TAGBILARAN CITY, April 06 (PIA)–Gitun-an karon sa Philippine Institute of Volcanology and Seismology–Department of Science and Technology (PHIVOLCS-DOST) ug sa kagamhanan sa lalawigan sa Bohol ang katukoran sa fault museum sa lungsod sa Inabanga.
Ang maong fault museum magsilbi usab nga sayantipikanhon ug turismong katuyoan.
Niadtong Martes sa gabii, nakigtagbo si Gob. Edgar Chatto nilang PHIVOLCS Director Renato Solidum ug Philippine Atmospheric, Geophysical and Astronomical Services Administration-7 (PAGASA-7) Director Oscar Tabada.
Dinhi gitunol ni Solidum kang Chatto ang mga hazard maps sa lalawigan.
Gitakdang itunol usab sa PHIVOLCS ang duha ka seismic stations nga nahimutang sa lungsod sa Talibon ug Garcia Hernandez nga nagkantidad og P3.5 milyon matag usa.
Ang PHIVOLCS kasamtangang nagpahigayon karon og tulo ka adlaw nga pagbansay nga gitawag og Communicating Earthquake and Tsunami Hazards alang sa 40 ka magtutudlo sa Department of Education (DepEd) Tagbilaran City Division.
Tumong sa maong pagbansay nga masayran ug mapahanas na ang pagpahibaw kabahin sa hulga sa linog ug mga pagbanlas sa dagat.
Ang kawalay katakus sa mga tinugyanan, ilabi na sa mga magtutudlo nakita nga usa sa mga nakapasamut sa kalisud sa katawhan nga makasabut sa kalapad sa kakuyaw nga nagsingabut nga epekto sa linog ug pagbanlas sa dagat. (ecb/PIA7-Bohol)
