TAGBILARAN CITY, July 5 (PIA)–Sugod sa paglingkod sa katungdanan ni Presidente Rodrigo Duterte, nikabat na sa 579 ka mga nalambigit sa ilegal nga droga ang nitahan sa kapolisan sa unom ka mga lungsod ug syudad sa Tagbilaran.
Sukad gahapon, Hulyo 4, ang lungsod sa Guindulman ang may pinakadaghang natala nga mitahan nga nikabat na sa 281 hangtod gahapon sa may alas 10 sa buntag.
Kini agi og tubag sa nagpadayong pagpatuman sa Oplan Tokhang (Toktok-Hangyo).sa Bohol Provincial Police Office (BPPO).
Sa lungsod sa Jagna, ang kapolisan nakatala na og 102 nga nalambigit sa droga nga nitahan niadtong Domingo ug Lunes.
Sa lungsod sa Loay, 4 ka mga drug personalities ang nitahan sa buhatan sa mayor sa may alas 3 sa hapon kagahapon.
Samtang sa lungsod sa Maribojoc, nikabat sa 20 ka drug personalities ang nitahan diin 6 kanila ang nitahan niadtong Biyernes samtang 14 kagahapon.
Sa syudad sa Tagbilaran, nikabat na sa 64 ka mga drug personalities ang nitahan, diin 2 niini ang may pending warrant of arrest sa kapolisan kalabot sa comprehensive dangerous drugs act of 2002 ug gibalhog na karon sa presohan sa Kampo Dagohoy.
Sa unang adlaw sa paglingkod ni Presidente Duterte, 94 ka mga nalambigit sa kalihokan sa ilegal nga droga ang nitahan sa ilang kaugalingon ngadto sa kapolisan sa lungsod sa Panglao.
Niadtong adlawa usab, nikabat sa 16 ka drug users sa lungsod sa Alicia ang nisanong sa panawagan sa kapolisan sa pag-surrender.
Una nang nanawagan ang BPPO sa mga tigpayohot ug tiggamitan og ilegal nga droga sa pagtahan na lamang sa ilang kaugalingon o kun dili man gani, mohawa na lamang dinhi sa lalawigan aron dili magmahay sa ulahi. (ecb/PIA7-Bohol)
