TAGBILARAN CITY, Nov. 28 (PIA)–Gibutyag ni Presidente Benigno “Noynoy” Aquino III ang kapin sa P5 bilyon nga pondo alang sa rehabilitasyon sa Bohol human gitay-og ang lalawigan sa 7.2 magnitude nga linog niadtong Oktubre 15.
Nibalik ang Presidente sa Bohol karong adlawa sa ikatulong higayon human sa linog sa niaging buwan aron pangunahan ang inspeksyon sa mga nagubang imprastraktura.
Matud pa ni Presidente Aquino, gamiton ang pondo sa pagtukod og mga imprastrakturang dili daling maguba sa bagyo ug linog.
Giingong apil na niini ang mga bag-ong dalan ug tulay nga mahinungdanon sa transportasyon.
Kahinumdomang naguba ang mga nag-unang dalan sa Bohol sa linog apil na sa mga tunghaan, simbahan ug uban pang public establishments.
Samtang, kinatibuk-ang P289 milyon usab ang gisugyot nga pondo sa Department of Health (DoH) sa Malakanyang alang sa rehabilitasyon sa mga health facilities nga naguba sa kusog nga linog.
Matud pa ni DoH Sec. Enrique Ona nga sa maong kantidad, kapin sa P80 milyon ang alang sa mga rural health units samtang ang kapin sa P45 milyon alang sa mga barangay health centers.
Giingong mokabat sa P163 milyon ang kinahanglanong pondo alang sa pagpaayo sa pipila ka mga nagubang tambalanan ug pagpatukod og mga bag-ong tambalanan.
Si Ona nagkanayon nga usa lamang kini sa gi-prisintar nilang report kang Presidente Aquino karong adlawa didto sa Bohol Tropics Resort.
Sa kinatibuk-an, miingon si Ona nga 169 ang kinatibuk-ang mga pasilidad nga naguba diin 21 niini ang totally-damaged ug ang nahabilin alang sa partially-damaged.
Gipasalig usab ni Ona nga magtukod og bag-ong tambalanan sa lungsod sa Loon gamit ang hiniusang pondo gikan sa DOH ug LGU-Loon. (PIA7-Bohol/ECB)
