MANILA, November 9 (PIA)–Gitakdang moadto karong adlawa si Presidente Rodrigo Duterte sa iyang ika-walo nga Asian trip sa Malaysia alang sa iyang 2-day state visit didto.
Gipaabot nga makigpulong si Duterte kang Malaysian Prime Minister Najib Abdul Razak ug moatubang usab siya sa Filipino community didto karong gabii.
Kapin sa 150,000 ka mga Pilipino ang nanimuyo karon sa Malaysia.
Mag stopover usab si Duterte sa Thailand aron mudoyog sa kasub-anan sa Thai royal family sa pagtaliwan ning bag-o lang ni Kung Bhumibol Adulyadej.
Matud pa ni Department of Foreign Affairs (DFA) Assistant Secretary Charles Jose, apil sa mga hisgotan nila Najib ug Duterte ang balaodnong pag-apil sa Malaysia sa peace talks sa gobyerno sa Pilipinas ug sa Moro Islamic Liberation Front (MILF).
Gawas niini, hisgotan usab ang mga isyu sa seguridad sa Sulu-Sulawesi Sea, counterterrorism ug ang pagkahimong chairman sa Pilipinas sa ASEAN sa sunod tuig.
Una nang gi-aghat ni Duterte ang Malaysia ug Indonesia nga mag-uban og pwersa sa pagbatok sa piracy, kidnapping ug uban pang krimen nga nahitabo sa mga kadagatang nagpalibot sa tulo ka nasod. (ecb/PIA7-Bohol)
