NAKITAAN og radioactive substance ang hangin sa Pilipinas bisan wala nausab ang
direksyon sa hangin sa Japan.
Matud pa ni Philippine Atmospheric, Geophysical and Astronomical Services Administration
(PAGASA) Senior Weather Specialist Niño Relos, niabot na ang radioactive susbtance sa
Pilipinas tungod sa weather system sa nagkalain-laing nasud.
Niingon si Relos nga ang hangin nga may radioactive substance gikan sa Japan, gidala
padung sa direksyon sa China ug gikan didto, naapektuhan kini sa weather system diin ang
hangin nagtuyok gikan sa high pressure area (HPA) padung sa low pressure area (LPA).
Giingong ang maong sistema ang nakaingon nga napadpad sa Pilipinas ang gagmay nga
traces sa radioactive substance gikan sa Japan.
Gitataw usab ni Philippine Nuclear Research Institute (PNRI) Executive Director Alumanda
dela Rosa nga ubos kaayo ang level sa contamination ug wala kini bisan-unsang dautang
epekto sa palibot bisan sa tawo o bisan sa mananap.
Bisan pa niini, nitambag si Relos nga dili una maligo sa uwan ilabi na ang mga taga-Metro
Manila dili tungod sa radioactive substance kun di tungod sa polusyon nga mahimong
magresulta sa acid rain.
Gipulong usab dayon sa National Disaster Risk Reduction and Management Council
(NDRRMC) ang nagkalain-laing ahensya sa gobyerno sama sa Department of Trade and
Industry (DTI), National Food Authority (NFA) ug Department of Environment and Natural
Resources (DENR) aron mahibaw-an kun unsang preparasyon ang gihimo nila kun mosaka
ang level sa kontaminasyon sa radioactive substance sa nasud. (ecbPIABohol)