MANILA, Feb. 21 (PIA)–Himuong parte ang mga apektado sa mga niaging kalamidad sa pagsaulog sa ika-28 nga anibersaryo sa EDSA People Power Revolution.
Matud pa ni Presidential Spokesperson Edwin Lacierda, gusto ni Presidente Aquino nga mahimong parte sila sa usa sa pinaka-mahinungdanong pagsaulog sa kasaysayan sa Pilipinas pinaagi sa pagbisita sa progreso sa gipatumang halapad nga rehabilitasyon sa gobyerno.
Giingong apil sa bisitahon sa pagsaulog sa EDSA People Power Revolution sa sunod semana ang Cateel, Davao Oriental alang sa rehabilitasyon sa bagyong Pablo, Eastern Samar tungod sa bagyong Yolanda ug ang linog sa Bohol.
Sa unang higayon, isaulog sa Cebu ang usa sa pinakamahinungdanong parte sa selebrasyon sa EDSA: ang ‘Salubungan’.
Nahimo naman gud nga makasaysayan ang Mt. Carmel sa Cebu diin kasamtangang nagpabilin kaniadto si kanhi Presidente Corazon Aquino.
“EDSA celebration has always been symbolic. You remember the solidarity of the Filipino people that February in 1986, and I was also there in ’86, so I fully agree that – I fully support the decision of the President to spend his EDSA celebration in the midst of the people afflicted to show that he is one and will always be one with the people – those who suffered during the two calamities.”
Molibot ang Presidente sa mga apektadong lugar atubangan na usab sa mga pagsaway nga giingong hinay ang tabang sa gobyerno sa mga apektadong lugar.
Apan gitataw sa tigpamaba sa Palasyo nga proyoridad sa administrasyong Aquino nga ibalik sa normal nga panginabuhi sa mga pamilya sa lugar nga naigo sa kalamidad ug katalagman. (PIA7-Bohol/ECB)
