan og motorsiklo sa DTI sa ilang reklamo sa bayronon nga P101.25 nga processing ug sticker fees.
Ang DTI-Bohol modawat pa sa mga helmet alang sa inspection ug accreditation hangtud Disyembre 31, 2012. (PIA-Bohol/ecb)
