MANILA, May 15 (PIA)–Nipasidaan ang gobyerno sa publiko nga mag-amping sa pagpalit ug paggamit sa siyam ka cosmetic products nga nadiskubrehang adunay taas nga sangkap sa makahilong kemikal nga lead ug mercury.
Base sa gipagawas nga Advisory 2015-025 sa Food and Drugs Administration (FDA), nasayran nga apil sa maong mga produkto ang Qianyan Daily Night Special Anti-Speckle Beauty Cream, Monaliza Series Lipstick #5, Miss Merry Lipstick #03, Miss Merry Lipstick #05, Meiya Lipstick #02 (pink container), Meiya Lipstick #02 (pink/gold container), Meiya Lipstick #06 (pink container), Meiya Lipstick #02 (silver/red container) ug Ashley UV Resitance BB Whitening Spray.
Nasayran nga ang mga nahisgotang produkto giingong adunay sagol nga lead ug mercury nga nilapas sa gitakda sa Association of Southeast Asian Nations Cosmetic Directives.
Kalabot niini, miingon ang FDA nga gimanduan na nila ang ilang field regulatory officers nga kumpiskahon ang maong mga produkto nga walay FDA certificate of product notification.
Nihangyo usab ang FDA sa mga lokal nga kagamhanan nga siguradohong dili mabaligya ang maong mga produkto sa publiko. (ecb/PIA7-Bohol)
