IHATAG na ang P12.5B nga wala pa madawat nga Internal Revenue Allotment (IRA) sa tanan nga local government units, apan may bahin niini nga ipagamit usab aron kapatas-an pa ang ani ug kita sa mga mag-uuma ug mangingisda.
Kini human gilagdaan ni Presidente Gloria Macapagal Arroyo ang usa ka executive order (EO) kabahin niini aron kaluag-luagan ang suliran sa mga kabarangayan ug mapundohan na ang pagpalig-on sa agrikultura, matud ni Agriculture Secretary Arthur Yap sa mga taho.
Ang wala mahatag nga IRA naglakip sa kuwang nga madawat unta sa mga LGU gikan sa 2001 ug diin ang nasudnong budgets igo ra nga gire-enact.
Subay sa Republic Act no. 7160, o ang Local Government Code of 1991, hatagan ang LGUs ug 40% nga bahin sa buhis sa nasudnong pangagamhanan ug kini iuli gilayon.
Gibutyag ni Yap nga ang EO 723 nga giluwatan sa Presidente ubos sa kondisyon nga kabahin sa IRA differential gamiton sa LGU executives aron ipahuwam alang sa programang rice self-sufficiency ug uban pang pagpaneguro nga may makab-ot nga securidad sa pagkaon subay sa mga tumong sa Department of Agriculture (DA).
Sumpay niya nga sa kapakyas sa mga mag-uuma nga makakuha ug sayon nga pautang bisan sa kadaghang bangko nga nagtanyag sa pahulam, kini na maoy ilang higayon nga makagamit sa pundo.
Kini na ang hagit karon sa mga local nga tinugyanan kon unsaon nila pagbuhi ning pundo alang sa mga mag-uuma.
Usa sa mga paagi nga magamit ang pundo, matud ni Sec. Yap mao ang pahuwam alang sa abono ug sa liso nga igtatagud o igtatanum, mga himan sa panguma. (rachiu/PIA)
