TAGBILARAN CITY, Bohol, Aug. 12 (PIA)–Gitun-an na sa gobyerno ang hangyo sa pipila ka grupo ug indibidwal nga umento sa suholan alang sa mga kawani sa gobyerno sa tuig 2014.
Matud pa ni Deputy Presidential Spokesperson Abigail Valte, ang desisyon kabahin niini maggikan sa rekomindasyon sa Department of Budget and Management (DBM) kun angayan na ba ang paghatag og bag-ong salary adjustment sa mga kawani sa gobyerno.
Si Valte nagkanayon nga napatuman na sa gobyerno ang katapusang lakang sa salary standardization nga nagsaka sa suholan sa kapin sa usa ka milyong empleyado sa gobyerno.
Usa sa mga niduso sa dugang suholan sa mga kawani sa gobyerno si Alliance of Concerned Teachers Representative Antonio Tinio nga nag-inggong angay umentohan ang suholan sa mga kawani sa gobyerno imbes nga mogasto og P25 bilyon alang sa pork barrel fund sa sunod tuig.
Si Tinio nihatag sa maong pahayag human angkuna niadtong niaging semana ni Budget Secretary Florencio Abad sa pagdungog sa House Committee on Appropriations alang sa proposed 2014 National Budget nga taliwala sa padayon nga paglambo sa ekonomiya sa nasud, walay mapaabot nga umento sa suholan ang kapin sa usa ka milyong kawani sa gobyerno sa sunod tuig. (PIA-Bohol/ecb)
