TAGBILARAN CITY, Bohol, Aug. 29 (PIA)–Giseguro karon sa gobyerno nga walay special treatment nga ihatag ang mga otoridad sa negosyanteng si Janet Lim Napoles, bisan pa mismong kang Presidente Benigno Aquino III kini mitahan.
Matud pa ni Department of Interior and Local Government (DILG) Sec. Mar Roxas, sama sa ordinaryong akusado, mi-agi sa proseso si Napoles apil ang paghatag sa iyang warrant of arrest, booking ug pagkuha sa iyang mugshots ug fingerprints sulod sa Camp Crame.
Gipasabot sa kalihim nga ang seguridad nga gihatag sa Philippine National Police (PNP) sa negosyante mahinungdanon aron ma-secure kini ug mahibaw-an sa katawhan ang kamatuoran.
“Ang punto ‘di ba hinahanap siya ng buong sambayanan? Mahalaga na ma-secure siya para malaman natin ang katotohanan,” matud pa ni Roxas.
Kalabot niini, gikumpirmar ni Roxas nga gibawi na sa gobyerno ang P10 milyon reward nga unang gitanyag sa Presidente sa makahatag og impormasyon sa pagsikop kang Napoles.
Apan anaa pa gihapon ang buwag nga P5 milyon nga tanyag alang sa igsuon niining si Reynald Lim nga gipaabot nga motahan na usab sa mga mosunod nga adlaw.
Gitataw usab sa kalihim nga sa pagtahan ni Napoles kang Presidente Aquino, wala naapil sa nahisgotan ang paghimo niini isip state witness.
Giingong ang nahisgotan lamang mao ang kahadlok sa negosyante sa iyang kinabuhi.
Una niini, gikumpirmar ni presidential spokesperson Edwin Lacierda nga alas 9:37 kagabii sa dihang nitahan kang Presidente Aquino si Napoles.
Si Napoles ang giingong nagpaluyo sa P10 bilyon pork barrel scam ug kontrobersyal nga fertilizer fund ug Malampaya fund scam. (PIA-Bohol/ecb)
