MANILA, April 23 (PIA)–Gitakdang magpahigayon og school-based vaccination campaign ang Department of Health (DOH) sa nagkalain-laing dapit sa nasud alang sa nagsingabot nga pagbalik sa klase.
Apil sa mga bakunang ipanghatag sa DOH ang libreng bakuna batok sa sakit nga cervical cancer o HPV (Human Papillomavirus) vaccine sa mga Grade 4 female students sa 20 ka pinakakabos nga lalawigan sa Pilipinas.
Matud pa sa Kalihim sa Panglawas nga si Janette Garin, adunay 300,000 kababayen-ang Grade 4 pupils lamang gikan sa mga pampublikong tunghaan ang target nilang mahatagan og HPV vaccine tungod sa limitado nilang pondo alang niini.
Tungod niini, giingong apil sa programa ang 20 ka pinakakabos nga lalawigan sa nasud.
Sugdan nila ang maong free anti-cervical cancer vaccination sa Agosto o ikatulong buwan sa pagbukas og balik sa mga tunghaan.l
Gipasabot sa Kalihim nga Grade 4 students ang napiling hatagan sa bakuna tungod sa pagtuo nga sa maong edad, mahimo nang makig-hilawas ang usa ka babaye.
Apan giingong dili kini mandatory o pinugsanay ug nanginahanglan pa og parental consent o pagtugot sa mga ginikanan.
Gawas sa HPV, plano usab sa DOH nga manghatag og anti-tetanus ug anti-diphtheria booster vaccines sa may 2.43 milyong Grade 1 students sa tanang pampublikong tunghaan.
Mokabat usab sa 1.67 milyong Grade 7 students sa tanang pampublikong tunghaan ang target nilang mahatagan og bakuna batok sa tipdas, rubella, tetanus ug diphtheria.
Ang maong school-based vaccination campaign parte sa National Immunization Program sa DOH. (ecb/PIA7-Bohol)
