TAGBILARAN CITY, Bohol, Jan. 04 (PIA)–Giseguro kagahapon sa Malakanyang nga magpadayon ang gihingusgang kampanya sa Philippine National Police (PNP) batok sa mga dili lisensyadong armas bisan nilabay na ang Kapaskuhan.
Kahinomdomang usa sa hinungdan mao nga daghan ang biktima sa stray bullets ang natala tungod sa pagdagsang sa mga loose firearms.
Matud pa ni Presidential Spokesman Edwin Lacierda, dili ihunong ang gihimong monitoring sa mga tag-iya og armas ilabi na nga gitakdang ipatuman ang gun ban karong 2013 elections.
Dugang pa ni Lacierda, ipadayon usab sa gobyerno ang kampanya batok sa mga private armed groups nga maoy kasagarang tiggamit sa mga loose firearms.
Sa talaan sa DoH, naa sa 40 ang biktima sa stray bullets diin apil na niini ang siyete anyos nga batang babae nga namatay niadtong Miyerkoles human nakigbugno sa kamatayon sa East Avenue Medical Center. (PIA-Bohol/ecb/I-gg)
Re-extension sa ceasefire sa CPP,
welcome development sa Malakanyang
TAGBILARAN CITY, Bohol, Jan. 04 (PIA)–Welcome development sa Malakanyang ang gihimong re-extension sa ceasefire sa Communist Party of the Philippines (CPP) hangtud Enero 15, 2013.
Matud pa ni Presidential Spokesman Edwin Lacierda, maka-ayo ang pagpa-uswag sa ceasefire alang sa mga sundalo ug rebelde aron makauban nila og dugay ang ilang pamilya ug mga mahal sa kinabuhi.
Kalabot niini, magpabiling positibo ug committed ang administrasyon aron madayon ang peace process sa NDF.
Una niini, nadismaya ang Palasyo sa desisyon sa Communist Party of the Philippines nga tapuson na unta kagahapon ang ceasefire declaration imbes nga sa Enero 15, 2013 pa.
Base sa statement sa CPP, kini human mapakyas ang gobyerno sa Pilipinas nga imando ang pagpa-uswag sa ceasefire hangtud Enero 15.
Sigun pa kang Sec. Lacierda, klaro nga gi-respeto sa AFP ang maong deklarasyon.
Giingong dili na usab kinahanglan pa ang pormal nga mando sa Presidente alang sa pag-uswag sa ceasefire tungod kay nasabotan naman kini sa panaghisgot kaniadto sa Norway. (PIA-Bohol/ecb/I-sjp)
