MANILA, Jan. 21, 2014 (PIA)–Gitambagan sa Food and Drug Administration (FDA) ang tanang konsumedor base sa FDA Advisory No. 2014-006 nga undangon na ang paggamit sa dili rehistradong Sehat Badan, usa ka food supplement nga gibaligya pinaagi sa internet ug mapalit usab sa mga street vendors sa nagkalin-laing dapit sa nasud.
Gi-alerto ang FDA kabahin sa maong produkto sa usa ka konsomedor nga nitaho pinaagi sa FDA facebook (https://facebook.com/FDAPhilippines).
Ang maong taho ang nakapa-aghat sa Field Regulatory Officers sa gitumbok nga rehiyon sa pagpahigayon og product monitoring ug pagkuha og samples.
Sa inisyal nga pagsusi, nakita nga ang maong produkto walay English translation, usa ka paglapas sa A.O. 88-B s. 1984 o The Rules and Regulations Governing the Labeling of Prepackaged Food Products Distributed in the Philippines which provides “that in case of imported food products wherein the label information are declared in foreign language, the label must also carry the corresponding English translation, otherwise such products shall not be permitted for local distribution.”
Ang mga produktong gibaligya isip food supplement nga walay English translation nagdala og kadaut sa mga konsumedor diin wala silay impormasyon sa tinuod nga kinatibok-an sa maong produkto nga ilang gipalit.
Kining maong produkto tataw nga wala nipasar sa FDA standard of safety and quality mao nga naghatag og hulga sa maayong panglawas sa katawhan.
Sa gi-advertise online, giingong ang Sehat Badan usa ka herbal drink nga nag-promote ug makapa-uswag sa kinatibuk-ang panglawas ug makaayo sa nagkalain-laing sakit sama sa hubak o asthma, urinary stones, allergy, impotence, rheumatism, toothache ug ulcer.
Ang maong mga therapeutic o health claims dili aprobado sa FDA tungod kay ang maong produkto dili man rehistrado sa maong buhatan.
Ang FDA ang tig-regulate sa tanang produktong adunay therapeutic o health claims mao nga kinahanglan una sa maong herbal drink nga mokuha og License to Operate (LTO) isip manufacturer o distributor gikan sa FDA.
Gitataw usab sa FDA nga kadtong mga health products nga nakaabot sa FDA standards lamang ang isyuhan nila og Certificate of Product Registration (CPR). (PIA7-Bohol/ECB)
