GILAGDAAN ni Presidente Aquino ang Executive Order (EO) 23 niadtong Pebrero 1 ning tuiga nga maoy magmando sa pagpahunong sa logging sa mga nahabiling kalasangan ug aron mapanalipdan ug mapahunong ang kadaut nga nahi-aguman sa mga watersheds ug river systems dinhi sa nasud.
Ang maong kamanduan usab maoy magtukod sa Anti-Illegal Logging Task Force nga maoy sangunan sa pagpatuman sa nahisgutang kamanduan ug maoy manguna sa kampanya sa kagamhanan batok sa illegal logging.
Matud pa sa Presidente nga sayud siya nga ang nahisgutang kamanduan makasugat og pagsupak gikan sa industriya sa kahoy, apan kinahanglang ipatuman kini isip maoy kabahin sa iyang tulomanon sa nasud diha sa pagpanlipud sa kalikupan.
Kung mahinumduman niadtong miaging tuig, dunay 36 ka mga nangamatay, 32 ka mga nanga-angol ug 3 ang mga nawagtang nga mga tawo, ug minilyon ka pesos ang kantidad sa nangadaut nga mga kabtangan. (jrt/PIA-Bohol)
