MANILA, October 7 (PIA)–Gikonsiderar sa Duterte administration ang ilang kampanya batok sa ilegal nga droga ang pinakadakong nahimo ni Presidente Rodrigo Duterte sa una niyang 100 ka adlaw sa pangatungdanan.
Matud pa ni Presidential Spokesman Ernesto Abella, nagbaton og “dramatic and historic” nga progreso sa kampanya diin natala ang kapin sa 700,000 ang nitahan nga mga drug addicts sa nasod.
Dugang pa ni Abella, sa giingong unang tulo ka buwan, natumbok ang kalapad ug kalalom sa problema sa ilegal nga droga diin nasayran nga 97 porsiyento sa mga barangay sa tibuok nasod ang infiltrated o nasudlan na niini.
Giingong apil sa dakong nakab-ot sa hugot nga programa ni Presidente Duterte mao ang “awareness” o kaamgohan sa publiko aron masayran ang kaaway ug unsaon kini pagsumpo.
Base sa pinakaulahing datos sa Philippine National Police (PNP), naa na sa 1,377 drug suspects ang napatay; 732,698 ang nitahan nga mga drug dependents; 22,503 ang nitahan nga mga drug pushers ug kinatibuk-ang 1,634,111 ka panimalay na ang nabisita kalabot sa pagpatuman sa Oplan Tokhang.
Gawas niini, gihinganlan usab ni Presidente Duterte ang mga nalambigit nga polis ug mga opisyal sa gobyerno sa operasyon ug pagpanalipod sa operasyon sa ilegal nga droga.
Sa pagkakaron, nagpadayon pa ang pagdungog sa House Justice Committee kalabot sa Bilibid illegal drugs trade diin niatubang isip testigo ang pipila ka convicted drug lords ug mga kriminal nga naglambigit kang kanhi Department of Justice (DOJ) Kalihim ug karon Senador Leila De Lima. (ecb/PIA7-Bohol)
