MANILA, Feb. 19 (PIA)–Gilagdaan na ni Presidente Benigno ‘Noynoy’ Aquino III ang executive order (EO) aron mapatuman ang unang tranche sa salary increase ug dugang benepisyo alang sa mga civilian ug uniformed government personnel.
Matud pa ni Presidential Communications Operations Office (PCOO) Kalihim Sonny Coloma Jr., gilagdaan na ni PNoy ang EO nga “Modifying the Salary Schedule for Civilian Government Personnel and Authorizing the Grant of Additional Benefits for both Civilian and Military and Uniformed Personnel.”
Dugang pa ni Coloma, ang paglagda sa maong EO ang unang gihimo ni PNoy pag-abot niini gikan sa pagtambong sa ASEAN-US Leaders Summit sa Estados Unidos.
Ang maong kamanduan ang maghatag og otoridad sa ehekutibo nga ipatuman ang unang tranche sa Salary Standardization Law 4 (SSL4) nga una nang gigahinan og pondo ubos sa 2016 General Appropriations Act.
Ubos sa 2016 GAA, naggahin og P57.9 bilyon nga kinatibuk-ang kantidad alang sa umento sa suholan sa mga kawani sa gobyerno.
Retroactive sa Enero 1 karong tuig ang pagpatuman sa salary increase mao nga madawat na sa mga kawani sa gobyerno ang ilang umento sa suholan sa sunod nga sweldo. (ecb/PIA7-Bohol)
