MANILA, Jan. 27, 2014 (PIA)–Nipasiaan ang Food and Drugs Administration (FDA) sa publiko pinaagi sa FDA Advisory No. 2014-008 nga magbantay ug pillion ang kaonon nga mani tungod kay posibleng magdala kini og sakit nga cancer kun makakaon og mani nga positibo sa Aflatoxin B1.
Matud pa ni FDA Director Dr. Kenneth Go, kasagarang makuha ang Aflatoxin B1 sa mga mani nga adunay amag nga dili mabantayan ug makaon sa publiko ilabi na kun adobong mani o gi-matam-is kini nga mani.
Una nang nagpahigayon og pagsusi ang FDA sa mga pre-packed peanuts nga mapalit sa merkado ug pipila niini ang nagpositibo sa Aflatoxin B1 nga resulta sa amag ug usa ka anti-nutrient toxin nga gikonsiderar nga pinakakuyaw nga carcinogen.
Giingong ang Aflatoxin ang naghatag og kapait sa mga mani mao nga sunod nga makakaon og mani nga pait, angay kining ilabay na lamang.
Wala gibutyag sa FDA ang ngalan sa mga pre-packed peanuts nga ilang gisusi apan matud pa sa maong buhatan nga padayon pa ang ilang gipahigayong imbetigasyon.
Partikular nga gipa-amping sa FDA ang publiko sa pagpalit og mani nga gibaligya lamang kilid sa kadalanan tungod kay giingong wala kini ni-agi sa quality control nga kasagarang dili mabantayan sa mga tindera nga gi-amag na diay ang ilang gibaligyang nilung-ag ug adobong mani.
Tambag pa sa FDA, sa mga FDA-registered nga mani lamang mopalit aron masiguro nga limpyo ug de-kalidad ang klase sa pagkaong mapalit. (PIA7-Bohol/ECB)
