MANILA, Feb. 09 (PIA)–Nipasidaan ang Commission on Elections (Comelec) sa mga kandidato karong 2016 elections nga hugot nilang bantayan ang paggasto sa mga kandidato sa pagsugod sa national campaign period karong adlawa.
Matud pa ni Comelec Chair Andres Bautista, mahimong hugot na karon ang ilang finance office sa pagpanguna ni Commissioner Christian Robert Lim sa pag-monitor sa mga gigasto sa mga kandidato sa mga ads ug uban pang paraphernalia aron masiguro nga dili sila molapas sa gitakda sa balaod.
Makig-alayon ang poll body sa Anti-Money Laundering Council (AMLC), Commission on Audit (COA) ug sa Bureau of Internal Revenue (BIR) sa pagmonitor sa mga kandidato.
Nakalatid sa Comelec Resolution No. 9981 nga dili angay molapas sa 120 minuto ang TV ads ug 180 minuto nga radio commercials per station basis ang mga kandidato ug registered political parties alang sa nasudnong posisyon, kini gipalit man o donasyon.
Gidili na usab karon ang pagbutang og mga banners sa mga lugar nga dili apil sa gitakdang common poster areas sa Comelec.
Ang bisan kinsang molapas sa patakaran sa Comelec mapahamtangan og unom ka tuig nga pagkabilanggo, pagkawala sa katungod nga makabotar ug disqualification sa public office. (ecb/PIA7-Bohol)
