MANILA, Jan. 14, 2014 (PIA)–Gipahibalo karon sa Department of Education (DepEd) nga sugdan sa Enero 25 (Sabado) ang early registration sa tanang pampublikong tunghaan sa nasud.
Matud pa ni Education Secretary Armin Luistro, tuyo nilang malikayan kun adunay mahimong problema sa dili pa ang enrollment sa mga estudyante.
“We want to prevent logistical problems when the new school year starts in June. If our school heads know how many students they will have ahead of time, they can better prepare classrooms and seats and learning materials,” pasabot ni Luistro.
Target sa maong sayo nga pagparehistro ang mga batang 5-anyos aron masiguro ang ilang enrolment sa kindergarten ug ang mga batang 6-anyos aron pagsiguro nga mapatala sila sa Grade 1 sa umaabot Hunyo.
Ang ubang target sa early registration nag-apil usab sa mga out-of-school children (OSC) ug out-of-school youth (OSY) gikan sa mga disadvantaged groups, apil na sa mga street children nga nagpangedaron og 5 hangtud 18 ka tuig.
Giingong mahimong mopili ang estudyante sa klase sa edukasyon pinaagi ba sa pormal nga alternative delivery mode (ADM) o ang alternative learning system (ALS).
Aron pagsiguro sa kinatibuk-ang pagsalmot, gipangayo sa DepEd ang tabang sa mga opisyal sa lokal ug barangay alang sa sayong pagparehistro sa mga OSC, OSY, ug mga indigenous peoples (IPs).
Magpatabang ang DepEd sa lokal nga kagamhanan, Parent-Teachers Associations, mga opisyal sa barangay, civil society groups, civic organizations ug sa business sector alang niining early registration. (PIA7-Bohol/ECB)
